Mi a nase na La Ceiba, Honduras. Mi tabata esun di mas chikitu di sinku ruman i e úniko mucha hòmber. Ademas, mi tabata e úniko den nos famia ku tabata surdu. Ami ku mi famia tabata biba den un bario peligroso, i nos tabata hopi pober. Ora mi tabatin kuater aña, nos bida a bira mas difísil pasobra mi tata a muri den un aksidente na trabou.

 Mi mama a traha duru pa perkurá pa mi i mi ruman muhénan, pero hopi biaha e no tabatin sufisiente plaka pa kumpra paña pa mi. Ora áwaseru tabata kai, hopi bes mi tabata sinti friu pasobra mi no tabatin paña pa friu i áwaseru.

 Segun mi tabata krese, mi a siña e idioma di seña di Honduras (LESHO). Di e manera ei, mi por a komuniká ku hende ku tambe ta surdu. Pero mi mama i mi ruman muhénan no tabata sa LESHO, i nan tabata usa solamente algun seña ku nan mes a inventá pa komuniká ku mi. Sinembargo, mi mama tabata stima mi i el a protehá mi di peliger. Ku e poko señanan ku e tabata sa, el a spièrta mi pa evitá bisio manera humamentu i abusu di alkohòl. Mi ta gradisidu na mi mama ku nunka mi no a bira adikto na niun di e kosnan ei.

 Ora mi tabata yòn, mi mama tabata hiba mi misa katóliko, pero mi no tabata komprondé nada pasobra niun hende no tabata interpretá den idioma di seña pa mi. Mi tabata haña misa asina laf ku ora mi tabatin dies aña mi a stòp di bai. Pero ainda mi tabata ke sa mas tokante Dios.

 Na aña 1999, ora mi tabatin 23 aña, mi a konosé un señora di Merka ku tabata miembro di un misa evangelista. El a duna mi lès di Beibel i a siña mi idioma di seña merikano (ASL). Mi a gusta loke mi a siña asina tantu ku mi a disidí di bira un pastor. P’esei, mi a muda bai Puerto Rico pa sigui un kurso religioso pa hende surdu. Ora mi a bolbe bèk na La Ceiba na aña 2002, mi a lanta un misa pa hende surdu ku yudansa di mi amiganan. Despues, un di e amiganan akí, Patricia, a bira mi esposa.

 Komo pastor di nos misa, mi a duna sermon na LESHO, mi a mustra plachi di historia di Beibel i mi a aktua e esenanan di e historianan ei pa yuda e hendenan surdu komprondé. Mi tabata bishita hende surdu tambe na e statnan ku tabata serka di nos pa animá nan i yuda nan ku nan problemanan. Mi a asta bai Merka i Zambia komo misionero. Pero en realidat, mi no tabata sa masha di Beibel. Mi tabata siña e hendenan loke nan a siña mi i loke mi a komprondé for di e plachinan. De echo, mi tabatin hopi pregunta.

 Un dia, algun miembro di mi misa a kuminsá plama mentira tokante mi. Nan a bisa ku mi tabata un buraché i ku mi tabata kòrta orea di mi esposa. Mi tabata desapuntá i rabiá. Poko despues, ami ku Patricia a bai for di e misa ei.

 Hopi bes Testigunan di Yehova tabata bishitá ami ku Patricia, pero nunka nos no tabata skucha nan. Sinembargo, despues ku nos a bai for di nos misa, Patricia a aseptá un estudio di Beibel serka un pareha Testigu ku yama Thomas i Liccy. Mi a keda impreshoná ku aunke nan no tabata surdu, nan tabata sa idioma di seña. Pues, un poko despues mi a kuminsá studia huntu ku Patricia.

 Pa algun luna, nan a usa vidio di ASL pa studia ku nos. Pero ora algun di nos amiganan a akusá Testigunan di Yehova di ta siguidó di hende, nos a stòp ku nos estudio di Beibel. Aunke Thomas a bini ku evidensia pa mustra nos ku Testigunan di Yehova no ta siguidó di hende, mi no a ker’é.

 Algun luna despues, ora Patricia a bira hopi deprimí, el a hasi orashon i pidi Dios pa Testigunan di Yehova bishit’é atrobe. Un poko despues, un bisiña ku tabata Testigu di Yehova a bishitá Patricia i a ofresé pa pidi Liccy pa bin bishit’é. Liccy tabata un berdadero amiga. E tabata bishitá Patricia tur siman pa anim’é i studia Beibel kuné. Pero tòg, mi no tabata konfia e Testigunan kompletamente.

 Na aña 2012, Testigunan di Yehova a partisipá den un kampaña pa ofresé e vidio Bo Ke Haña Sa e Bèrdat? na LESHO. Liccy a trese e vidio ei pa nos. Ora mi a wak e vidio, mi no por a kere, hopi di e doktrinanan ku mi tabata siña hende, manera fièrnu di kandela i inmortalidat di alma, no tabata bíbliko.

 E siguiente siman, mi a bai e Salòn di Reino di Testigunan di Yehova pa papia ku Thomas. Mi a bis’é ku mi ke siña e hendenan surdu e bèrdat tokante Beibel, pero mi no ke bira un Testigu di Yehova. Mi plan tabata pa lanta un misa nobo ku tabata solamente pa hende surdu. Thomas a elogiá mi pa e entusiasmo ku mi tabatin pero despues el a mustra mi Efesionan 4:5 ku ta bisa ku e kristiannan berdadero mester ta uní.

 Thomas a duna mi e vidio Testigunan di Yehova—Un Historia di Fe Bibu, Parti 1: Nan Ta Sali for di den Skuridat na ASL. E vidio akí a mustra kon un grupo di hòmber tabata eksaminá Beibel kuidadosamente pa komprondé e bèrdat tokante algun doktrina básiko. Segun ku mi tabata wak e vidio, mi por a komprondé kon e hòmbernan ei tabata sinti. Meskos ku nan, mi tambe tabata buska e bèrdat. E vidio ei a konvensé mi ku Testigunan di Yehova ta siña hende e bèrdat pasobra nan ta basa nan kreensianan solamente riba Beibel. P’esei, mi a kuminsá studia Beibel atrobe, i na aña 2014, ami ku Patricia a batisá komo Testigu di Yehova.

 Mi gusta e kongregashon di Testigunan di Yehova pasobra e rumannan ta mantené nan mes na e normanan moral di Dios. Nan ta papia ku rèspèt i ta trata otro hende bon. Nan ta mantené pas i ta animá otro. E Testigunan ta uní i ta siña e mesun bèrdat di Beibel sin importá di ki pais nan ta i ki idioma nan ta papia.

 Mi a disfrutá di por siña kiko Beibel ta siña realmente. Por ehèmpel, mi a siña ku Yehova ta Dios Todopoderoso i Soberano riba henter tera. E stima hende surdu i hende ku por skucha. E ta nifiká hopi pa mi pa sa ku Dios ta stima mi. Mi a siña tambe ku planeta Tera lo bira un bunita paradeis i ku nos lo tin e oportunidat di biba pa semper ku salú perfekto. Mi ta anhelá pa e dia yega ku e promesanan ei lo bira realidat!

 Ami ku Patricia gusta papia ku otro hende surdu tokante Beibel. Awor nos ta studia Beibel ku algun miembro di nos misa bieu. Pero kontrali na tempu ku mi tabata pastor, awor mi no tin duda mas di loke mi ta siña hende. Por fin mi a haña kontesta pa mi preguntanan ora mi a studia Beibel ku Testigunan di Yehova.