Kos malu por pasa ku tur hende, asta ku hóbennan. Beibel ta bisa: “No ta semper esun ku ta kore mas lihé ta gana e kareda; no ta semper e ehérsito mas poderoso ta gana e bataya . . . Nan tur tin nan tempu bon i tempu malu.” (Eklesiástes 9:11, La Palabra de Dios para Todos) Kon abo por dil ku gòlpi di bida? Wak dos ehèmpel.

•  REBEKAH

•  CORDELL

 Mi mayornan a divorsiá ora mi tabatin 14 aña.

 M’a purba di konvensé mi mes ku no ta bèrdat ku mi mayornan ta bai divorsiá, ku mi tata djis tabatin mester di poko tempu pa su mes. E tabata stima mi mama; pakiko lo e bai lag’é? Pakiko lo e bai laga ami?

 Tabata difísil pa mi papia ku un hende tokante kiko tabata pasando. Mi no kier a ni pensa riba dje. Mi tabata rabiá, aunke ku e tempu ei mi no a realisá esei. Mi tabatin hopi strès, i mi tabata drumi malu.

 Ora mi tabatin 19 aña, mi mama a muri di kanser. E tabata mi mihó amiga.

 E divorsio di mi mayornan ya a dal mi hopi duru; pero ora mi mama a muri, mi mundu a kai den otro. Ainda mi no a pasa over di su morto. Awor mi tin mas problema ku drumimentu, i ainda mi tin hopi strès.

 Pero mi a haña tambe algun kos ku a yuda mi. Por ehèmpel, Proverbionan 18:1 ta spièrta nos pa no isolá nos mes. Pues mi ta purba di sigui e konseho akí.

 Komo un Testigu di Yehova, mi ta purba di lesa nos publikashonnan basá riba Beibel, i esei ta animá mi. Un di e bukinan ku a yuda mi ora ku mi mayornan a divorsiá tabata Loke Hóbennan Sa Puntra—Kontesta Práktiko. Te awe mi ta kòrda e kapítulo den Tomo 2 (disponibel na spañó) ku tabatin e tema “Mi Por Ta Felis Bibando ku un di Mi Mayornan So?”

 Un di mi tekstonan faborito pa trata ku strès ta Mateo 6:25-34. Na versíkulo 27, Hesus a puntra: “Kua di boso, ni maske kuantu e ansha, por rèk su bida un krenchi?”

 Tur hende ta pasa den kos malu, pero m’a siña di mi mama su ehèmpel ku ta e manera ku nos ta dil ku nan ta konta. El a pasa den hopi kos: un divorsio i despues un malesa mortal. Ma apesar di tur esei, el a keda ku un aktitut positivo i a mantené su fe den Dios te na final. Nunka lo mi lubidá tur loke ku el a siña mi tokante Yehova.

 Pa pensa ariba: Kon lesamentu di Beibel i di publikashonnan basá riba Beibel por yuda bo trata ku gòlpi di bida?—Salmo 94:19.

 Ora mi tabatin 17 aña, m’a mira mi tata hala su último rosea. E morto di mi tata tabata e kos di mas pió ku a yega di pasa den mi bida. Mi a keda hopi kibrá.

 Mi no por a kere ku mi tata a muri. Tabata komo si fuera no t’e tabata bou di e laken ku nan a tap’é kuné. M’a pensa den mi mes: ‘Mañan lo e lanta.’ M’a sinti un bashí; m’a sinti mi pèrdí.

 Ami ku mi famia ta Testigunan di Yehova, i nos kongregashon tabata un gran sosten ora ku mi tata a fayesé. Nan a duna nos di kome, nan a kompañá nos i nan a keda mustra interes. I esei no tabata na kuminsamentu so, sino pa basta tempu. Pa mi, esaki tabata un prueba ku Testigunan di Yehova ta e kristiannan berdadero.— Huan 13:35.

Un teksto ku a animá mi hopi ta 2 Korintionan 4:17, 18. E ta bisa:  “Aunke e tribulashon ku nos ta konfrontá ta leve i pa un tempu kòrtiku, e ta resultá pa nos den un gloria ku ta bira mas i mas grandi i ta eterno; miéntras ku nos ta fiha nos bista, no riba e kosnan ku hende ta mira, sino riba e kosnan ku hende no ta mira. Pasobra e kosnan ku hende ta mira ta temporal, ma e kosnan ku hende no ta mira ta eterno.”

 E último versíkulo ei a duna mi hopi forsa. Mi tata su sufrimentu tabata temporal, pero loke Dios a primintí pa futuro ta eterno. E morto di mi tata a pone mi pensa riba e manera ku mi tabata hiba mi bida i a yuda mi ahustá mi metanan.

 Pa pensa riba dje: Kon un tragedia personal por yuda bo reevaluá bo metanan den bida?—1 Huan 2:17.