Beibel no ta menshoná pornografia, cybersex òf otro tipo di práktikanan asina spesífikamente. Sinembargo, Beibel ta mustra bon kla kiko Dios ta pensa di relashon seksual entre hende ku no ta kasá i tambe e punto di bista robes tokante sèks. Wak e siguiente tekstonan di Beibel:

•   ‘Mata e inklinashonnan di boso kurpa pa loke ta fornikashon, impuresa i pashon.’ (Kolosensenan 3:5) En bes di mata, esta, dominá e mal deseonan ei, wakmentu di pornografia ta stimulá nan. E ta hasi un persona bira impuru den bista di Dios.

•   “Ken ku sigui wak un muhé ku pashon, ya kaba a kometé adulterio kuné den su kurason.” (Mateo 5:28) Ora un hende ta wak imágen di aktonan seksual inmoral, esei por lanta mal pensamentu i pon’é bai hasi nèt e kosnan ei.

•   “No menshoná fornikashon ni ningun sorto di impuresa ni golosidat mes meimei di boso.” (Efesionan 5:3) Pues, si no ta bon pa papia tokante kosnan inmoral, e ora ei nos no mester wak ni lesa e kosnan ei tampoko.

•   “E obranan di karni ta bisto, i nan ta fornikashon, impuresa, . . . i kosnan por estilo. Mi ta spièrta boso di antemano tokante e kosnan akí, manera mi a spièrta boso kaba, ku esnan ku ta praktiká e tipo di kosnan ei lo no risibí e Reino di Dios.” (Galationan 5:19-21) Dios ta konsiderá hende ku ta wak pornografia òf praktiká cybersex, sèks via telefòn òf sexting moralmente impuru. Si nos ta praktiká e kosnan akí, nos por pèrdè Dios su aprobashon kompletamente.