Si, Beibel ta duna prueba palpabel ku Dios ta eksistí. E ta animá nos pa kultivá fe den Dios, no pa kere siegamente den kreensianan religioso, sino, mas bien, pa usa nos “kapasidat di pensa” i “kapasidat mental.” (Romanonan 12:1; 1 Huan 5:20, nota) Laga nos analisá e siguiente puntonan ku ta basá riba Beibel:

•   E echo ku den universo tin bida i ku e ta asina bon organisá ta demostrá ku tin un Kreador. Beibel ta bisa: “Naturalmente, ta hende a traha tur kas, ma esun ku a traha tur kos ta Dios.” (Hebreonan 3:4) Maske e rasonamentu akí ta simpel, hopi hende bon siña ta hañ’é konvinsente. a

•   Hende tin e deseo natural di buska un propósito den bida, un tipo di hamber ku si nos no satisfas’é ta laga un bashí atras. E hamber akí ta loke Beibel ta yama nos “nesesidat spiritual,” ku ta inkluí e deseo di konosé i adorá Dios. (Mateo 5:3; Revelashon 4:11) E nesesidat spiritual akí ta demostrá ku tin un Dios di amor ku a krea nos i ku ke pa nos satisfasé e nesesidat ei.—Mateo 4:4.

•   Den Beibel tin profesia ku a ser skirbí siglonan promé i ku a kumpli den tur detaye. E echo ku e profesianan akí tabata asina eksakto ta demostrá ku nan no a originá for di hende, sino di un forsa sobrehumano.—2 Pedro 1:21.

•   Eskritornan di Beibel tabatin konosementu sientífiko ku tabata hopi mas avansá kompará ku esun di hende di e tempu ei. Por ehèmpel, den pasado hopi hende tabata kere ku un olefante, porko òf toro tabata karga tera. Na kontraste, Beibel ta bisa ku Dios “ta kologá tera riba nada.” (Yòb 26:7) Ademas, ora Beibel ta deskribí e forma di tera, e ta usa e palabra “sírkulo,” òf “globo,” pa duna di konosé ku tera ta rondó. (Isaías 40:22; Beibel Santu) Hopi hende ta pensa ku e splikashon mas lógiko ta ku e eskritornan di Beibel a haña e informashonnan ei for di Dios.

•   Beibel ta kontestá hopi pregunta difísil. Ora hende no haña kontesta riba e tipo di preguntanan akí, nan por pensa ku Dios no ta eksistí. Por ehèmpel: Si Dios ta amor i todopoderoso, dikon tin tantu sufrimentu i maldat na mundu? Dikon religion ta kousa asina tantu problema?—Tito 1:16.