•  “Bo mihó i pió amigunan”

•  Dos motibu pa hasi pas

•  Loke otro hóbennan sa bisa

 Hende sa bisa ku bo rumannan por ta “bo mihó i pió amigunan.” Bo ta stima nan i nan ta stima bo, ma tin biaha boso djis no por bai ku otro. Helena di 18 aña ta bisa: “Mi ruman hòmber chikitu ta traha riba mi nèrvio. E sa presis kiko pa hasi pa saka mi fo’i mi kueru!”

 Tin biaha djis papia i yega na un akuerdo ta nesesario pa por solushoná algun di e konfliktonan ei. Por ehèmpel:

•   Dos ruman hòmber ku ta kompartí un kamber ku otro, por pleita tokante nan privasidat. Kiko por ta e solushon? Siña kon pa sede i duna e otro persona e espasio ku e mester. Apliká e prinsipio di Beibel ku tin na Lukas 6:31.

•   Dos ruman muhé por “fia” paña di otro sin puntra. Kiko por ta e solushon? Papia tokante e asuntu i pone límitenan rasonabel. Apliká e prinsipio di Beibel ku tin na 2 Timoteo 2:24.

 Den algun kaso, problema entre rumannan por ta mas serio i por tin konsekuensianan mas serio tambe. Laga nos wak dos ehèmpel for di Beibel:

•   Miriam ku Aron tabata yalurs riba nan ruman hòmber Moises i esei tabatin un resultado tristu. Lesa e relato na Numbernan 12:1-15. Awor, puntra bo mes: ‘Kon mi por evitá ku mi ta bira yalurs riba mi ruman?’

•   Kain su rabiá a yega te na e punto ku el a mata su ruman hòmber Abel. Lesa e relato na Génesis 4:1-12. Awor, puntra bo mes: ‘Kon mi por kontrolá mi rabia ora mi ta atendé ku mi ruman?’

 Sin importá kon difísil por ta pa ta na pas ku bo rumannan, tin por lo ménos dos motibu pakiko ta bale la pena pa hasi e esfuerso ei.

1.   Bo ta mustra ku bo ta madurá. Un hóben ku yama Alex ta bisa: “Mi tabatin e kustumber di rabia lihé ku mi dos rumannan muhé mas chikitu. Awor mi ta hopi mas trankil i mi tin mas pasenshi pa dil ku nan. Bo por bisa ku mi a krese i a madurá.”

    Beibel ta bisa: “Esun ku no ta rabia lihé tin gran komprondementu, ma esun ku ta rabia lihé ta halsa bobedat.”—Proverbionan 14:29, Beibel Santu.

2.   Bo ta prepará pa futuro. Si bo no por soportá e imperfekshonnan di bo rumannan, kon lo bo bai dil ku un kasá, un kolega di trabou, un doño di trabou òf kualke otro persona ku bo tin ku trata kuné?

    Echo ta ku pa bo por tin relashonnan ku ta bai bon den futuro, bo mester por komuniká i yega na un akuerdo. I no tin un mihó kaminda pa kultivá e abilidatnan ei ku den bo famia.

    Beibel ta bisa: ‘Te asina leu ku ta dependé di bo, keda na pas ku tur hende.’—Romanonan 12:18.

 Bo ke yudansa pa solushoná problema ku bo rumannan? Lesa “Loke Otro Hóbennan Sa Bisa” i tira un bista riba e blachi di tarea “Biba na Pas ku Mi Rumannan.”