Kiko Ta “e Yabinan di e Reino”?
E kontesta ku Beibel ta duna
“E yabinan di e Reino” ta representá e outoridat pa habri e kaminda pa hende “drenta e Reino di Dios.” (Mateo 16:19; Echonan 14:22) a Hesus a duna Pedro “e yabinan di e Reino di shelu.” Esaki ta nifiká ku Pedro a risibí e outoridat pa revelá kon hende fiel ku risibí e spiritu santu di Dios, por haña e privilegio di drenta e Reino di shelu.
Pa ken Pedro a usa e yabinan?
Pedro a usa e outoridat di Dios pa habri kaminda pa tres grupo drenta e Reino:
Hudiu i hudiu ku a kombertí. Djis despues di Hesus su morto, Pedro a animá un multitut di hudiu kreyente pa aseptá Hesus komo esun ku Dios a skohe pa goberná den e Reino. Pedro a mustra nan loke nan mester a hasi pa haña salbashon. Asina el a habri kaminda pa nan drenta e Reino, i míles “a aseptá su palabra.”—Echonan 2:38-41.
Samaritano. Despues, Dios a manda Pedro bai serka e samaritanonan. b El a bolbe usa un yabi di e Reino ora e ku apòstel Huan “a pidi den orashon pa e samaritanonan risibí spiritu santu.” (Echonan 8:14-17) Esei a habri kaminda pa e samaritanonan drenta e Reino.
Hende di otro nashon. Tres aña i mei despues di Hesus su morto, Dios a revelá na Pedro ku hende di otro nashon tambe lo haña e oportunidat pa drenta e Reino. P’esei, Pedro a usa un di e yabinan ora el a prediká na hende di otro nashon. Asina el a habri porta pa nan risibí spiritu santu, bira kristian i forma parti di e Reino.—Echonan 10:30-35, 44, 45.
Kiko ke men “drenta e Reino”?
Hende ku di bèrdat “drenta e Reino” lo goberná huntu ku Hesus den shelu. Beibel a profetisá ku nan lo “sinta riba trono” i “komo rei, nan lo goberná e tera.”—Lukas 22:29, 30; Revelashon 5:9, 10.
Ideanan robes tokante e yabinan di e Reino
Idea robes: Ta Pedro ta disidí ken por drenta shelu.
E bèrdat: Beibel ta bisa ku ta Kristu Hesus “mester husga bibu i morto,” i no Pedro. (2 Timoteo 4:1, 8; Huan 5:22) De echo, Pedro mes a bisa ku Hesus ta esun “ku Dios a dekretá pa ta hues di bibu i morto.”—Echonan 10:34, 42.
Idea robes: Ta Pedro a disidí ki ora mester a usa e yabinan di e Reino, i shelu a apoyá su desishon.
E bèrdat: Ora Hesus a papia tokante e yabinan di e Reino, el a bisa Pedro: “Kiko ku bo mara riba tera, lo ta mará kaba den shelu, i kiko ku bo lòs riba tera, lo ta di lòs kaba den shelu.” (Mateo 16:19) Algun hende ta kere ku esei ta nifiká ku Pedro ta tuma desishon pa shelu. Pero e verbonan na griego original ta mustra ku e desishonnan ku Pedro a tuma, tabata desishonnan ku shelu a tuma promé pa Pedro.
Ademas, otro parti den Beibel ta mustra ku Pedro a sigui guia di shelu ora el a usa e yabinan di e Reino. Por ehèmpel, ora el a usa e di tres yabi, ta instrukshon di Dios e tabata sigui. —Echonan 10:19, 20.
a Tin bes, Beibel ta usa e palabra “yabi” komo un símbolo di outoridat i responsabilidat.—Isaías 22:20-22; Revelashon 3:7, 8.
b E religion di e samaritanonan tabata diferente for di esun di e hudiunan. Pero nan a inkluí algun siñansa i práktika di e Lei di Moises.
Otro Artíkulo Interesante
PREGUNTA KU BEIBEL TA KONTESTÁ
Kiko Ta e Reino di Dios?
Wak dikon e Reino di Dios ta superior na tur otro gobièrnu.
SIÑANSA DI BEIBEL
Kiko e Reino di Dios Ta?
Tempu Hesus tabata riba tera, el a papia mas tantu tokante e Reino di Dios ku kualke otro kos. Pa hopi siglo su siguidónan a pidi den orashon pa e Reino ei bini.
PREGUNTA KU BEIBEL TA KONTESTÁ
Ken Ta Bai Shelu?
Hopi hende tin e idea robes ku tur bon hende ta bai shelu. Kiko Beibel ta siña realmente?
SIÑANSA DI BEIBEL
Nos Ta Animá Bo pa Sigui un Kurso di Beibel ku Nos
Sigui un kurso di Beibel interaktivo grátis ku un maestro.