Si bo ta

•   ferwagt ku ta 10 so bo tin ku haña pa tur prufwèrk

•   evitá di aseptá retonan nobo pasobra bo tin miedu ku bo ta frakasá

•   tuma na malu tur krítika ku bo ta haña

 . . . , e ora ei e kontesta riba e pregunta ariba kisas ta sí. Pero esei ta algu malu?

•  Ta malu pa ta perfekshonista?

•  Tin un mihó manera?

•  Loke otro hóbennan ta bisa

 No tin nada malu den hasi bo bèst. Sinembargo, e buki Perfectionism​—What’s Bad About Being Too Good? ta bisa: “Tin un diferensia grandi entre e deseo sano di hasi kosnan na e mihó manera posibel i e lucha insaludabel pa logra metanan inalkansabel.” E buki a agregá: “Perfekshonismo ta un karga hopi pisá pasobra nos tin ku atmití ku ningun hende no ta perfekto.”

 Beibel ta di akuerdo ku esei. E ta bisa: “No tin hende hustu riba tera ku kontinuamente ta hasi bon.” (Eklesiástes 7:20, Beibel Santu) E echo ku bo ta imperfekto ta pone ku no semper loke bo ta hasi lo bai ta espektakular.

 Bo ta haña ku ta difísil pa aseptá esaki? Si ta asina, wak kuater manera ku perfekshonismo por afektá bo.

1.   E manera ku bo ta mira bo mes. Un perfekshonista ta eksigí demasiado di su mes i esaki por hiba na desapunto. Alicia ta bisa: “E realidat ta ku nos no por ta bon den tur kos. Si nos keda rebahá nos mes pasobra nos no ta perfekto, nos por kuminsá pensa ku nos no ta hasi nada bon i esei por deprimí nos.”

2.   E manera ku bo ta mira konseho. Un perfekshonista tin tendensia di sinti su mes ataká ora nan risibí konseho òf krítika. Un mucha hòmber ku yama Jeremy ta bisa: “Mi ta sinti mi hopi malu ora hende korigí mi. Si bo ta perfekshonista, esei ta stroba bo di rekonosé bo limitashonnan i aseptá e yudansa ku bo tin mester.”

3.   E manera ku bo ta mira otronan. Un perfekshonista ta ferwagt hopi di otro hende i esei ta lógiko. Anna di 18 aña ta bisa: “Si bo ta eksigí perfekshon for di bo mes, lo bo eksigí esei tambe for di otronan. I ora otronan no kumpli ku e eksigensia ei, konstantemente nan ta desepshoná bo.”

4.   E manera ku otronan ta mira bo. Si loke bo ta eksigí for otro hende semper ta irasonabel, no keda asombrá ku hende no ke ta rondó di bo! Un hóben ku yama Beth ta bisa: “Biba segun e eksigensianan irealístiko di un perfekshonista ta ègt kansa bo. Ningun hende no ke tin amistat ku un hende asina!”

 Beibel ta bisa: “Laga tur hende mira ki rasonabel boso ta.” (Filipensenan 4:5) Hende ku ta rasonabel ta balansá den loke nan ta ferwagt di nan mes i di otronan.

 “Tin sufisiente preshon djafó kaba ku nos ta haña nos kuné. Dikon pone mas preshon aserka dor di ta perfekshonista? Esei ta muchu kos pa nos dil kuné!”​—Nyla.

 Beibel ta bisa: “Kana humildemente ku bo Dios.” (Mikéas 6:8, Beibel Santu) Hende modesto, òf humilde, ta rekonosé nan limitashonnan. Nan no ta dediká hopi tempu na un tarea ni no ta tuma mas tarea ku nan por hasi.

 “Si mi ke kumpli bon ku mi responsabilidatnan, mi mester ta rasonabel i aseptá solamente loke mi por hasi. Mi no por hasi tur kos.”​—Hailey.

 Beibel ta bisa: “Tur loke bo man haña pa hasi, hasié ku tur bo forsa.” (Eklesiástes 9:10, Beibel Santu) Pues, flohera no ta e solushon pa perfekshonismo ma ser un bon trahadó huntu ku e kualidatnan menshoná ariba esta, ser rasonabel i modesto.

 “Mi ta purba di hasi mi trabou lo mihó posibel i duna tur di mi mes. Mi sa ku nunka lo e no ta perfekto pero mi ta kontentu ku mi a hasi mi bèst.”​—Joshua.