Sin duda, bo ta konsiente ku kuminda insaludabel por daña bo salu. Si bo tin e kustumber di kome malu ora bo ta yòn, lo bo sigui kome malu ora bo bira adulto. P’esei ta bon pa bo desaroyá e kustumber di kome salú for di ora bo ta yòn.

•  Kiko ta enserá kome salú?

•  Kon mi por sigui kome salú?

•  Loke otro hóben ta bisa

 Beibel ta bisa ku nos mester ta “moderá den [nos] kustumbernan” i esei ta konta pa nos komementu tambe. (1 Timoteo 3:11) Ku e prinsipio akí na mente, ta bon pa bo sa ku . . .

•   Un kuminda saludabel ta konsistí di diferente grupo di alimento. Tin sinku grupo di alimento, i nan ta inkluí produkto di lechi, proteina, fruta, bèrdura i grano. Algun hende ta keda sin kome kuminda di un òf mas di e gruponan ei, pensando ku esei lo yuda nan baha di peso. Pero, esei por stroba bo kurpa di haña e vitaminanan ku e tin mester, pa bo ta salú.

   Purba esaki: Buska informashon òf puntra bo dòkter pa bo sa kiko ta e benefisio di diferente sorto di supstansia ku bo ta haña den kuminda. Por ehèmpel:

   Karbohidrato por duna bo energia. Proteina por yuda bo kurpa kombatí infekshon òf tambe traha i drecha tehido di bo kurpa. Sierto tipo di vèt, na e kantidat adekuá, por baha e rísiko di malesa di kurason i por laga bo sinti bo bon.

   “Mi ta purba di kome un tiki di kada grupo di alimento pa balansá mi kuminda. Mi no ta kere ku ta malu si de bes en kuando bo kome un mangel òf “fast food.” Pero, esei no mester ta e úniko kosnan ku un hende ta kome.Ta semper sabí pa bo ta balansá den bo komementu.”—Brenda.

•   Kome salú no ta nifiká bai te na ekstremo. Por ehèmpel, bo ta keda sin kome sufisiente òf bo ta kria e kustumber di wanta hamber i despues kome hopi kuminda òf ta keda sin kome algu ku bo gusta de bes en kuando.

   Purba esaki: Skirbi tur loke bo ta kome durante un luna. Nota kuantu biaha bo ta bai den un di e ekstremidatnan ku a ser menshoná. Kon bo por ta mas balansá den bo komementu?

   “Tabatin dia ku mi tabata kome kuminda ku hopi kaloria i tabatin dianan ku mi tabata kome kuminda ku tin poko kaloria. Despues, mi a stòp di konta kaloria i a purba di no kome di mas ni sigui kome ora mi stoma tabata yen. Esei a tuma mi tempu, pero awor mi a haña un balansa den mi manera di kome.”—Hailey.

•   Plania adelantá kiko bo ta bai kome. Beibel ta bisa: “E plannan di hende balente siguramente ta kondusí na abundansia.” (Proverbionan 21:5). Pa bo kria un kustumber di kome salú, bo mester plania adelantá kiko bo ta bai kome.”

   “Bo mester plania adelantá pa bo por kome salú. Esei por nifiká ku ta bo mes tin ku prepará bo kuminda na kas. Ku tempu lo bo mira e bon resultadonan, i lo bo spar asta plaka.”—Thomas.

•   Skohe kuminda saludabel na lugá di kuminda insaludabel. Beibel ta bisa: “Retené sabiduria sano.” (Proverbionan 3:21) Sabiduria sano por yuda bo bira kreativo i haña mas manera di kome saludabel ku ta mas mihó pa bo.

   “Un biaha pa dia, mi tabata kambia kuminda insaludabel pa kuminda saludabel. Por ehèmpel, na lugá di kome kos dushi, mi tabata kome un apel. Den korto tempu, mi a hasi hopi kambio pa dia pa mi kome salú!”—Kia.

•   No eksigí demasiado di bo mes. Beibel ta bisa: “Kome bo pan den felisidat.” (Eklesiástes 9:7) Kome salú no ta nifiká ku bo no por disfrutá di un kuminda òf ku bo mester ta demasiado preokupá ku kada hap di kuminda ku bo ta kome. Asta si bo tin ku baha di peso, kòrda ku bo meta ta pa bo tin un bon salú. No eksigí demasiado di bo mes.

   Últimamente, mi a baha kasi 14 kilo, pero nunka mi no a keda sin kome, ekskluí un grupo di alimento òf keda sin kome kos dushi. Mi a aseptá e echo ku esaki no ta un proseso ku ta bai lihé i ku mi mester kustumbrá ku e manera nobo akí di biba.”—Melanie.