Bo ke t’ei ora un amigu ke papia ku bo. I últimamente abo, komo mucha muhé, ta papia hopi ku un amigu a en partikular. Bo ta bisa bo mes: ‘Ta amigu so nos ta.’ I bo ta pensa ku e mucha hòmber akí ta sinti meskos. Pero, ta asina?

•  Kiko por pasa?

•  Dikon ta bon pa bo sa?

•  Kiko abo por hasi?

•  Tep

 No ta malu pa bo tin amigu. Pero kiko si bo tin un relashon spesial ku ún di nan? Kisas e por pensa ku bo ke mas ku djis un amistat.

 Esei ta loke abo ke? Ban wak algun kos ku por lag’é kere esei.

•   Bo ta dun’é muchu atenshon.

   “Aunke bo no tin kontrol riba kiko un hende ta sinti, bo no mester bis’é ku ta amigu so boso ta i na mes momento bèl e i papia tur  ora  bai kuné. Ta abo mes ta lag’é kere un kos pa otro.”​—Sierra.

•   Bo ta reakshoná riba e atenshon ku e ta duna bo.

   “No ta ami a kuminsá manda mensahe pa un mucha muhé, pero semper mi tabata kontestá tur su mensahenan. Despues tabata difísil pa mi splik’é ku pa ami e ta djis un amiga.”​—Richard.

•   Bo ta gusta su atenshon.

   “Tin hende ku ta gusta flirt; nan ta haña esei leuk. Nan ta hunga ku otro su sintimentunan sin niun intenshon di kuminsá un relashon. Mi a yega di mira e kos ei pasa hopi biaha i semper e víktimanan ta keda di hùrt.”​—Tamara.

 E punto ta ku si bo ta papia ku un hende i dun’é atenshon tur ora bai, bo ta lag’é kere ku ta algu bo ke tin kuné.

•   E por hùrt e otro persona.

   Beibel ta bisa: “Speransa posponé ta hasi e kurason sinti malu.” (Proverbionan 13:12, Beibel Santu) Kiko abo lo ferwagt si un mucha hòmber ta keda duna bo e impreshon ku e ke tin algu ku bo?

   “Tin un ekspreshon, ‘tene un hende na liña.’ Ta meskos ku ora bo kue un piská pero bo no ta hala e liña aden ni laga e piská bai. Esei tambe por pasa den un relashon. Si bo no ta interesá pa date e persona pero bo ta ‘ten’é na liña,’ lo bo hùrt e hopi.”​—Jessica.

•   E ta daña bo reputashon.

   Beibel ta bisa: “No buska boso mes interes so, ma tambe interes di otro hende.” (Filipensenan 2:4) Kon abo lo deskribí un mucha hòmber ku ta interesá solamente den su mes? Ki efekto esei por tin riba su reputashon?

   “Mi no tin lei ku mucha hòmber ku ta gusta flirt. Si for di awor un mucha hòmber ta hasi esei, kon ta para ora nos kasa? Esaki ta un forma di ‘usa’ un otro hende pa lanta bo propio ego, i esei ta masha egoista.”​—Julia.

 E punto ta ku hende ku ta mustra ku nan ta gusta un otro sin intenshon di kuminsá un relashon serio ta hùrt e otro hende i ta perhudiká nan mes tambe.

•   Beibel ta bisa pa trata ‘hòmber mas yòn manera ruman’ i ‘hende muhé mas yòn manera ruman muhé, ku tur puresa.’ (1 Timoteo 5:1, 2) Si bo sigui e konseho ei, lo bo tin bon amistatnan ku tantu mucha hòmber komo mucha muhé.

   “Si mi ta kasá, ami lo no bai flirt ku kasá di otro hende. Komo soltera, mi ta sòru pa mi ta balansá den mi trato ku mucha hòmber.”​—Leah.

•   Beibel ta bisa: “Ora tin hopi papiamentu, piká no ta falta.” (Proverbionan 10:19, Beibel Santu) E prinsipio akí ta konta tantu pa ora di papia komo pa ora di manda mensahe. Esaki ta enserá no solamente kiko bo ta bisa sino tambe ku ki frekuensia bo ta den kontakto ku un otro hende.

   “No tin niun motibu pa tur dia bo manda mensahe pa un mucha muhé sin ku bo tin pensá di date e.”​—Brian.

•   Beibel ta bisa: “E sabiduria djariba ta na promé lugá puru.” (Santiago 3:17) Bo por duna un hende gewon un brasa, pero e por kere ku ta algu bo ke tin kuné.

   “Mi ta purba di ta amigabel den mi kontakto ku mucha hòmber, pero te na un distansia, den tur sentido di palabra.”​—Maria.

 E punto ta ku si bo ta un mucha muhé, bo tin ku analisá kon bo ta trata un mucha hòmber. Un hóben ku yama Jennifer ta bisa: “Un bon amistat ta difísil pa haña, i bo no kier pèrd’é mandando señal robes.”

•    Skucha bon kiko otro hende ta bisa. Si un hende puntra bo, “Abo ku tal-i-tal ta date?,” bo por ta dunando un indikashon ku boso tin mas ku djis un amistat.

•    Trata tur bo amigunan meskos. No duna un mas atenshon ku e otronan.

•   Bai poko poko ku mandamentu di mensahe. Esei ta enserá e kantidat di mensahe ku bo ta manda, nan kontenido i e orario ku bo ta manda nan. Un mucha muhé ku yama Alyssa ta bisa: “No manda mensahe pa mucha hòmber mei anochi.”