Sifra òf number den Beibel hopi biaha por ta literal, pero tin biaha e por ta simbóliko. Generalmente e konteksto ta indiká ku un sierto sifra tin nifikashon simbóliko. Laga nos wak algun ehèmpel di nifikashon simbóliko di algun sifra òf number den Beibel:

•   1 Union. Por ehèmpel, Hesus a resa pidi Dios lo siguiente: “Pa nan tur [esta, su disipelnan] por ta ún, meskos ku abo, Tata, ta den union ku mi i ami ta den union ku bo.”—Huan 17:21; Mateo 19:6.

•   2 Den un kaso legal dos testigu ta konfirmá e verasidat di un asuntu. (Deuteronomio 17:6) Di mes manera, ripitishon di un vishon òf deklarashon ta konfirmá ku e asuntu ta sigur i bèrdat. Por ehèmpel, ora Yosef a interpretá un soño ku Fárao di Egipto a haña, el a bisa: “Ku su Mahestat a soña dos bia meskos, ta pasobra Dios ta disididu i pasobra E ta bai realisá su plan pronto.” (Génesis 41:32, Beibel na papiamentu koriente) Ora ta trata di profesia, “dos kachu” por representá un gobernashon dòbel, manera e profesia ku profeta Daniel a haña relashoná ku e Imperio di Medo-Persia.—Daniel 8:20, 21; Revelashon 13:11.

•   3 Meskos ku den kaso di tres testigu e verasidat di un asuntu lo por keda firmemente establesí, ora ta ripití un kos tres biaha, sea bo ta enfatis’é òf estables’é firmemente.—Ezekiel 21:27; Echonan 10:9-16; Revelashon 4:8; 8:13.

•   4 Esaki por representá e totalidat òf kuadro kompleto di algu, manera por ehèmpel e ekspreshon “e kuater skinanan di tera.”—Revelashon 7:1; 21:16; Isaías 11:12.

•   6 E echo ku e sifra seis ta ménos ku shete—ku hopi biaha ta representá loke ta kompleto—e sifra akí por nifiká algu inkompleto, imperfekto òf algu ku tin di haber ku enemigunan di Dios.—1 Krónikanan 20:6; Daniel 3:1; Revelashon 13:18.

•   7 Hopi biaha e number akí ta nifiká loke ta kompleto. Por ehèmpel, Dios a manda e israelitanan marcha rònt di e stat Yériko shete dia tras di otro i riba e di shete dia nan mester a marcha shete biaha. (Hosue 6:15) Beibel tin hopi ehèmpel similar di uso di e number shete. (Levítiko 4:6; 25:8; 26:18; Salmo 119:164; Revelashon 1:20; 13:1; 17:10) Ora Hesus a bisa Pedro ku e mester pordoná su ruman “no te ku shete biaha, sino te ku 77 biaha,” e ripitishon di e number “shete” a indiká ku e mester por pordoná hende ‘sin límite.’—Mateo 18:21, 22.

•   10 E sifra akí por nifiká totalidat òf loke ta kompleto.—Éksodo 34:28; Lukas 19:13; Revelashon 2:10.

•   12 E number akí ta representá un areglo divino i kompleto. Por ehèmpel, e vishon ku apòstel Huan a haña di shelu a enserá un stat ku “12 piedra di fundeshi, i riba nan tabatin e 12 nòmbernan di e 12 apòstelnan.” (Revelashon 21:14; Génesis 49:28) Pues, ora Beibel ta ripití e sifra 12 hopi biaha, e ta transmití e idea di algu divino i kompleto.—Revelashon 4:4; 7:4-8.

•   40 Vários periodo di huisio òf kastigu tabata ligá ku e sifra 40.—Génesis 7:4; Ezekiel 29:11, 12.

Nifikashon di number òf sifra

 E nifikashon simbóliko di numbernan menshoná den Beibel, segun e splikashon anterior, no tin nada di haber ku buskamentu di nifikashon tras di number, nan kombinashon òf totalidat den práktikanan spiritista. Por ehèmpel, hudiu di e sekta kabala ta analisá e Skritura Hebreo usando un téknika den kua nan ta purba deskubrí kódigonan sekreto. Dios ta kondená e tipo di práktikanan akí.—Deuteronomio 18:10-12.