Kiko lo bo hasi den e situashonnan akí?

1.   Bo maestro ta skual bo pa bo mal komportashon durante lès.

    Bo mester pidi bo maestro despensa, aunke bo ta pensa ku e ta eksagerá?

2.   Un di bo amiganan ta haña sa ku bo a papia algu malu tokante dje.

    Bo mester pidi bo amiga despensa, aunke bo ta kere ku bo tin rason?

3.   Bo ta rabia ku bo tata i ta falt’é rèspèt.

    Bo mester pidi bo tata despensa—aunke bo ta pensa ku ta é a provoká bo?

 E kontesta riba tur e tres preguntanan ei ta sí. Pero dikon bo tin ku pidi despensa asta si bo ta pensa ku bo tin rason?

•  Dikon ta bon pa pidi despensa?

•  E manera pa pidi despensa

•  Loke otro hóben ta bisa

•   Ora bo pidi despensa, bo ta mustra ku bo ta un persona madurá. Ora bo ta dispuesto pa aseptá e konsekuensianan di algu ku bo a bisa òf hasi, bo ta demostrá ku bo ta desaroyando kualidat ku ta importante pa ora bo ta adulto.

   “Humildat i pasenshi por yuda nos pa pidi despensa i skucha kiko e otro persona ke bisa nos.”—Rachel.

•   Ora bo pidi despensa, bo ta keda na pas ku otro hende. Un hende ku ta pidi despensa ta mas interesá den mantené pas ku den buska pa sa ken tin rason.

   “Asta si bo ta pensa ku bo no ta robes, ta mas importante pa mantené pas. E no ta kosta nada pa pidi despensa, pero esei por drecha bo amistat ku otro hende.”—Miriam.

•   Ora bo pidi despensa, lo bo sinti bo bon. E duele ku bo ta sinti ora bo hasi daño na un hende pa motibu ku bo a bisa òf hasi algu malu ta manera un karga pisá. Pero asina bo pidi despensa, lo bo haña alivio. a

   “Tabatin biaha ku mi a papia malu ku mama i mi tata. Mi a sinti mi malu despues, pero tabata difísil pa mi pidi despensa. Sinembargo, ora mi a pidi despensa, esei semper a laga mi sinti mi mas mihó pasobra esei a trese pas den famia bèk.”—Nia.

 Ta difísil pa pidi despensa? Sí! Un mucha muhé ku yama Dena, kende na vários okashon mester a pidi su mama despensa debí ku el a papia malu ku su mama, ta atmití: “No ta fásil pa pidi despensa. Bo ta sinti manera tin un klòmpi den bo garganta ku ta stroba bo di papia!”

•   Si ta posibel, pidi despensa kara-kara. Pidi despensa kara-kara lo yuda e otro persona mira ku bo despensa ta sinsero. Pidi despensa via mensahe por parse seku. Asta si bo pone e karanan tristu di emoticons, esei por parse impersonal i no sinsero.

   Tep: Si bo no por pidi despensa kara-kara, purba di yama e persona via telefòn òf skirbié un karchi. Sea ku bo ta yama òf skirbi un karchi, skohe bo palabranan bon.

   Beibel ta bisa: “Kurason di e hustu ta studia bon kon pa kontestá.”—Proverbionan 15:28.

•   Pidi despensa mesora. Mas bo tarda pa drecha un asuntu, pió e situashon por bira entre abo i esun ku bo a trata malu.

   Tep: Pone meta—por ehèmpel, ‘awe mi ta pidi despensa.’ Disidí ki ora bo ta pidi despensa i hasié.

   Beibel ta bisa: “Sea lihé pa drecha asuntu.”—Mateo 5:25.

•   Pidi despensa ku sinseridat. Bisa “ku ta duel mi ku bo ta sinti asina” no ta e manera korekto pa pidi despensa! Un mucha muhé ku yama Janelle a bisa: “E persona ku bo a trata malu lo respetá bo si e mira ku bo ta aseptá ku bo ta robes.”

   Tep: Pidi despensa sin spera nada a kambio. No bisa “mi ta pidi despensa si abo pidi despensa pa loke bo tambe a hasi.”

   Beibel ta bisa: “Laga nos hasi esfuerso pa buska e kosnan ku ta promové pas.”—Romanonan 14:19.