Sí! Beibel ta bini di “Dios, kende ta konsolá esnan ku ta deprimí.” (2 Korintionan 7:6) Aunke Beibel no ta un buki tokante salú mental, el a yuda hopi hende stòp di pensa tokante suisidio. Beibel su konseho práktiko por yuda bo tambe.

•  Ki konseho práktiko Beibel ta duna?

•  Beibel ta papia tokante hende ku no kier a biba mas?

•  Ki teksto di Beibel por yuda bo lucha kontra pensamentu di suisidio?

•  Kiko nos por hasi si un amigu bisa: “Mi no ke biba mas”?

•  Kiko si ántes mi a purba di kaba ku mi bida?

• ● Papia tokante bo sintimentunan.

   Loke Beibel ta bisa: “Un amigu ta stima tur ora bai, i un ruman ta nasí pa tempu di atversidat.”—Proverbionan 17:17.

   Loke esaki ta enserá: Nos mester di e yudansa di otro hende ora nos tin sintimentunan negativo ku ta angustiá nos.

   Si bo tene bo pensamentunan pa bo so, bo ta karga un peso ku por bira insoportabel. Pero si bo papia ku otro hende tokante bo sintimentunan, bo por kuminsá sinti bo mas mihó i mira bo situashon na un manera mas positivo.

   Loke bo por hasi: Papia ku un hende awe, kisas un famia òf un bon amigu. a Un otro manera ku bo por ekspresá bo mes ta di skirbi loke bo ta sinti.

• ● Buska yudansa profeshonal.

   Loke Beibel ta bisa: “Hende bon di salú no tin mester di dòkter, ma hende malu sí.”—Mateo 9:12.

   Loke esaki ta enserá: Nos mester buska yudansa médiko ora nos ta malu.

   Pensamentu pa kometé suisidio por ta un indikashon di malesa mental òf emoshonal. Meskos ku malesa físiko, bo no mester tin bèrgwensa. Bo por haña yudansa pa trata ku malesa mental i emoshonal.

   Loke bo por hasi: Buska yudansa di un dòkter spesialisá mas pronto posibel.

• ● Kòrda ku Dios ta interesá den bo.

   Loke Beibel ta bisa: “No ta pa dos sèn pretu nan ta bende sinku mòfi? Tòg Dios no ta lubidá ni un di nan. . . . Pues, no tene miedu; boso ta bal mas ku hopi mòfi.”—Lukas 12:6, 7.

   Loke esaki ta enserá: Bo ta balioso pa Dios.

   Kisas bo por sinti ku bo ta bo so, pero Dios ta komprondé loke bo ta pasando aden. Dios ta interesá den bo—asta si bo a pèrdè gana di biba. Salmo 51:17 ta bisa: “Un kurason arepentí i kibrá, o Dios, bo no ta despresiá.” Dios ke pa bo biba pasobra e ta stima bo.

   Loke bo por hasi: Analisá prueba den Beibel ku ta mustra ku Dios ta stima bo. Por ehèmpel, wak kapítulo 24 di e buki Hala Serka Yehova.

• ● Resa na Dios.

   Loke Beibel ta bisa: “Tira tur boso inkietut riba dje, pasobra e ta interesá den boso.”—1 Pedro 5:7.

   Loke esaki ta enserá: Dios ke pa bo kont’é tur loke bo ta pensa i sinti di kurason.

   Dios por duna bo tantu e pas mental komo e forsa pa trata ku e situashon. (Filipensenan 4:6, 7, 13) Di e manera akí, Dios ta sostené e persona ku ta sklama na dje den orashon pa yudansa.—Salmo 55:22.

   Loke bo por hasi: Resa na Dios awe. Menshoná su nòmber, Yehova, i bis’é loke bo ta sinti. (Salmo 83:18) Pidi Dios yuda bo sigui pa dilanti.

• ● Meditá riba e speransa di Beibel pa futuro.

   Loke Beibel ta bisa: “Nos tin e speransa akí manera un anker pa nos alma; e ta sigur i tambe firme.”—Hebreonan 6:19.

   Loke esaki ta enserá: Bo sintimentunan por varia mashá, manera un tormenta ta suta un barku, pero e speransa ku Beibel ta duna por yuda bo keda stabil.

   E speransa ei no ta un fantasia pero ta basá riba Dios su promesa pa kaba ku tur loke ta kousa nos doló.—Revelashon 21:4.

   Loke bo por hasi: Bo por siña mas tokante e speransa den Beibel ora bo lesa lès 5 di e foyeto Dios Tin Bon Notisia pa Nos!

• ● Hasi algu ku bo ta gusta.

   Loke Beibel ta bisa: “Un kurason kontentu ta un bon remedi.”—Proverbionan 17:22.

   Loke esaki ta enserá: Ora nos hasi kos ku ta duna nos goso, nos lo mehorá nos salú mental i emoshonal.

   Loke bo por hasi: Hasi algu ku bo ta gusta. Por ehèmpel, skucha músika edifikante, lesa algu ku ta animá bo, òf kuminsá ku un hòbi. Lo bo ta mas felis ora bo hasi algu pa yuda otro hende, asta ku algu simpel.—Echonan 20:35.

• ● Kuida bo salú físiko.

   Loke Beibel ta bisa: “Entrenamentu físiko ta yuda.”—1 Timoteo 4:8.

   Loke esaki ta enserá: Nos ta saka benefisio ora nos hasi ehersisio, drumi sufisiente i kome kuminda saludabel.

   Loke bo por hasi: Bai kana duru maske ta pa 15 minüt.

• ● Kòrda ku sintimentu i otro kosnan den bida ta kambia.

   Loke Beibel ta bisa: “Boso no sa kon boso bida lo ta mañan.”—Santiago 4:14.

   Loke esaki ta enserá: Un problema ku ta angustiá bo—asta si bo ta pensa ku no tin solushon—kisas ta temporal.

   Sin importá kon difísil bo problema ta parse awe, mañan e por kambia. Pues, buska un manera pa trata kuné. (2 Korintionan 4:8) Bo problema por kambia ku tempu, pero si bo kaba ku bo bida bo no por hasi nada mas.

   Loke bo por hasi: Lesa relato di Beibel tokante persona ku a sinti nan asina desanimá ku nan kier a muri, i wak kon nan bida a mehorá ku tempu—hopi biaha na un manera ku nan no a spera. Laga nos wak algun ehèmpel.

 Sí. Beibel ta menshoná algun hende ku a bisa “mare mi por muri.” Dios no a rabia ku nan. Al kontrario, el a yuda nan. Dios por yuda abo tambe.

Elías

•  ● Ken e tabata? Elías tabata un profeta ku kurashi. Pero tabatin momento ku e tambe a sintié desanimá. Santiago 5:17 ta bisa: “Elías tabata un hòmber ku e mesun sintimentunan ku nos.”

•  ● Dikon e kier a muri? Na dado momento, Elías a sintié su so, ku miedu i ku e no ta bal nada. Pues el a roga: “SEÑOR, tuma mi bida.”—1 Reinan 19:4.

•  ● Kiko a yud’é? Elías a deshogá su mes na Dios. Kon Dios a anim’é? Dios a mustra Elías ku e tabata interesá den dje i kon poderoso e ta. Ademas, Dios a sigurá Elías ku Elías tabata balioso i a duna Elías un ayudante bondadoso i kapas.

•  ▸ Lesa tokante Elías: 1 Reinan 19:2-18.

Yòb

•  ● Ken e tabata? Yòb tabata un hòmber riku, un fiel sirbidó di e Dios berdadero, ku tabatin un famia grandi.

•  ● Dikon e kier a muri? Diripiente hopi kos malu a sosodé ku Yòb. El a pèrdè tur su kosnan material. Tur su yunan a muri den un desaster. El a haña un malesa doloroso. I finalmente, el a ser akusá falsamente di ta responsabel pa su mes problemanan. Yòb a bisa: “Mi ta kaba na nada; lo mi no biba pa semper.”—Yòb 7:16.

•  ● Kiko a yud’é? Yòb a hasi orashon na Dios i a papia ku otro hende. (Yòb 10:1-3) El a haña animashon serka un amigu kompasivo, Eliú, kende a yuda Yòb mira su situashon for di un otro ángulo. Mas importante ainda, Yòb a aseptá guia i yudansa di Dios.

•  ▸ Lesa tokante Yòb: Yòb 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.

Moises

•  ● Ken e tabata? Moises tabata lider di e antiguo nashon Israel i tabata un profeta fiel.

•  ● Dikon e kier a muri? Moises tabatin hopi responsabilidat, hende a kritik’é konstantemente, i el a sintié morto kansá. Pues, el a sklama na Dios: “Por fabor, mata mi mesora.”—Numbernan 11:11, 15.

•  ● Kiko a yud’é? Moises a konta Dios kon e tabata sinti. Dios a yuda Moises ku su trabou i asina baha e strès.

•  ▸ Lesa tokante Moises: Numbernan 11:4-6, 10-17.