Mi a nase na Montreal, e stat di mas grandi den e provinsia di Canada, Quebec. Ami i mi tres rumannan a lanta ku nos mayornan amoroso den e bario agradabel Rosemont. Nos a disfrutá di un bida trankil i na pas ku otro.

 Komo mucha mi tabata gusta lesa Beibel. Mi ta kòrda, ora mi tabatin 12 aña, kon mi tabata gusta lesa for di Tèstamènt Nobo tokante Hesus su bida. Su amor i kompashon pa otro hende a konmové mi, i mi tabata ke ta manera é. Lamentablemente, segun ku mi a bira mas grandi, mi a kuminsá anda ku hende ku tabatin mal influensia riba mi, i mi a pèrdè e interes ei.

 Mi tata tabata toka saksofon, i mi a heredá no solamente su saksofon sino tambe su amor pa músika. Esei a bira e kos di mas importante den mi bida. Mi tabata gusta músika asina tantu ku no a dura muchu ku mi a siña toka guitara. Ku tempu, ami ku algun amigu a forma un banda di ròk, i nos tabata toka na diferente show. Algun produktor bon konosí den e mundu di músika a aserka mi i a duna mi un bon oferta. Mi a firma un kontrakt ku un kompania grandi ku ta produsí músika. Mi músika a bira masha popular i bo por a tendé hopi biaha na radio na Quebec.

 Tabata parse ku mi tabatin tur loke mi tabata deseá. Mi tabata yòn, famoso i tabata gana hopi plaka hasiendo loke mi tabata gusta. Den dia mi tabata bai gym, hasi entrevista, bai seshon kaminda mi tabata parti firma i aparesé na televishon. Anochi mi tabata toka i bai fiesta. For di un edat yòn, mi tabata bebe alkohòl pa mi por a trata ku e preshon di toka dilanti un públiko grandi. Despues, mi a kuminsá usa droga tambe. Mi tabata hiba un bida inmoral sin importá e konsekuensianan.

 Algun hende tabata envidiá mi manera di biba pasobra mi tabata parse di ta felis. Pero mi tabata sinti un bashí di paden, spesialmente ora mi tabata so. Mi tabata deprimí i angustiá. Pió ainda, ora mi a yega e punto mas eksitoso di mi karera, dos di mi produktornan a muri di AIDS. Mi a keda den shòk! Aunke mi tabata gusta músika, mi no tabata gusta e estilo di bida ku esaki a trese kuné.

 Apesar di mi éksito, mi tabata sa ku kos ta hopi malu den mundu. Kon por ta ku tin asina tantu inhustisia? Mi tabata puntra mi mes dikon Dios no ta hasi nada. De echo, hopi bes mi tabata pidi Dios duna mi kontesta riba mi preguntanan. Un biaha, tempu ku nos no tabatin gira, mi a kuminsá lesa Beibel atrobe. Aunke mi no a komprondé mayoria di e kosnan ku mi tabata lesa, mi a konkluí ku e fin di mundu mester ta serka.

 Segun ku mi tabata lesa Beibel, mi a enkontrá un pasashi kaminda Hesus a yuna den desierto pa 40 dia. (Mateo 4:1, 2) Mi a pensa ku si mi hasi meskos, podisé Dios por a revelá su mes na mi, pues mi a pone un fecha pa mi kuminsá yuna. Dos siman promé ku mi a kuminsá, dos Testigu di Yehova a bati na mi porta i mesora mi a invitá nan paden. Mi a wak un di nan, ku yama Jacques, stret den su kara i a puntr’é: “Kon nos por sa ku nos ta bibando den e último dianan?” Pa kontesta mi, el a habri su Beibel i a lesa 2 Timoteo 3:1-5. Mi a bombardiá nan ku hopi otro pregunta. I mi a keda impreshoná ku nan kontestanan; nan tabata lógiko, komprendibel i semper basá riba Beibel. Despues di un par di bishita, mi a realisá ku no tabata nesesario pa yuna.

 Mi a kuminsá studia Beibel regularmente ku e Testigunan. Ku tempu, mi a kòrta mi kabei largu i mi a kuminsá bishitá tur e reunionnan na Salòn di Reino. E kaluroso bon biní ku mi a risibí na e reunionnan a konvensé mi ku por fin mi a haña e bèrdat.

 Klaru ku pa mi apliká loke mi a siña for di Beibel, mi mester a hasi kambio grandi den mi bida. Di promé, mi mester a stòp di usa droga i di hiba un bida inmoral. Tambe, mi mester a kambia mi aktitut egoista i mustra mas konsiderashon ku otronan. Komo mayor soltero, mi mester a siña kon pa sòru pa e nesesidatnan spiritual i emoshonal di mi dos yunan. Pues, m’a bandoná mi karera musikal i a bai traha na un fabrika ku no tabata paga mashá.

 No tabata fásil pa hasi tur e kambionan akí. Segun ku mi tabata purba di stòp di usa droga, mi a lucha ku e efektonan ku hende ta sinti ora ku e kurpa ta pidi droga, i mi a haña algun rekaida. (Romanonan 7:19, 21-24) Tabata un desafio grandi pa mi laga mi bida inmoral atras. Ademas, mi trabou nobo tabata laga mi hopi kansá i e tiki sèn ku mi tabata gana a desanimá mi. Tabata tuma mi tres luna pa gana mes tantu sèn ku mi tabata gana den dos ora komo músiko.

 Ku orashon, mi a logra perseverá i hasi e kambionan akí. Ademas, tabata masha importante pa mi lesa Beibel regularmente. Tabatin algun teksto ku a animá mi mashá. Un di nan tabata 2 Korintionan 7:1 ku ta urgi nos pa “limpia nos mes di tur impuresa di karni i di spiritu.” Un otro teksto ku a konvensé mi ku mi por a kibra ku mi bisionan ta Filipensenan 4:13, ku ta bisa: “Pa tur kos mi tin forsa pa medio di esun ku ta duna mi poder.” Yehova Dios a kontestá mi orashonnan i a yuda mi komprondé i apliká prinsipio di Beibel. Esaki a motivá mi pa dediká mi bida na dje. (1 Pedro 4:1, 2) Na aña 1997, mi a batisá komo Testigu di Yehova.

 Mi ta konvensí ku si mi a sigui ku mi bida di ántes, lo mi no ta na bida awe. Pero en bes di esei, awor mi ta disfrutá di un bida felis. Mi dushi esposa Elvie ta un bendishon. Huntu nos ta prediká 70 ora pa luna i ta disfrutá di siña hende e bèrdat tokante Beibel. Esei ta duna mi hopi goso i satisfakshon. Mi ta masha gradisidu ku Yehova a hala mi serka dje.​—Huan 6:​44