•  Loke bo mester sa

•  Loke bo por hasi

•  Loke otro hóben ta bisa

 Si bo ta responsabel, bo mayornan lo konfia bo i duna bo mas libertat. Ora bo obedesé e reglanan di bo mayornan ta manera bo ta paga nan un debe. Sí, bo debe bo mayornan obedensia. P’esei, mas nan por konfia bo, mas libertat nan lo duna bo. Di otro banda, si nan no por konfia bo, no keda strañá si nan no ta duna bo mas libertat.

 Ta tuma tempu pa gana konfiansa. Si bo ke pa bo mayornan duna bo mas libertat, bo mester demostrá promé ku bo ta un persona konfiabel.

 EHÈMPEL DI BIDA REAL: “Komo hóben mi tabata sa bon bon kiko mi mayornan tabata spera di mi. Pues, mi a hasi manera nan tabata ke, aunke den sekreto mi tabata hasi loke ami tabata ke. P’esei a bira difísil pa mi mayornan konfia mi. Ku tempu, mi a siña ku bo no por hasi loke bo ke i kere ku bo ta haña mas libertat. Bo mester duna konfiansa pa bo risibí konfiansa.”​—Craig.

 Papia bèrdat​—asta ora esei ta difísil. Tur hende por faya, pero ora bo purba di tapa esei ku mentira (òf keda sin bisa algu pa skonde e bèrdat) lo bo kibra tur konfiansa ku bo mayornan tin den bo. Di otro banda, ora bo tin e reputashon di ta onesto den tur kos, bo mayornan lo ripará ku bo ta sufisiente madurá pa atmití bo fayonan i karga e konsekuensianan. Esei ta e tipo di persona ku nan por konfia.

 “No ta semper bo ta pèrdè konfiansa ora bo kometé un fayo, pero semper bo ta pèrdè konfiansa ora bo purba di skonde un fayo.”​—Anna.

 Beibel ta bisa: “Nos ke komportá nos mes na un manera onesto den tur kos.”​—Hebreonan 13:18.

•   Pensa riba esaki: Ora bo mayornan puntra bo unda bo ta bai i kiko bo ta bai hasi, bo ta bisa nan tur kos? Òf ora bo mayornan puntra bo unda bo a bai i kiko bo a hasi, bo ta konta nan tur loke nan lo ke sa?

 Sea responsabel. Kumpli ku tur regla di kas. Hasi e trabounan di kas mesora. Yega na tempu na bo afspraknan. Hasi bo tarea di skol bon. Yega kas na e ora palabrá.

“ Si bo mayornan laga bo sali ku bo amigunan i pidi bo pa bo ta nueb’or bèk na kas, no yega kas mitar di diesun i spera ku nan lo laga bo sali ku bo amigunan e siguiente biaha!”​—Ryan.

 Beibel ta bisa: “Pasobra kada ken lo karga su propio karga di responsabilidat.”​—Galationan 6:5.

•   Pensa riba esaki: Bo tin bon reputashon di yega na tempu, hasi bo trabounan di kas i kumpli ku regla​—asta esnan ku bo no ta gusta?

 Tene pasenshi. Si bo a kibra e konfiansa di bo mayornan, lo tuma tempu pa bo por gan’é bèk. Pues, tene pasenshi.

 “Mi tabata frustrá ora mi mayornan no kier a duna mi mas responsabilidat ora mi a yega sierto edat. Mi a realisá ku bira mas grandi no ta meskos ku bira mas madurá. Mi a pidi mi mayornan duna mi chèns pa demostrá ku nan por konfia mi. Esei a tuma tempu, pero a bai bon. Mi a siña ku edat no ta loke ta konta pa gana konfiansa; sino loke mi ta hasi.”​—Rachel.

 Beibel ta bisa: “Sigui demostrá ki tipo di hende boso ta.”​—2 Korintionan 13:5.

•   Pensa riba esaki: Pa gana (òf bolbe gana) konfiansa di bo mayornan, kiko ta algun kos ku bo por hasi pa ‘demostrá ken bo ta’?

 TEP: Pone meta pa ta puntual, pa kaba ku bo trabou di kas, pa yega kas na tempu òf kualke otro kos. Laga bo mayornan sa kiko ta bo metanan, i puntra nan kiko nan ta spera di bo pa gana nan konfiansa. Despues, traha duru pa sigui e konseho di Beibel akí: “Pues, boso mester kita e personalidat bieu, ku ta di akuerdo ku boso komportashon di ántes.” (Efesionan 4:​22) Ku tempu bo mayornan lo mira bo progreso!