Beibel no ta papia spesífikamente tokante eutanasia. a Pero loke Beibel ta bisa tokante bida i morto ta yuda nos tin un bista balansá. Beibel ta bisa ku ta malu pa pone fin na un bida, pero esei no ta nifiká ku mester sigui medidanan ekstremo pa alargá bida.

 Beibel ta bisa ku Dios ta nos Kreador, “e fuente di bida.” (Salmo 36:9, Beibel Santu; Echonan 17:28) Pa Dios bida ta masha presioso. P’esei, Dios ta kondená hende ku ta pone fin na tantu bida di un otro hende komo esun di su mes. (Éksodo 20:13; 1 Huan 3:15) Ademas, Beibel ta bisa ku nos mester tuma medida di prekoushon rasonabel pa protehá nos bida i di otronan. (Deuteronomio 22:8) Ta bon kla anto ku Dios ke pa nos balorá e regalo di bida.

Kiko si un hende tin un malesa terminal?

 Beibel no ta aprobá pa pone fin na un hende su bida aunke e tin un malesa inkurabel i ta serka di muri. Pensa riba e ehèmpel di Rei Saul di Israel. Ora e tabata gravemente heridá den un bataya, el a pidi su kargadó di arma pa pone un fin na su bida. (1 Samuel 31:3, 4) E kargadó di arma a nenga. Sinembargo, despues un hòmber a gaña ku e sí a kumpli ku Saul su deseo. David, kende tabata un persona ku a konsiderá e asuntu for di Dios su punto di bista, a kondená e hòmber akí pa dramamentu di sanger.​—2 Samuel 1:6-16.

Mester alargá bida kueste loke kueste?

 Ora ta bisto ku un hende ta bai muri, Beibel no ta bisa ku mester alargá e proseso. Mas bien, Beibel ta duna nos un bista balansá. Morto ta nos gran enemigu, e resultado di nos kondishon pekaminoso. (Romanonan 5:12; 1 Korintionan 15:26) Aunke nos niun no ke muri, nos no mester tin miedu di morto pasobra Dios ta primintí di resusitá e hendenan ku muri. (Huan 6:39, 40) Si nos ta mustra rèspèt pa bida, nos lo buska e mihó yudansa médiko disponibel. Pero, esei no ta nifiká ku nos mester skohe proseduranan médiko ku ta djis alargá un hende su bida ora ya ta bisto kaba ku e ta den su fase terminal.

Suisidio ta un piká imperdonabel?

 No, Beibel no ta menshoná suisidio ora e ta papia di pikánan imperdonabel. Aunke pone fin na bo propio bida ta un piká serio, b Dios ta komprondé kompletamente ku por tin faktornan manera problema mental, hopi strès i asta karakterístikanan genétiko ku por hiba na e deseo di kometé suisidio. (Salmo 103:13, 14) Mediante Beibel, Dios ta konsolá hende ku ta pasa den tempu difísil. Ademas, Beibel ta primintí ku “lo bai tin un resurekshon di tantu hende hustu komo inhustu.” (Echonan 24:15) Esaki ta mustra ku tin un speransa di resurekshon pa hende ku a hasi foutnan serio, manera kometé suisidio.