“E buki di bida,” ku ta ser yamá tambe “e buki di memoria,” ta kontené nòmber di hende ku ta bini na remarke pa haña bida eterno. (Revelashon 3:5; 20:12; Malakías 3:16, Beibel Santu) Den e buki akí Dios ta skirbi únikamente nòmber di hende ku ta obediente na dje.—Huan 3:16; 1 Huan 5:3.

 Dios tin tur su fiel sirbidónan den su memoria; ta komo si fuera e tin nan nòmber skirbí den un buki “desde ku a funda mundu.” (Revelashon 17:8) Abel, un hòmber fiel, aparentemente tabata e promé persona kende su nòmber a ser skirbí den e buki di bida. (Hebreonan 11:4) Ma no ta trata akí di djis un lista di nòmber sin ningun nifikashon; esnan ku ta skirbí den dje ta hende ku nos Kreador amoroso “konosé” i “ku ta pertenesé na dje.”—2 Timoteo 2:19; 1 Huan 4:8.

Dios por skrap un nòmber for di “e buki di bida”?

 Sí. Dios a bisa hende desobediente di e nashon antiguo di Israel: “Esnan ku a peka kontra Mi, Mi ta skrap for di den mi buki.” (Éksodo 32:33, Beibel na papiamentu koriente) Pero si nos keda fiel na dje, nos nòmber lo keda skirbí den “e buki di bida.”—Revelashon 20:12.