Intimidashon seksual ta kualke kondukta inapropiá ku ta inkluí mishimentu òf asta komentario di karakter seksual. Pero tin bes ta difísil pa saka afó si ta trata di tentamentu, flirtmentu òf intimidashon seksual.

 Abo sa e diferensia? Klek  aki pa haña sa.

 Ta tristu pa bisa ku asta ora bo kaba skol bo por haña bo ku intimidashon seksual. Pero, si for di awor bo siña defendé bo mes, lo bo tin e konfiansa pa trata ku intimidashon seksual awor i den futuro ora bo kuminsá traha. Kisas bo por asta pone ku e persona ta stòp di intimidá otronan.

 Ta mas fásil pa bo stòp intimidashon seksual si bo sa kiko e ta i kon bo tin ku trata kuné. Wak tres situashon i kon bo por trata den kada un di nan.

 SITUASHON:

“Na trabou algun hòmber ku ta hopi mas grandi ku mi a keda bisa mi ku mi tabata bunita i ku nan tabatin e deseo di ta 30 aña mas yòn. Un di nan a asta kana mi tras i a hole mi kabei!”—Tabitha, 20 aña.

 Tabitha lo por a pensa: ‘Si mi djis ignorá nan, por ta nan ta kansa i stòp.’

 Dikon esei kisas no ta un bon idea: Ekspertonan ta bisa ku ora víktimanan ignorá intimidashon seksual, e problema ta sigui òf ta asta bira pió.

 Purba esaki: Papia ku e persona ku ta intimidá bo na un manera kalmu i kla, lag’é sa ku bo no ta tolerá su komportashon ni kiko e ta papia. Taryn di 22 aña a bisa: “Si un hende mishi ku mi na un manera ku ta laga mi sinti mi inkómodo, mi ta bira wak e i bis’é pa nunka mas e mishi ku mi. Mayoria di biaha esei ta kue e mucha hòmber di sorpresa.” Si e persona persistí, para firme i no entregá. Ora ta trata di defendé nos normanan moral haltu, Beibel ta duna nos e konseho pa “para firme, . . . i madurá” ku konfiansa.—Kolosensenan 4:12, Beibel Papiamentu Koriente.

 Kiko si e persona menasá bo? No konfront’é. Purba di kita for di einan mas lihé posibel i pidi un adulto ku bo ta konfia pa yudansa.

 SITUASHON:

“Tempu mi tabata den grupo ocho, dos mucha muhé a kue mi tene. Un di nan tabata lesbiana i tabata ke pa mi sali kuné. Mi a nenga, pero nan a sigui kansa mi tur dia durante kambio di klas. Un biaha nan a asta pusha mi kontra muraya.”​—Victoria, 18 aña.

 Victoria lo por a pensa: ‘Si mi konta un hende nan lo mira mi komo un mucha kèns i por ta nan lo no ni kere mi.’

 Dikon pensa asina kisas no ta un bon idea: Si bo keda sin konta un hende, e persona por sigui intimidá abo i otronan seksualmente.—Eklesiástes 8:11.

 Purba esaki: Buska yudansa. Bo mayor- i dosentenan por yuda bo trata ku e persona akí. Pero kiko si nan no ta tuma bo na serio? Purba esaki: kada bes ku bo ta wòrdu intimidá seksualmente, skirbi tur e detayenan. Skirbi e fecha, ora i lugá di kada okashon huntu ku loke e persona a bisa. Despues duna bo mayor òf dosente un kopia di esaki. Mayoria di hende ta tuma un keho skirbí mas na serio ku un keho verbal.

 SITUASHON:

“Mi tabatin hopi miedu di un mucha hòmber ku tabata den e tim di rugby. E tabata kasi dos meter haltu i tabata pisa 135 kilo. El a hinka den su kabes ku ta ku mi e ke drumi. Pa henter un aña largu el a kansa mi. Un dia, ami kuné so tabata den klas i el a kuminsá bini riba mi. Mi a bula lanta i kore sali for di klas.”​—Julieta, 18 aña.

 Julieta lo por a pensa: ‘Asina mucha hòmber ta.’

Esei lo no yuda pasobra: E persona ku ta intimidá bo lo no stòp si tur hende ta pensa ku su komportashon ta aseptabel.

 Purba esaki: Resistí e tentashon di hari djis un tiki. Mustra bon kla, ku bo ekspreshon di kara, kiko bo ta tolerá òf no.

 KASO 1:

“Mi no gusta trata hende sin manera. Pues ora mucha hòmber tabata kansa mi, mi tabata bisa nan pa stòp. Pero mi no tabata firme i hopi bes mi tabata smail ora mi tabata papia ku nan. Nan a pensa ku ta flirt mi tabata flirt ku nan.”—Tabitha.

•   Si abo tabata den Tabitha su situashon, kiko abo lo a hasi? Dikon?

•   Kiko por pone un hende ku ta kansa bo pensa ku bo ta flirt kuné?

 KASO 2:

“Tur kos a kuminsá ku algun komentario sushi di algun mucha hòmber den mi lès di gym. Pa simannan largu mi a ignorá nan, pero ta pió so kos a bira. Despues e mucha hòmbernan a kuminsá sinta banda di mi i brasa mi. Mi a pusha nan for di mi, pero nan a insistí. Finalmente, un di e mucha hòmbernan a duna mi un papel ku un mensahe masha mahos. Mi a duna mi mener e papel i skol a skòrs e mucha hòmber. Mi a realisá ku for di promé mi mester a bisa mi mener!”—Sabina.

•   Dikon bo ta kere ku Sabina no a bai serka e mener mas trempan? Bo ta haña ku el a tuma un bon desishon? Dikon?

 KASO 3:

“Un mucha hòmber a kansa mi ruman Greg den baño. E mucha hòmber a yega hopi serka di Greg i a bisa Greg dun’é un sunchi. Greg a nenga, pero e mucha hòmber no kier a lag’é. Greg mester a pusha e mucha hòmber for di su kurpa.”—Suzanne.

•   Greg tabata víktima di intimidashon seksual? Dikon?

•   Dikon bo ta pensa ku algun mucha hòmber no ke bisa ku otro mucha hòmber a intimidá nan seksualmente?

•   Bo ta haña ku Greg a dil bon ku e situashon? Kiko abo lo a hasi?