E arka di pakto tabata un kaha sagrado ku e israelitanan di antigwedat a traha segun e mandamentu i diseño ku Dios a duna nan. Den dje tabatin “e testimonio,” es desir, e Dies Mandamentu skirbí riba dos tabla di piedra.—Éksodo 25:8-10, 16; 31:18, Beibel Santu.

•   Konstrukshon di e arka. E arka tabata dos kodo i mei largu, un kodo i mei hanchu i un kodo i mei haltu (111 x 67 x 67 cm). E tabata trahá di palu di akasia i tabata furá ku oro di paden i pafó i tabatin un rant di oro. Su tapa tabata trahá di oro puru i tabatin dos kerubin riba dje, un na kada punta. E kerubinnan tabata dilanti di otro ku nan kara pa e tapa i nan alanan habrí mandá ariba, asina kubriendo e tapa. E arka tabatin kuater renchi di oro na kada skina nèt riba su pianan. Nan a pasa bara di palu di akasia furá ku oro dor di e renchinan i a usa e baranan akí pa karga e arka.​—Éksodo 25:10-21; 37:6-9.

•   Sitio di e arka. Na promé instante, e arka tabata den un parti di e tabernakel ku yama e Lugá Santísimo. E tabernakel tabata un tènt di adorashon ku nan por a transportá i nan a trah’é na e mesun tempu ku nan a traha e arka. Un kortina a separá e Lugá Santísimo for di bista di e saserdotenan i e pueblo. (Éksodo 40:3, 21) Únikamente e sumo saserdote por a drenta den e Lugá Santísimo i wak e arka pero solamente ún bes pa aña, riba e Dia di Ekspiashon. (Levítiko 16:2; Hebreonan 9:7) Despues di tempu, e arka a bai den e Lugá Santísimo di e tèmpel di Sálomon.​—1 Reinan 6:14, 19.

•   Propósito di e arka. Den e arka tabatin sierto artíkulonan sagrado ku a kòrda e israelitanan di e pakto, òf akuerdo, ku Yehova a sera ku nan riba Seru Sinaí. Tambe e arka tabatin un funshon importante den e seremonia di e Dia di Ekspiashon.​—Levítiko 16:3, 13-17.

•   Kontenido di e arka. E promé kosnan ku tabatin den e arka tabata e tablanan di piedra ku e Dies Mandamentunan skirbí riba nan. (Éksodo 40:20) Despues nan a pone tambe un pòchi di oro ku mana aden i “e garoti di Aron ku a saka kònòpi di flor.” (Hebreonan 9:4; Éksodo 16:33, 34; Numbernan 17:10) Aparentemente, na un dado momento, nan a saka e pòchi i e garoti, pasobra nan no tabata den e arka ora el a bai den e tèmpel.​—1 Reinan 8:9.

•   Transportá e arka. E levitanan mester a karga e arka poniendo e baranan di palu di akasia riba nan skouder. (Numbernan 7:9; 1 Krónikanan 15:15) E baranan tabata pegá na e arka na tur momento, pues e levitanan no tabatin nodi di mishi ku e arka. (Éksodo 25:12-16) Ora nan tabata transportá e arka, “e velo di e skèrm” ku tabata separá e Lugá Santu for di e Lugá Santísimo a ser usá pa tapa e arka.—Numbernan 4:5, 6. a

•   Loke e arka a simbolisá. E arka tabata un símbolo di e presensia di Dios. Por ehèmpel, e nubia ku a aparesé riba e arka den e Lugá Santísimo i na e kampamentu di e israelitanan tabata un señal di e presensia di Yehova i su bendishon. (Levítiko 16:2; Numbernan 10:33-36) Tambe Beibel ta bisa ku Yehova “ta sinta ariba di e kerubinnan,” refiriendo na e dos kerubinnan ku tabatin riba e arka. (1 Samuel 4:4; Salmo 80:1, Beibel Santu) Pues, e kerubinnan akí tabata un representashon di “e garoshi” di Yehova. (1 Krónikanan 28:18, Beibel Santu) Despues ku e arka, komo símbolo di e presensia di Dios, a ser hibá Sion, Rei David por a skirbi ku Yehova tabata “biba na Sion.”—Salmo 9:11, Beibel Santu.

•   Nòmber pa e arka. Beibel ta usa diferente nòmber pa e kaha sagrado ei, inkluso “e arka di testimonio,” “e arka di aliansa,” “e arka di SEÑOR” i ‘e arka di Yehova su fortalesa.’—Numbernan 7:89; Hosue 3:6, 13; 2 Krónikanan 6:41, Beibel Santu.

   E tapa di e arka tabata ser yamá “e propisiatorio.” (1 Krónikanan 28:11, Beibel Santu) E nòmber ei ta referí na e funshon spesial di e tapa riba e Dia di Ekspiashon, ora ku e sumo saserdote di Israel sprengu sanger di e bestia di sakrifisio riba i dilanti di e tapa. Loke ku e sumo saserdote a hasi, ta kubri piká di “su mes,” “e hendenan di su kas” i di “henter e kongregashon di Israel.”—Levítiko 16:14-17, Beibel Santu.

E arka di pakto ta eksistí ainda?

 No tin niun prueba ku e ta eksistí ainda. Beibel ta mustra ku e arka no ta nesesario mas pasobra e pakto ku ta asosiá kuné a ser remplasá ku “un pakto nobo” ku ta basá riba e sakrifisio di Hesus. (Yeremías 31:31-33, Beibel Santu; Hebreonan 8:13; 12:24) Tambe Beibel a profetisá di un tempu den kua e arka di pakto lo no t’ei mas i e pueblo di Dios lo no sinti su falta.​—Yeremías 3:16.

 Den un vishon ku apòstel Huan a haña despues ku e pakto nobo a ser establesí, e arka di pakto a aparesé den shelu. (Revelashon 11:15, 19) E arka simbóliko akí ta representá e presensia di Dios i su bendishon riba e pakto nobo.

E arka tabatin poder sobrenatural?

 Nò. Presensia di e arka di pakto no tabata un garantia pa éksito. Por ehèmpel, e israelitanan tabatin e arka den nan kampamentu ora ku nan a bai bringa kontra e stat di Ai, pero tòg nan a pèrdè pasobra un di e israelitanan no tabata fiel. (Hosue 7:1-6) Despues e filisteonan a derotá e israelitanan aunke ku nan a bai ku e arka di pakto den bataya. E derota ei tabata pa motibu di e maldat di e saserdotenan israelita, Ofni ku Fínehas. (1 Samuel 2:12; 4:1-11) E filisteonan a kapturá e arka den e bataya ei, pero Dios a dal nan ku plaga te ora ku nan a hiba e arka bèk na Israel.​—1 Samuel 5:11–6:5.