“E reglanan di mi mayornan tabata perfekto tempu ku mi tabatin 15 aña. Pero awor mi tin 19 aña, i mi ta haña ku nan mester duna mi mas libertat.”​—Sylvia.

 Bo ta sinti meskos ku Sylvia? Si ta asina, e artíkulo akí lo yuda bo papia tokante e asuntu ei ku bo mayornan.

•  Loke bo mester sa

•  Loke bo por hasi

•  Loke otro hóben ta bisa

 Promé ku bo papia ku bo mayornan tokante e reglanan ku nan tin, pensa riba e siguiente puntonan:

•  Bida sin regla lo ta un desaster. Pensa riba un kaya ku ta masha drùk. Kiko lo pasa si no tin niun bòrchi ni lus di tráfiko ni límite di velosidat? Pues, meskos ku regla di tráfiko, regla di kas ta yuda mantené òrdu.

•  E reglanan ta mustra ku bo mayornan ta stima bo. Si bo mayornan no pone niun regla, esei por indiká ku nan no ta interesá den bo. Lo bo bisa ku nan ta bon mayor?

 BO TABATA SA? Bo mayornan tambe tin ku kumpli ku regla! Si bo no ta kere, lesa Génesis 2:​24; Deuteronomio 6:​6, 7; Efesionan 6:4 i 1 Timoteo 5:​8.

 Pero, kiko si ainda bo ta sinti ku e reglanan di bo mayornan ta muchu estrikto?

 Promé ku bo papia ku nan, pensa riba esaki. Bo tin e kustumber di obedesé bo mayornan? Si bo no tin kustumber di obedesé bo mayornan, lo no ta sabí pa pidi nan mas libertat aworakí. En bes di esei lesa e artíkulo, “Kon Mi Por Gana Konfiansa di Mi Mayornan?”

 Si bo tin kustumber di obedesé bo mayornan, pensa bon kiko bo ke bisa nan. Si bo skirbi adelantá loke bo ke bisa, esei por yuda bo analisá si loke bo ke bai pidi ta rasonabel òf nò. Despues, pidi bo mayornan pone un ora i lugá kaminda boso tur lo sinti boso kómodo pa papia. Durante e kòmbersashon ku bo mayornan, kòrda lo siguiente:

 Mustra rèspèt. Beibel ta bisa: “Un palabra skèrpi ta lanta rabia.” (Proverbionan 15:1) Pues, no lubidá: Si bo diskutí ku bo mayornan òf akusá nan ku nan ta inhustu, e kòmbersashon lo no bai bon.

 “Mas mi respetá mi mayornan, mas nan ta respetá mi. Ta mas fásil pa nos yega na un akuerdo ora nos tur ta respetá otro.”​—Bianca, 19 aña.

 Skucha. Beibel ta bisa nos pa nos “ta kla pa skucha, slo pa papia.” (Santiago 1:​19) Kòrda ku bo ta kòmbersando ku bo mayornan, pues bo tambe tin ku skucha i no papia so.

 “Segun ku nos ta krese, nos por sinti tin biaha ku nos sa mas ku nos mayornan, pero esaki apsolutamente no ta bèrdat. Lo ta sabí pa skucha nan konseho.” ​—Devan, 20 aña.

 Pone bo den nan sapatu. Purba di wak e asuntu for di e punto di bista di bo mayornan. Sigui e konseho di Beibel pa “no buska bo mes interes so, ma tambe interes di otro hende”—den e kaso akí, e interes di bo mayornan.​—Filipensenan 2:4.

 “Mi tabatin kustumber di pensa ku mi mayornan ta kontra mi i no ta apoyá mi. Pero awor mi ta komprondé ku, eigenlijk, nan tabata siña kon nan por ta bon mayor, miéntras ku ami tabata siña kon pa bira un adulto responsabel. Tur loke nan a hasi tabata pasobra nan ta stima mi i tabata preokupá pa mi.”​—Joshua, 21 aña.

 Ofresé solushon. Por ehèmpel, suponé ku bo mayornan a pone e regla: nan no ke pa bo bai un fiesta ku ta kuminsá anochi lat. Purba di saka afó kiko ta nan preokupashon prinsipal. Ta e ora nan ta haña muchu lat òf ta e fiesta riba su mes?

•   Si e problema ta e ora lat, nan lo laga bo bai si tin un hende mas ta bai huntu ku bo?

•   Si ta e fiesta nan no ke pa bo bai, nan lo permití bo bai si bo bisa nan ken ta bai ta einan i ken lo supervisá e fiesta?

 Kòrda papia semper ku rèspèt i skucha ku pasenshi loke bo mayornan tin di bisa bo. Demostrá ku bo ta “onra bo tata i bo mama” ku echo i palabra. (Efesionan 6:​2, 3) Nan lo kambia di idea i laga bo bai? Kisas sí, kisas nò. Sea ku ta sí òf nò, hasi lo siguiente:

 Respetá desishon di bo mayornan. Esei ta un paso masha importante ku hopi hóben ta pasa por alto. Si bo kuminsá pleita ku bo mayornan pasobra bo no a haña loke bo tabata ke, lo bira mas difísil e siguiente biaha pa nan duna bo mas libertat. Di otro banda, si bo obedesé di buena gana, probablemente nan lo tene mas konsiderashon ku bo den futuro i duna bo mas libertat.