Ku kiko bo por kompará bo konsenshi?

•   un kompas

•   un spil

•   un amigu

•   un hues

 E kontesta korekto ta tur kuater. E artíkulo akí lo splika dikon.

•  Kiko ta konsenshi?

•  Dikon bo mester entrená bo konsenshi?

•  Kon bo por entrená bo konsenshi?

•  Loke otro hóben ta bisa

 Konsenshi ta e abilidat interno di hende ku ta yuda bo distinguí bon for di malu. Beibel ta bisa ku e ta manera un “lei skirbí den hende su kurason.” (Romanonan 2:15) Un bon konsenshi ta yuda bo evaluá kua desishon pa tuma i tambe e ta yuda bo evaluá un desishon ku bo a tuma kaba.

•   Bo konsenshi ta manera un kompas. E ta guia bo den e bon direkshon, i lo yuda bo evitá problema.

•   Bo konsenshi ta manera un spil. E ta reflehá bo kondishon moral, i ta saka na kla e klase di persona ku bo ta.

•   Bo konsenshi ta manera un bon amigu. Si bo skuch’é, e por duna bo konseho práktiko pa bo tin éksito.

•   Bo konsenshi ta manera un hues. E por husga bo ora bo hasi algu robes.

 Konklushon: Bo konsenshi ta un guia vital pa yuda bo (1) tuma bon desishon i (2) drecha kualke daño pa motibu di bo eror.

 Beibel ta animá nos pa “mantené un konsenshi limpi.” (1 Pedro 3:16) Ta difísil pa hasi esei si bo no entrená bo konsenshi.

 “Mi tabata gaña mi mayornan tokante unda mi tabata, anto tene esei sekreto. Promé, mi konsenshi tabata molestiá mi, pero ku tempu, loke mi tabata hasi no a parse di ta asina grave mas.”—Jennifer.

 Despues di tempu, Jennifer a skucha su konsenshi i a konta su mayornan kiko tabata pasando i a stòp di gaña nan.

 Pensa riba esaki: For di ki momento Jennifer su konsenshi mester a spièrt’é?

 “Un bida dòbel ta difísil pa hiba i ta duna bo hopi strès. Si bo konsenshi permití bo dal un paso robes, ta bira mas fásil pa bo sigui dal paso robes.”—Matthew.

 Algun persona ta ignorá nan konsenshi kompletamente. Segun Beibel: “Nan a pèrdè tur sentido moral.” (Efesionan 4:19) Beibel na papiamentu koriente ta tradusié: “Nan a pèrdè bèrgwensa.”

 Pensa riba esaki: Hende ku no ta sinti remordimentu pa nan mal akshonnan, tin un mihó bida? Ki problema nan lo haña nan kuné despues?

 Konklushon: Pa mantené un bon konsenshi, bo mester usa bo “kapasidat di komprondé i asina entrená esaki pa distinguí loke ta bon for di loke ta malu.”—Hebreonan 5:14.

 Pa bo entrená bo konsenshi, bo tin mester di un base di prinsipio ku lo bo usa pa guia bo den bo akshonnan. Algun hende ta sigui ehèmpel di:

•   nan famia òf kultura

•   otro hóben

•   artista famoso

 Sin embargo e prinsipionan hañá den Beibel ta superior, i mihó ku tur eseinan. No ta nada straño, pasobra Beibel ta “inspirá di Dios,” kende a krea nos i sa kiko ta mihó pa nos.—2 Timoteo 3:16.

 Konsiderá algun ehèmpel.

 PRINSIPIO: “Nos ke komportá nos mes na un manera onesto den tur kos.”—Hebreonan 13:18.

•   Kon e prinsipio ei lo yuda bo konsenshi ora bo sinti bo tentá pa spik ora di traha un prueba, gaña bo mayornan òf hòrta?

•   Si bo konsenshi ta motivá bo pa ta onesto den tur kos, kon esei lo benefisiá bo awor i den futuro?

 PRINSIPIO: “Hui di fornikashon.”—1 Korintionan 6:18.

•   Kon e prinsipio ei lo yuda bo konsenshi ora bo sinti bo tentá pa wak pornografia òf pa tene relashon seksual promé ku matrimonio?

•   Si bo konsenshi ta motivá bo pa hui di fornikashon, kon esei lo benefisiá bo awor i den futuro?

 PRINSIPIO: “Pero bira bondadoso ku otro, mustra tierno kompashon, pordoná otro libremente.”—Efesionan 4:32.

•   Kon lo bo reakshoná si bo laga e prinsipio ei guia bo ora bo tin un problema ku bo ruman òf bo amigu?

•   Si bo konsenshi ta motivá bo pa ta bondadoso i pa mustra kompashon, kon esei lo benefisiá bo awor i den futuro?

 PRINSIPIO: “SEÑOR . . . ta odia esun ku ta gusta violensia.”—Salmo 11:5.

•   Kon e prinsipio ei ta yuda bo ora di skohe un pelíkula, programa di televishon òf wega di vidio?

•   Si bo konsenshi ta motivá bo pa rechasá entretenimentu violento, kon esei lo benefisiá bo awor i den futuro?

 HISTORIA DI BIDA REAL: “Mi tin amigunan ku ta hunga weganan di vidio violento, i mi tambe tabata hasi esei. Despues mi tata a bisa mi ku mi no por sigui hunga e tipo di weganan ei mas. Tòg mi tabata hunga nan solamente ora mi tabata serka mi amigunan. Ora mi yega kas, mi no tabata bisa mi mayornan nada. Mi tata tabata puntra mi kiko a pasa mi, pero mi tabata bis’é: ‘nada, mi ta bon.’ Un dia, mi a lesa Salmo 11:5 i a kuminsá sinti mi malu pa loke mi tabata hasi. Mi a realisá ku mi mester a stòp di hunga e tipo di weganan ei. I e biaha akí mi a stòp di bèrdat. Un di mi amigunan a sigui mi ehèmpel i a stòp di hunga e weganan violento ei.”—Jeremy.

 Pensa riba esaki: Na ki momento Jeremy su konsenshi a kuminsá traha, i na ki momento el a kuminsá skucha su konsenshi? Kiko bo ta siña for di e relato di Jeremy?

 Konklushon: Bo konsenshi ta mustra ki klase di persona bo ta i ki prinsipio bo tin. Kiko bo konsenshi ta bisa tokante abo?