Si bo a yega di purba di mata un muskita, lo bo sa kon difísil ta pa hasi esei. Komo ku e insektonan akí ta reakshoná asina lihé, hopi biaha nan ta logra skapa. Algun sientífiko a deskubrí ku un sorto di muskita chikitu ku yama mèlèmèlè, por kambia di direkshon meskos ku un avion di guera ta hasi, pero den un frakshon di sekònde.

 Profèser Michael Dickinson a bisa ku for di e momento ku nan nase “nan por bula masha bon mes.” “Ta meskos ku si nos pone un bebi resien nasí den cockpit di un avion di guera i ya kaba e sa kon pa bula e avion.”

 Algun investigadó a filma e manera akrobátiko ku e insektonan akí ta bula i a deskubrí ku nan ta bati nan alanan 200 biaha pa sekònde. Sinembargo, si nan djis bati nan ala un biaha so, esei lo ta sufisiente pa nan kambia di direkshon i skapa.

 Kon lihé nan por reakshoná? Algun investigadó a deskubrí ku nan por reakshoná 50 biaha mas lihé ku un hende por kinipí wowo. Segun Dickinson: “Den un tempu masha kòrtiku, e mèlèmèlè ta hasi un kalkulashon kompliká pa sa unda tin peliger i disidí den kua direkshon e tin ku bula bai pa e por skapa.”

 Pero kon e mente chikitu di e mèlèmèlè ta hasi esaki ta un sekreto ku hopi investigadó tin gana di komprondé.

 Kiko abo ta pensa? E abilidat akrobátiko di un mèlèmèlè ta kasualidat òf diseño?