Tin hende ku ta tuma hopi tempu pa siña di nan foutnan. Ami tabata un persona asina. Mi a nase i krese na Barcelona, e di dos stat mas grandi di Spaña. Nos tabata biba na Somorrostro, un bario ku tabata situá kantu di laman. Na Somorrostro tabatin hopi krímen i bendementu di droga.

 Mi mayornan tabatin nuebe yu, i ami tabata esun mayó. Komo ku nos tabata masha pober, mi tata a manda mi traha na un klup di tènis pa piki bala riba kancha durante wega. Mi tabatin dies aña i tabata traha dies ora pa dia. P’esei, mi no por a bai skol manera otro mucha di mi edat. Ku 14 aña di edat, mi a kuminsá traha ku mashin na un lugá kaminda nan tabata traha ku metal.

 Na aña 1975, nan a yama mi pa drenta servisio militar, ku e tempu ei tabata obligatorio na Spaña. Mi kier a kuminsá un kapítulo nobo den mi bida, un bida eksitante i yen di aventura. Pues, mi a inskribí mi mes komo boluntario pa djòin un grupo militar spañó na Mellila, un teritorio spañó situá na Nort Afrika. For di e tempu ei, mi a drenta e mundu di droga i alkohòl.

 Despues ku mi a sali di e grupo militar, mi a bai Barcelona bèk i a lanta un gang. Nos tabata hòrta tur loke nos por a haña, i despues nos tabata bende kos pa por haña plaka pa kumpra droga. Mi a kuminsá usa LSD i anfetamina (un droga ku ta duna hende energia i eksitashon) i mi bida tabata drei rònt di sèks, alkohòl i wega di plaka. E estilo di bida ei a pone mi bira masha violento mes. Semper mi tabatin un kuchú, hacha òf machete ku mi i nunka mi no tabata duda pa sak’é si tabata nesesario.

 Un biaha ami ku gang a hòrta un outo, i polis a kuminsá persiguí nos. Tabata manera un esena di pelíkula. Despues ku nos a kore un 30 kilometer, polis a kuminsá basha bala riba nos. Finalmente, nos a dal ku outo i nos tur a baha na awa. No tabata nada straño ku ora mi tata a haña sa kiko a pasa, el saká mi fo’i kas.

 E siguiente sinku añanan, mi a biba riba kaya. Mi a drumi den porta di edifisio, den trùk, riba banki den parke i den santana. Pa un tempu, mi a asta biba den un kueba. Mi bida no tabatin propósito mas, i pa mi, no tabata hasi diferensia mas si mi biba òf muri. Mi ta kòrda kon, ora mi tabata drogá, mi tabata kòrta mi pòls i mi brasanan. I te dia djawe mi tin e sikatrisnan.

 Tempu ku mi tabatin 28 aña di edat, mi mama a bin buska mi pa pidi mi bin kas bèk. M’a primintié ku lo mi drecha mi bida. Pero a tuma mi basta tempu pa kumpli ku e promesa ei.

 Riba un atardi, dos Testigu di Yehova a yama na nos kas. Miéntras ku mi tabata skucha nan, mi a tende mi tata ta grita di paden pa mi sera e porta den nan kara. Nunka mi no tabata gusta pa hende bisa mi kiko pa hasi, pues m’a ignor’é. E Testigunan a ofresé mi tres buki chikitu ku mi a aseptá gustosamente. I mi a puntra nan unda nan reunionnan tabata. Poko dia despues, mi tabata pará dilanti Salòn di Reino.

 Einan, mi a ripará ku tur hende tabata nèchi bistí. Mi mes tabatin kabei largu, un barba deskuidá i paña slòrdig bistí. Tabata parse ku mi no tabata pertenesé einan. Pues, m’a keda pafó. Pero m’a keda sorprendí ora mi a mira Juan, un eks-miembro di mi gang, bistí na bachi. Despues mi a haña sa ku ta apénas ún aña pasá el a bira Testigu di Yehova. E echo ku Juan tabata einan a duna mi kurashi pa drenta i asistí na e reunion. For di e tempu ei padilanti, mi bida a kuminsá kambia.

 Mi a aseptá un estudio di Beibel i den poko tempu mi a bin realisá ku si mi kier a haña Dios su aprobashon mi mester a kambia mi aktitut agresivo i mi estilo di bida inmoral. No tabata fásil pa hasi e kambionan ei. M’a siña ku pa mi agradá Dios, mi mester a “transformá [mi] mes dor di renobá [mi] mente.” (Romanonan 12:2) E miserikòrdia di Dios a konmové mi. Mi por a sinti ku apesar di tur e foutnan ku mi a hasi, Dios kier a duna mi un chèns pa kambia mi bida. Loke mi a siña tokante Yehova tabatin un efekto profundo riba mi. Mi a komprondé ku tin un Kreador i ku e ta interesá den mi.​—1 Pedro 5:6, 7.

 Esei a motivá mi pa hasi kambio den mi bida. Por ehèmpel, ora ku nos a yega na e tema di tabako den mi estudio di Beibel, mi a bisa mi mes: ‘Si Yehova ke pa mi keda limpi i puru den tur sentido, mi tin ku stòp di huma!’ (2 Korintionan 7:1) I ta esei mi a hasi!

 Ademas, mi mester a stòp di usa i bende droga. Esei a tuma un tiki mas tempu i esfuerso. Pa mi por a logra hasi esei, mi tabata sa ku mi mester a stòp di anda ku mi amigunan di ántes. Nan influensia a stroba mi di hasi progreso spiritual. Ku tempu, mi a kuminsá dependé mas riba Dios i a aseptá e apoyo di mi amigunan nobo den kongregashon. Nan amor i interes sinsero den mi ta algu ku nunka mi a yega di eksperensiá. Despues di algun luna, mi a lográ stòp di usa droga kompletamente i a “bisti e personalidat nobo,” loke a yuda mi haña e aprobashon di Dios. (Efesionan 4:24) Na ougùstùs 1985, mi a batisá komo Testigu di Yehova.

 Beibel a kambia mi bida kompletamente. El a yuda mi stòp ku un estilo di bida ku tabata kaba ku mi kurpa i mi dignidat. Na kontraste, mas ku 30 di mi amigunan di ántes a muri na un edat hóben di AIDS òf otro malesanan relashoná ku uso di droga. Mi ta masha gradisidu ku e prinsipionan di Beibel a yuda mi evitá e konsekuensianan desastroso ei.

 E kuchúnan i hachanan ku mi tabata kana kuné tempu ku mi tabata un hóben violento ya ta kos di pasado. Nunka mi a pensa ku na lugá di e armanan ei lo mi kana ku un Beibel pa yuda hende. Awe, ami ku mi kasá ta sirbi Yehova i ta prediká 70 ora tur luna.

 Aunke mi mayornan nunka a bira Testigu di Yehova, nan a rekonosé ku mi estudio di Beibel a yuda mi hopi. Es mas, mi tata a asta defendé e Testigunan ora ku e tabata ku su koleganan. El a realisá ku mi religion nobo a trese un kambio grandi den mi bida i a yuda mi hopi. Semper mi mama tabata bisa ku mare mi a kuminsá studia Beibel mas promé. Mi ta kompletamente di akuerdo kuné!

 Tur e kosnan ku mi a pasa aden a yuda mi realisá ku no tin sentido pa buska felisidat den droga òf otro bisio. Awor mi ta realmente felis pasobra mi por yuda otro hende siña konosé e bèrdatnan di Beibel, bèrdatnan ku a salba mi bida.