•  Dikon mi mayornan ta mete den mi bida?

•  Loke bo por hasi

•  Loke otro hóbennan ta bisa

 Bo mayornan ta bisa bo ku ta djis interes nan ta mustra den bo. Ma abo ta haña ku nan no ta respetá bo privasidat. Por ehèmpel:

•   Un hóben ku yama Erin a bisa: “Mi tata ta kue mi telefòn, eksigí pa mi bis’é mi password i ta lesa tur mi mensahenan. Si mi rabia, e ta pensa ku ta skonde mi ta skonde algu.”

•   Denise, ku awor tin 20 i piku aña, ta kòrda kon su mama tabata chèk kada detaye di e resibu di telefòn. Denise ta konta: “E tabata wak tur number, puntra mi di ken e number ei ta i tokante kiko mi a papia ku e persona ei.”

•   Un tiner ku yama Kayla a bisa ku un biaha su mama a lesa un dagboek di dje. Kayla ta konta: “Mi a skirbi hopi di mi sintimentunan i asta kos tokante mi mama! Despues di esei, mi a stòp di skirbi den dagboek.”

 E punto ta: Bo mayornan ta responsabel pa bo bienestar i bo no tin kontrol riba kon strèn nan ta. I kisas por parse ku tin biaha nan ta demasiado strèn. Pero e bon ta ku tin kos ku bo por hasi pa gana nan konfiansa i haña mas privasidat.

 Ser onesto. Beibel ta animá nos pa “komportá nos mes na un manera onesto den tur kos.” (Hebreonan 13:18) Si bo hasi bo bèst pa ta onesto ku bo mayornan i sin skonde nada, lo ta mas fásil pa nan duna bo mas privasidat.

 Pa pensa ariba: Bo ta konfiabel? Bo sa yega kas mas lat di loke bo a palabrá ku bo mayornan? Bo ta skonde loke bo ta hasi i ken bo amigunan ta?

  “Mi sa ku mi mester duna di mi parti. P’esei mi no tin sekreto i ta konta mi mayornan tur loke nan ke sa. Asina nan ta konfia mi mas i ta duna mi privasidat.”​—Delia.

 Tene pasenshi. Beibel ta bisa: ‘Sigui demostrá ki tipo di hende bo ta.’ (2 Korintionan 13:5) Ta tuma tempu pa gana konfiansa di otronan pero esei ta bale la pena.

 Pa pensa ariba: Un tempu, bo mayornan tambe tabata hóben. Ki efekto bo ta kere ku esei tin riba e manera ku nan ta trata bo?

 “Mi ta kere ku mayornan ta kòrda e foutnan ku nan mes a hasi komo tiner i nan no ke pa nan yunan pasa den meskos.”​—Daniel.

 Hinka bo mes den nan sapatu. Purba di mira kos for di nan punto di bista. Beibel ta bisa ku un bon esposa “ta tene e kamindanan di su famia bon na bista” i ku un bon tata ta lanta su yunan “den e disiplina di Yehova.” (Proverbionan 31:27, Beibel Santu; Efesionan 6:4) Pa bo mayornan por hasi esei, nan mester sa kiko ta pasando den bo bida.

 Pa pensa ariba: Si abo tabatin yu, sabiendo kon hóbennan ta, lo bo a permití pa bo yu tin tur privasidat di mundu?

“Komo tiner, por parse manera bo mayornan no ta respetá bo privasidat. Pero awor ku mi ta mas grandi, mi ta komprondé dikon mi mayornan a hasi esei: pasobra nan ta stima mi.”​—James.