Kiko ta Nifiká ‘Onra Bo Tata i Bo Mama’?

TOKA NA

E kontesta ku Beibel ta duna

E mandamentu pa “onra bo tata i bo mama” ta aparesé diferente biaha den Beibel. (Éksodo 20:12; Deuteronomio 5:16; Mateo 15:4; Efesionan 6:2, 3) Esaki ta enserá ku nos tin ku kumpli ku kuater punto importante.

Apresiá nan. Bo ta onra bo tata i bo mama ora bo ta gradisidu pa tur loke nan a hasi pa bo. Bo por mustra bo apresio ora bo ta tene kuenta ku nan konsehonan. (Proverbionan 7:1, 2; 23:26) Beibel ta animá bo pa mira bo mayornan komo bo “gloria,” esta, sinti bo orguyoso di nan.—Proverbionan 17:6.
Aseptá nan outoridat. Bo ta onra bo tata i bo mama ora bo ta rekonosé e outoridat ku Dios a duna nan, foral ora bo ta yòn. Kolosensenan 3:20 ta bisa yunan: “Yunan, obedesé boso mayornan den tur kos, pasobra esaki ta agradabel den bista di Señor.” Hesus mes a obedesé su mayornan di buena gana ora e tabata hóben.—Lukas 2:51.
Trata nan ku rèspèt. (Levítiko 19:3; Hebreonan 12:9) Hopi biaha esaki ta dependé di kiko bo ta bisa i e manera ku bo ta bis’é. Ta bèrdat ku mayornan por hasi kosnan ku ta pone ku ta bira difísil pa respetá nan. Asta na momentonan asina, yunan por onra nan mayornan ora nan evitá di papia òf hasi kos ku ta mustra falta di rèspèt. (Proverbionan 30:17) Beibel ta siña ku papia malu di mayornan ta un ofensa serio.—Mateo 15:4.
Kuida nan. Ora bo mayornan bira hende grandi, nan tin mester di yudansa práktiko. Bo por onra nan ora bo hasi tur bo esfuerso pa ta sigur ku nan tin loke nan mester. (1 Timoteo 5:4, 8) Por ehèmpel, djis promé ku Hesus a muri, el a hasi areglo pa kuido di su mama.—Huan 19:25-27.

Ideanan robes enkuanto onra bo tata i bo mama

Idea robes: Onra bo tata i bo mama ta nifiká ku bo mester laga nan dirigí bo matrimonio.

E bèrdat: Beibel ta siña ku relashon matrimonial ta bai promé ku otro relashonnan di famia. Génesis 2:24 ta bisa: “P’esei un hòmber lo bandoná su tata i su mama i lo uni ku su esposa. I nan lo bira ún karni.”(Mateo 19:4, 5) Klaru ku parehanan kasá por benefisiá di konseho di nan suegro- i suegranan. (Proverbionan 23:22) Pero ta na su lugá pa parehanan kasá pone límite na te kon leu nan mayornan por duna konseho enkuanto nan matrimonio.—Mateo19:6.

Idea robes: Bo tata i bo mama tin outoridat final.

E bèrdat: Aunke ku Dios a duna mayornan e outoridat den famia, tur outoridatnan humano tin límite. Nunka e ta pasa e outoridat di Dios. Por ehèmpel, ora un korte supremo a ordená Hesus su disipelnan pa desobedesé Dios, nan a kontestá: “Nos tin ku obedesé Dios na promé lugá, i no hende”.(Echonan 5:27-29) Meskos tambe, yunan ta obedesé nan mayornan “den union ku Señor”, esei ta den tur kos ku no ta na konflikto ku e reglanan di Dios.—Efesionan 6:1

Idea robes: Onra bo tata i bo mama ta nifiká ku bo ta sigui nan kreensia religioso.

E bèrdat: Beibel ta animá pa analisá e kosnan ku bo ta tende i wak si ta asina. (Echonan 17:11; 1 Huan 4:1) Un hende ku ta pensa asina por skohe finalmente un kreensia diferente for di su mayornan. Beibel ta menshoná un kantidat di fiel sirbidónan di Dios ku no a sigui e religion di nan mayornan, manera Abraham, Rut i apòstel Pablo.—Hosue 24:2, 14, 15; Rut 1:15, 16; Galationan 1:14-16, 22-24.

Idea robes: Pa onra bo tata i bo mama, bo tin ku partisipá den rito i adorashon di antepasado.

E bèrdat: Beibel ta bisa: “Ta Yehova bo Dios bo tin ku adorá, i ta na e so bo tin ku rindi sirbishi sagrado.” (Lukas 4:8) Un hende ku ta adorá su antepasadonan, ta desagradá Dios. Ademas, Beibel ta siña ku “e mortonan no sa nada” Nan no ta konsiente di ningun homenage na nan; nan no por yuda òf hasi daño na e bibunan.—Eklesiástes 9:5, 10; Isaías 8:19.