LOKE HÓBEN SA PUNTRA
Namorashon—Parti 1: Mi Ta Kla pa Namorashon?
E artíkulo akí lo kontestá e siguiente preguntanan:
Kiko ta namorashon?
Pa algun hende, namorashon ta djis algu leuk pa hasi. Pero den e artíkulo akí, “namorashon” ta referí na e periodo ku un mucha hòmber i un mucha muhé ta pasa tempu ku otro pa wak si nan lo ta un bon kasá pa otro. Pues, ora dos hende ta namorá, nan tin un meta. Namorashon no ta djis un manera pa haña atenshon di un persona di e otro sekso.
Ku tempu, dos persona ku ta namorá otro mester tuma un desishon: sea nan ta kasa ku otro òf nan ta stòp di namorá otro. Ora bo ta kuminsá ku namorashon, bo mester ta prepará pasobra kualke un di e dos kosnan ei por sosodé.
Ku otro palabra: Si bo ta pensa ku bo ta kla pa namorashon, bo mester ta kla tambe pa kasa.
Kuminsá ku namorashon sin intenshon di kasa un dia ta meskos ku solisitá pa un trabou sin intenshon di aseptá un trabou
Bo ta kla pa namorashon?
Namorashon por hiba na kasamentu. Pues, ta importante pa bo pensa riba ki tipo di persona bo ta i ki efekto esei lo tin riba boso relashon. Por ehèmpel, pensa riba e siguiente puntonan:
Kon bo ta trata bo famia? E manera ku bo ta trata bo mayornan i bo rumannan, foral ora bo tin strès, por mustra kon lo bo trata bo kasá.
Prinsipio di Beibel: “Kita tur tipo di amargura malisioso, rabia, furia, gritamentu i papiamentu di kos ofensivo for di boso, i tambe tur loke ta perhudisial.”—Efesionan 4:31.
Puntra bo mes: ‘Mi mayornan i mi rumannan ta haña ku mi ta trata nan ku rèspèt? Ora nos no ta di akuerdo ku otro tokante algu, mi por papia trankil ku nan òf mi ta rabia i kuminsá pleita ku nan?’
Si aworakí bo no por solushoná desakuerdo ku bo mayornan, bo ta kere ku ora bo ta kasá sí lo bo por solushoná desakuerdo ku bo kasá?
Si bo por sakrifiká sierto kos. Ora bo ta kasá, bo tin ku tene kuenta ku e deseonan di bo kasá, i hopi biaha, lo bo tin ku komplas’é.
Prinsipio di Beibel: “Laga kada hende sigui buska, no su mes benefisio, sino esun di e otro persona.”—1 Korintionan 10:24.
Puntra bo mes: ‘Semper mi ta insistí pa kos bai manera ami ke pa nan bai? Otro hende ta haña ku mi ta un hende rasonabel, òf fleksibel? Kon mi a yega di mustra ku e nesesidatnan di otro hende ta mas importante ku esnan di mi?’
Si bo ta un hende humilde. Un bon kasá ta atmití ora e hasi fout, i e ta pidi despensa.
Prinsipio di Beibel: “Nos tur ta faya hopi biaha.”—Santiago 3:2, nota.
Puntra bo mes: ‘Mi ta atmití mesora ku mi a hasi un fout, òf mi ta bini ku yen di èksküs? Mi tin tendensia di rabia lihé ora hende duna mi un konseho pa mi mehorá den algu?’
Kon bo ta usa bo sèn? Un di e kosnan ku hopi biaha ta trese problema den matrimonio ta plaka. Pues, un hende ku ta usa su sèn na un manera responsabel ta evitá e tipo di problema ei den su matrimonio.
Prinsipio di Beibel: “Kua di boso ku ke traha un toren no ta sinta kalkulá e gastu promé pa wak si e tin sufisiente pa kab’é?”—Lukas 14:28.
Puntra bo mes: ‘Mi ta pensa bon kon pa usa mi sèn òf mi ta gasta plaka pa loko i semper mi tin debe? Kon mi a yega di mustra ku mi por usa sèn na un manera responsabel?’
Kon bon bo ta spiritualmente? Si bo ta Testigu di Yehova, bo mester ta un hende ku ta studia Beibel regularmente i ku ta bai reunion regularmente.
Prinsipio di Beibel: “Felis ta esnan ku ta konsiente di nan nesesidat spiritual, ya ku e Reino di shelu ta di nan.”—Mateo 5:3.
Puntra bo mes: ‘Mi ta hasi esfuerso pa mantené mi fe fuerte? Mi adorashon na Yehova ta e kos di mas importante pa mi òf mi ta laga otro kos stroba mi ku esei?’
Ku otro palabra: E persona ku bo ta kasa kuné meresé un bon kasá. Si bo ta hasi bo bèst pa ta un persona asina, tin hopi chèns ku lo bo atraé un hende ku tambe ta hasiendo su bèst pa ta un bon kasá.
