E israelitanan di pasado mester a duna diesmo, a esta, 10 porshento òf un désimo parti di nan entrada anual komo parti di nan kontribushon pa sostené adorashon berdadero. Dios a bisa nan: “Bo mester duna e diesmo [“un désimo parti,” Beibel na papiamentu koriente] di henter e produkshon di loke bo ta sembra, loke kunuku ta produsí tur aña.”—Deuteronomio 14:22.

 E mandamentu pa duna diesmo tabata parti di Lei di Moises, esta, e leinan ku Dios a duna e nashon di Israel di antigwedat. Hende kristian no ta bou di Lei di Moises, pues nan no ta obligá di duna diesmo. (Kolosensenan 2:13, 14) Mas bien, kada kristian por kontribuí finansieramente “manera el a disidí den su kurason, no di mala gana, ni fòrsá, pasobra Dios ta stima hende ku ta duna ku alegria.”—2 Korintionan 9:7.

• Diesmo den “Tèstamènt Bieu”

• Diesmo den “Tèstamènt Nobo”

 E parti di Beibel konosí komo Tèstamènt Bieu ta menshoná dunamentu di diesmo vários biaha. Den mayoria di kaso, ta trata di e periodo despues ku Dios, via Moises, a duna vários lei (yamá Lei di Moises) na e israelitanan. Pero den e periodo promé ku esei tambe Beibel ta papia algun biaha di diesmo.

Promé ku Lei di Moises

 Abram (Abraham) tabata e promé persona ku Beibel ta menshoná ku a duna diesmo. (Génesis 14:18-20; Hebreonan 7:4) Parse ku ta un biaha so Abram a duna diesmo komo regalo na e rei i saserdote di Salèm. No tin niun prueba den Beibel ku Abraham òf su yunan a bolbe duna diesmo.

 Yakòb, Abraham su ñetu, tabata e di dos persona ku Beibel ta menshoná ku a duna diesmo. Yakòb a primintí Dios ku si Dios bendishon’é, lo el a duna Dios “un désimo parti” di tur loke e risibí. (Génesis 28:20-22) Segun algun eksperto di Beibel, Yakòb probablemente a duna su diesmo den forma di sakrifisio di bestia. Aunke Yakòb a kumpli ku e promesa ei, e no a obligá su famia pa duna diesmo.

Durante e Periodo di Lei di Moises

 E israelitanan mester a duna diesmo pa sostené e aktividatnan religioso di e nashon.

•   E diesmo a ser usá pa sostené e sirbidónan di Dios ku tabata kompletamente dediká na trabou religioso i ku no tabatin nan mes tereno pa kultivá. Esei tabata e kaso ku e levitanan, inkluso e saserdotenan. (Numbernan 18:20, 21) E levitanan ku no tabata saserdote a risibí diesmo for di e pueblo, i for di e diesmo ei, nan a duna un désimo parti na e saserdotenan.—Numbernan 18:26-29.

•   Parse ku tur aña, e pueblo mester a duna un di dos diesmo, i esaki a benefisiá tantu e levitanan komo hende ku no tabata levita. (Deuteronomio 14:22, 23) E famianan israelita a usa e diesmo ei pa algun fiesta spesial, i tabatin sierto aña ku nan a kompartí e diesmo ei ku hende masha pober.—Deuteronomio 14:28, 29; 26:12.

 Kon tabata kalkulá diesmo? E israelitanan tabata apartá un désimo parti di tur loke nan tera a produsí durante un aña. (Levítiko 27:30) Si nan a skohe pa duna e diesmo ei den forma di plaka en bes di kosecha, nan mester a paga 12 porshento en bes di 10 porshento. (Levítiko 27:31) Ademas, nan mester a duna un désimo parti di nan tou di bestia.”—Levítiko 27:32.

 Pa kalkulá e diesmo di nan tou, e israelitanan tabata skohe un di kada dies bestia ku sali for di nan kurá. Lei di Moises tabata bisa ku e pueblo no tabatin mag di inspekshoná ni kambia e bestianan ei, ni duna e diesmo ei den forma di plaka en bes di bestia. (Levítiko 27:32, 33) Pero e di dos diesmo ku nan a usa pa e fiestanan anual sí nan por a duna den forma di plaka. E areglo ei tabata mas práktiko pa e israelitanan ku mester a biaha distansia largu pa bai e fiestanan.—Deuteronomio 14:25, 26.

 Ki ora e Israelitanan tabata duna diesmo? E israelitanan tabata duna diesmo tur aña. (Deuteronomio 14:22) Pero kada shete aña tabata hasi un eksepshon. E di shete aña ei tabata un sabat, òf aña di sosiegu, i e israelitanan no tabata planta nada. (Levítiko 25:4, 5) Debí na e sirkunstansia spesial ei, no tabata rekohé diesmo durante temporada di kosecha. Ademas, tur di tres i di seis aña di e siklo di shete aña, e israelitanan tabata duna hende pober i e levitanan e di dos diesmo.—Deuteronomio 14:28, 29.

 Kiko tabata e kastigu si un hende no a duna diesmo? Den Lei di Moises no tabatin kastigu pa hende ku no a duna diesmo. Dunamentu di diesmo tabata un deber moral, es desir, e israelitanan tabata duna diesmo pasobra esei tabata e kos korekto pa hasi i no pasobra tabatin un kastigu mará na dje. Nan mester a bisa dilanti di Dios ku nan a duna nan diesmo i pidi Dios bendishoná nan pa esei. (Deuteronomio 26:12-15) Den bista di Dios, keda sin duna diesmo tabata komo si fuera hòrta for di Dios.—Malakías 3:8, 9.

 Diesmo tabata un karga muchu pisá? Nò. Dios a primintí e nashon ku si nan a duna nan diesmo, lo el a bendishoná nan i nan lo no tabatin falta di nada. (Malakías 3:10) Di otro banda, e nashon a sufri ora nan a keda sin duna diesmo. Nan a pèrdè Dios su bendishon. Ademas, e saserdotenan i e levitanan mester a dediká tempu na traha pa mantené nan mes i no por a yuda e israelitanan adorá Dios.—Nehemías 13:10; Malakías 3:7.

 Durante Hesus su bida komo hende, ainda dunamentu di diesmo tabata un rekisito pa e sirbidónan di Dios. Pero despues di Hesus su morto, esei no tabata un rekisito mas.

Den tempu di Hesus

 E parti di Beibel konosí komo Tèstamènt Nobo ta mustra ku e israelitanan a sigui duna diesmo tempu ku Hesus tabata riba tera. Hesus a rekonosé ku nan mester a duna diesmo. Sinembargo, el a kondená e lidernan religioso, pasobra nan tabata masha estrikto ora di duna diesmo pero a “neglishá e asuntunan di mas peso di Lei, esta, hustisia, miserikòrdia i fieldat.”—Mateo 23:23.

Despues di Hesus su morto

 Despues ku Hesus a sakrifiká su bida, hende no tabata obligá di duna diesmo. E morto di Hesus a anulá Lei di Moises, i esei a inkluí e mandamentu pa “kolektá diesmo.”—Hebreonan 7:5, 18; Efesionan 2:13-15; Kolosensenan 2:13, 14.