Beibel Ta Apoyá Tradishon Relashoná ku Pasku di Resurekshon?

TOKA NA

E kontesta ku Beibel ta duna

E tradishonnan relashoná ku e fiesta di Pasku di Resurekshon no ta basá riba Beibel. Mas bien, historia ta demostrá ku e tradishonnan relashoná ku e fiesta ei ta basá riba rito antiguo di fertilidat. Laga nos wak algun di nan:

Nòmber: Segun Encyclopædia Britannica, orígen di e nòmber ingles Easter pa Pasku di Resurekshon no ta konosí; e ta derivá for di e nòmber Eostre, ku ta e diosa anglosahon di ourora i lènte [primavera]. Otro buki di referensia ta konekt’é tambe ku Astarte, e diosa di fertilidat di Fenisia ku na Babilonia tabata konosí komo Ishtar.
Konènchi: E Catholic Encyclopedia ta bisa ku “konènchi ta un símbolo pagano i semper tabata un símbolo di fertilidat.”
Webu di Pasku: Segun Funk & Wagnalls Standard Dictionary of Folklore, Mythology and Legend, e tradishon di buska webu di Pasku ku supuestamente e konènchi di Pasku ta trese “no ta djis un wega inosente di mucha, sino parti di un rito di fertilidat.” Hende di algun kultura tabata kere ku webu dekorá di Pasku “tabatin poder mágiko i por a trese felisidat, prosperidat, salú i protekshon.”—Traditional Festivals.
Paña nobo pa Pasku: Awe hende tin kustumber di bisti paña nobo riba dia di Pasku. Segun The Giant Book of Superstitions, “tabata un falta di rèspèt ku ta trese mala suerte pa saludá e diosa di Primavera, òf Eastre, di Skandinavia sin paña nobo bistí.”
Misa di ourora: Esaki tin di haber ku rito i seremonia di hende ku den pasado tabata adorá solo “durante e ‘equinox’ di lènte pa yama bon biní na solo i na su poder di duna bida nobo na tur kos bibiente.”—Celebrations—The Complete Book of American Holidays.

E obra The American Book of Days ta bisa lo siguiente tokante e orígen di Pasku di Resurekshon: “No tin duda ku na prinsipio, Iglesia di ántes a adoptá tradishon pagano antiguo i a duna nan un nifikashon kristian.”

Beibel ta instruí nos pa no adorá Dios mediante tradishon i kustumber ku e no ta aprobá. (Marko 7:6-8) Na 2 Korintionan 6:17, Beibel ta bisa: “‘Separá boso,’ Yehova ta bisa, ‘i stòp di mishi ku loke ta impuru.’” Pues, Pasku di Resurekshon, òf Easter, ta un dia di fiesta pagano ku nos mester evitá si nos ke agradá Dios.