Wak e siguiente sugerensianan práktiko basá riba e konsehonan sabí di Beibel:

1.   Sea profeshonal. Sea amigabel i respetuoso ku bo koleganan di trabou. Pero evitá di bira muchu familiar pa bo no duna e impreshon ku bo ta habrí pa nan avansenan inmoral.—Mateo 10:16; Kolosensenan 4:6.

2.   Bisti na un manera desente. Bistí provokativo ta duna un mal impreshon. Beibel ta bisa nos pa bisti “ku modestia i sano huisio.”—1 Timoteo 2:9.

3.   Skohe bon amigu. Si bo ta anda ku hende ku ta gusta flirt, e chèns ta grandi ku un dia nan lo purba ku bo tambe.—Proverbionan 13:20.

4.   Rechasá kòmbersashon vulgar. Hala kita ora un kòmbersashon bai den direkshon di ‘papiamentu di disparate òf chansanan vulgar.’—Efesionan 5:4.

5.   Evitá situashon ku por hinka bo den problema. Por ehèmpel, no aseptá pa keda despues di ora di trabou sin un bon motibu.—Proverbionan 22:3.

6.   Sea firme i direkto. Si un hende ta intimidá bo seksualmente, lag’é sa bon kla ku bo no ta aseptá su komportashon. (1 Korintionan 14:9) Por ehèmpel, bo por bisa: “Mi ta ripará ku bo ta mishi hopi ku mi i mi no ta gusta esei. Stòp ku e kos ei.” Bo por skirbi e persona un karta pa splik’é kiko a pasa, kon bo a sinti bo i ku bo no ke pa esei sosodé nunka mas. Bis’é ku bo posishon ta basá riba bo konvikshonnan moral i religioso.—1 Tesalonisensenan 4:3-5.

7.   Buska yudansa. Si e intimidashon sigui, papia ku un hende ku bo ta konfia manera un amigu, famia, kolega di trabou òf un hende ku tin eksperensia den yuda víktima. (Proverbionan 27:9) Hopi víktima di intimidashon seksual a haña sosten pa medio di orashon. Asta si bo no a yega di hasi orashon nunka, no balotá e yudansa ku bo por haña serka Yehova, e “Dios di tur konsuelo.”—2 Korintionan 1:3.

 Intimidashon seksual ta krea hopi tenshon na trabou pa miónes di hende, pero Beibel por duna yudansa práktiko!