LOKE HÓBEN SA PUNTRA
Dikon Mi Mayornan No Ta Laga Mi Gosa?
Bo amigunan a invitá bo pa bai un fiesta e wikènt akí. Bo ta puntra bo mayornan si bo por bai, ma nan ta bisa bo “Nò.” Bo no a ferwagt otro. Biaha pasá nan a bisa meskos.
Den e artíkulo akí nos lo wak:
Dikon semper mi mayornan ta bisa nò?
Si ta parse ku tur ora bo mayornan ta bisa nò ora bo pidi algu, kisas bo ta pensa ku nan no ke pa bo gosa.
Un hóben ku yama Marie a sintié asina ora el a haña su promé selular. E ta bisa: “Mi tata a pone hopi regla tokante ki app mi por download, ku ken mi por papia i te ki ora mi por papia ku nan. Pero, mi amiganan sí por a hasi loke nan tabata ke!”
Pensa riba esaki: Di bèrdat Marie su tata no tabata ke pa e gosa? Kiko por tabata preokupá su tata?
Límite di velosidat por frena bo libertat, pero e por protehá bo di peliger. Esei ta konta tambe pa e reglanan ku bo mayornan pone
Purba esaki: Imaginá ku abo ta un mayor i bo tin un yu tiner ku a kaba di haña un selular. Ki preokupashon lo bo tin? Ki regla lo bo pone pa protehá bo yu? Kiko lo bo kontestá si bo yu bisa ku bo no ke pa e gosa?
“Semper mi tata a bisa: ‘Purba di hinka bo mes den mi sapatu.’ Ora m’a hasi esei, m’a mira e balor di e reglanan ku mi tata a pone i tambe dikon el a pone e reglanan ei. Si mi tabatin yu, lo mi tabata ke pa nan sigui e mesun reglanan ku mi tata a pone pa mi.”—Tanya.
Kiko mi por hasi pa mi mayornan bisa sí?
“Si bo zundra bo no ta logra nada, anto abo i bo mayornan lo keda kansá. Si bo pleita, bo mayornan lo pensa ku bo no ta un persona madurá i ku bo no ta kla pa haña mas libertat.”—Richard.
“Hopi biaha, mi mayornan tin bon motibu pa pone regla. Mi mayornan no ke stroba mi di gosa. Nan ke pa mi gosa, pero sin ku esei ta kousa problema.”—Ivy.
Beibel ta bisa: “Un persona bobo no por dominá su rabia, pero un persona sabí sí ta dominá su mes i keda kalmu.”—Proverbionan 29:11.
“Mi tabata buska èksküs pa mi no obedesé e reglanan ku mi tata a pone pa usa mi selular. Mi tabata buska manera pa manda mensahe pa mi amigunan anochi lat òf download app ku mi tata no tabata di akuerdo kuné. Ku tempu, mi tata a haña sa loke mi a hasi i a pone regla mas strèn, pasobra awor e no por a konfia mi. Nunka ta bon pa bo buska èksküs pa desobedesé regla.”—Marie.
“Tene pasenshi. Lo tuma tempu pa bo mayornan kambia un regla, pero si nan mira ku bo ta obedesiendo e reglanan ku nan a pone, kisas nan lo duna bo mas libertat.”—Melinda.
Beibel ta bisa: “Yunan, obedesé boso mayornan den tur kos.”—Kolosensenan 3:20.
“Si bo keda insistí pa haña loke bo ke, bo bida lo no bira mas fásil ni lo e no yuda bo haña loke bo ke.”—Natalie.
“Un mayor ke mira ku bo por tuma bon desishon. Pues, ora mi papia ku mi mayornan, mi ta purba di rasoná ku nan en bes di laga mi emoshonnan dominá mi. Ora mi hasi esei, ta mas fásil pa mi mayornan laga mi hasi loke mi ta pidi.”—Joseph.
Beibel ta bisa: “Onra bo tata i bo mama.”—Efesionan 6:2.
Otro Artíkulo Interesante
LOKE HÓBEN SA PUNTRA
Kon Mi Por Papia ku Mi Mayornan Tokante e Reglanan Ku Nan Ta Pone?
Si bo papia ku rèspèt ku bo mayornan, esei por duna bo bon resultado.
PINTAMENTU RIBA BÒRCHI
Kon Mi Por Haña Mas Libertat?
Bo ta kere ku bo ta kla pa ser tratá komo un adulto, pero bo mayornan kisas no ta mir’é asina. Kiko bo por hasi pa gana nan konfiansa?
LOKE OTRO HÓBENNAN TA BISA
Kon Mi Por Papia ku Mi Mayornan?
Probablemente, tin mas benefisio ku bo ta pensa.
LOKE HÓBEN SA PUNTRA
Kon Mi Por Gana Konfiansa di Mi Mayornan?
Tres paso práktiko ku por yuda bo haña mas libertat.
