Ken Ta Yehova?
E kontesta ku Beibel ta duna
Segun Beibel, Yehova ta e Dios berdadero, e Kreador di tur kos. (Revelashon 4:11) E profetanan Abraham, Moises i Hesus mes tambe a adorá Yehova. (Génesis 24:27; Éksodo 15:1, 2; Huan 20:17) E ta Dios di “henter mundu”, no di ún pueblo so.—Salmo 47:2.
Beibel ta bisa ku Yehova ta e nòmber personal úniko di Dios. (Éksodo 3:15; Salmo 83:18) E ta bini di un verbo hebreo ku ta nifiká “bira,” i vários eksperto ta sugerí ku e nòmber ta nifiká “E Ta Kousa pa Bira.” E nifikashon ei ta yuda nos komprondé ku Yehova ta Esun ku a krea tur kos i ora e bisa algu, no tin ningun persona ku por strob’é. (Isaías 55:10, 11) Beibel tambe ta yuda nos komprondé ken e Persona tras di e nòmber Yehova ta, spesialmente su kualidat dominante ku ta amor.—Éksodo 34:5-7; Lukas 6:35; 1 Huan 4:8.
E nòmber Yehova ta un tradukshon na papiamentu di e nòmber hebreo pa Dios—e kuater lèternan יהוה (YHWH), mihó konosí komo e Tetragrámaton. Ningun hende no sa presis kon nan tabata pronunsiá e nòmber divino akí na hebreo. Sinembargo, e forma “Yehova” tin un historia largu den e idioma ingles, kual a aparesé pa promé biaha den e tradukshon di William Tyndale’s Bible di aña 1530. a
Dikon e pronunsiashon di e nòmber di Dios den e hebreo di antigwedat ta deskonosí?
Nan tabata skirbi e hebreo di antigwedat ku konsonante so, sin vokal. E hendenan ku tabata por a lesa hebreo mes por a pone e vokalnan nesesario fásilmente. Sinembargo, despues ku nan a kaba di skirbi e Skritura Hebreo (“Tèstamènt Bieu”), algun hudiu a sigui e kreensia di superstishon ku ta malu pa pronunsiá Dios su nòmber personal. Ora di lesa un teksto na bos haltu ku ta kontené e nòmber di Dios, nan tabata kambia esaki pa ekspreshonnan manera “Señor” òf “Dios.” Segun ku siglonan tabata pasa, e superstishon akí a plama i ku tempu e pronunsiashon antiguo a bai pèrdí. b
Tin hende ta pensa ku e nòmber divino tabata wòrdu pronunsiá komo “Yahweh,” miéntras otronan ta sugerí otro posibilidatnan. Nan a haña un Ròl di Laman Morto ku tin un pida di e buki di Levítiko ku e nòmber lao skirbí na griego. Eskritornan griego di antigwedat ta sugerí e pronunsiashonnan Iae, I·a·be, i I·a·ou·e, pero no tin prueba ku niun di esakinan ta e pronunsiashon ku hende a usa den hebreo di antigwedat. c
Ideanan robes tokante e nòmber di Dios den Beibel
Idea robes: Tradukshonnan ku ta usa e nòmber “Yehova” a añadí e nòmber akí.
Echo: E palabra hebreo pa e nòmber di Dios den e forma di Tetragrámaton ta aparesé mas o ménos 7.000 biaha den Beibel. d Mayoria di tradukshon sin niun base a kita e nòmber di Dios i a remplasá esaki ku un título manera “Señor.”
Idea robes: Dios Todopoderoso no mester di un nòmber úniko.
Echo: Dios mes a inspirá eskritornan di Beibel pa usa su nòmber míles di biaha i e ta manda esnan ku ta ador’é pa usa su nòmber. (Isaías 42:8; Yoël 2:32; Malakías 3:16; Romanonan 10:13) De echo, Dios a kondená profeta falsu ku a purba laga hende lubidá su nòmber.—Yeremías 23:27.
Idea robes: Si nos sigui e tradishon hudiu, e nòmber di Dios mester ser kitá for di Beibel.
Echo: Ta bèrdat ku sierto eskribanan hudiu a nenga di pronunsiá e nòmber divino. Sinembargo, nan no a kit’é for di nan kopianan di Beibel. En todo kaso, Dios no ke pa nos sigui tradishonnan di hende ku ta desviá for di su mandamentunan.—Mateo 15:1-3.
Idea robes: E nòmber divino no mester ser usá den Beibel pasobra nos no sa presis kon pa pronunsi’é na hebreo.
Echo: E rasonamentu akí ta asumí ku Dios ta ferwagt di hende ku ta papia diferente idioma pa pronunsiá su nòmber na e mesun manera. Pero Beibel ta bisa ku Dios su sirbidónan di pasado ku a papia diferente idioma a pronunsiá e nòmber korekto na diferente manera.
Laga nos wak un ehèmpel: e hues israelita Hosue. E kristiannan di promé siglo ku a papia hebreo kasi sigur a pronunsiá su nòmber Yehoh·shuaʽ, miéntras ku esnan ku a papia griego lo a bisa I·e·sous. Den Beibel nos ta haña e tradukshon di e nòmber hebreo di Hosue, lokual ta mustra ku kristiannan a sigui e manera di usa forma di nòmber korekto ku tabata komun den nan idioma.—Echonan 7:45; Hebreonan 4:8.
E mesun prinsipio por ser apliká ora ta tradusí e nòmber divino. Ta mas importante pa e nòmber di Dios haña su lugá korekto bèk den Beibel ku e pronunsiashon eksakto di e nòmber ei.
a Tyndale a usa e forma “Iehouah” den su tradukshon di e promé sinku bukinan di Beibel. Ku tempu, e idioma ingles a kambia i nan a modernisá e ortografia di e nòmber divino. Por ehèmpel, na aña 1612 Henry Ainsworth a usa e forma “Iehovah” den henter su tradukshon di e buki di Salmonan. Ora el a revisá e tradukshon ei na aña 1639, el a usa e forma “Yehova.” Meskos, e traduktornan di e American Standard Version di e Beibel, publiká na aña 1901, a usa e forma “Yehova” kaminda e nòmber di Dios ta aparesé den e teksto hebreo.
b E New Catholic Encyclopedia, di dos edishon, Tomo 14, página 883-884, ta bisa: “Algun tempu despues di e fin di eksilio, nan a kuminsá konsiderá e nòmber Yahweh ku un rèspèt spesial i nan a kuminsá supstituí e nòmber pa e palabra ADONAI òf ELOHIM.”
c Pa mas informashon, wak apèndiks 1, “E Nòmber di Dios ( יהוה ) den e Skritura Griego (Ku 12 Fragmento Ku Ta Apoyá Esei),” den e Tradukshon di Mundu Nobo di e Skritura Griego Kristian.
d Wak e Theological Lexicon of the Old Testament, Volúmen 2, página 523-524
Otro Artíkulo Interesante
SIÑANSA DI BEIBEL
Dios Tin un Nòmber?
Dios tin hopi título, manera Todopoderoso, Kreador i Señor. Pero e nòmber personal di Dios ta aparesé mas ku 7.000 biaha den Beibel.
E TOREN DI VIGILANSIA
Ken Dios Ta?
Siña konosé Dios ta e promé kos ku bo mester hasi pa bira Dios su amigu. Kon bo por siña konosé Dios?
PREGUNTA KU BEIBEL TA KONTESTÁ
Kuantu Nòmber Dios Tin?
Kisas hende ta pensa ku Dios su nòmbernan ta inkluí ‘Alah,’ ‘e Alfa i e Omega,’ ‘El Shaddaí,’ i ‘Yehova-Jireh.’ Ta importá ki nòmber nos ta usa pa Dios?
SIÑANSA DI BEIBEL
Nos Ta Animá Bo pa Sigui un Kurso di Beibel ku Nos
Sigui un kurso di Beibel interaktivo grátis ku un maestro.