Nan Tabatin un Triángulo Lila na Nan Paña
Maud ta biba na Fransia. E ta traha na un skol i, durante lès, e ta yuda e muchanan ku tin desabilidat. Resientemente, e alumnonan di un klas tabata siña tokante Holokousto i tokante e kamponan di konsentrashon nazi. E prizoneronan den e kamponan ei tabatin un pida tela kosé na nan unifòrm. E koló i forma di e pida tela ei tabata indiká dikon un persona a bai será.
Un dosente tabata papia di e triángulo lila ku algun prizonero tabatin na nan paña, anto el a bisa: “Segun mi, e prizoneronan ei tabata homoseksual.” Despues di lès, Maud a splika e dosente ku e nazinan a usa triángulo lila pa identifiká e Testigunan di Yehova. a Anto Maud a bisa e dosente ku lo e por trese mas informashon tokante e tema ei p’e. E dosente a haña esei un bon idea, i el a pidi Maud pa Maud kompartí e informashon ku e alumnonan.
Durante un otro lès tokante e mesun tema akí, un otro dosente a mustra un plachi ku e diferente pidanan di tela ku e prizoneronan tabatin na nan paña. E plachi a mustra bon kla ku ta e Testigunan di Yehova tabatin un triángulo lila na nan paña. Despues di lès, Maud a bisa e dosente akí tambe ku e por trese mas informashon tokante e tema akí. E dosente a haña esei un bon idea, i el a pidi Maud pa Maud papia ku e alumnonan tokante e tema akí.
Maud i e publikashonnan ku el a usa
Pa e promé klas, Maud a prepará un presentashon di 15 minüt, pero ora 15 minüt a pasa, e dosente a bisa Maud: “Bo por usa henter e lès.” Pues, Maud a pasa un vidio ku ta mustra kon e nazinan a persiguí e Testigunan di Yehova. E vidio a mustra, entre otro, ku e nazinan a kita 800 mucha Testigu di Yehova for di nan mayornan. Na e momento ei, Maud a stòp e vidio un ratu, i el a lesa eksperensia di tres di e muchanan ei. Despues di e vidio, Maud a lesa un karta di despedida ku Gerhard Steinacher a manda pa su mayornan na aña 1940. Gerhard tabata un Testigu di Yehova di Austria ku tabatin 19 aña, i el a skirbi e karta ei djis algun ora promé ku e nazinan a ehekut’é. b
Maud a kompartí e mesun informashonnan ku e di dos klas. Danki na Maud su kurashi, awor e dos dosentenan menshoná anteriormente ta sòru pa nan papia tambe di e Testigunan di Yehova ora nan ta papia tokante e víktimanan den e kamponan di konsentrashon nazi.
a Durante Segundo Guera Mundial, e Testigunan di Yehova na Alemania, ku tabata konosí komo Bibelforscher (e Studiantenan di Beibel), a bai será pasobra nan a nenga di apoyá e nazinan.
b Nan a sentensiá Gerhard Steinacher na morto pasobra el a nenga di drenta servisio militar di Alemania. Den su karta di despedida, el a skirbi: “Mi ta un mucha ainda. Ta si Señor duna mi forsa so mi por para firme, i esei ta loke mi ta pidi.” Su siguiente mainta, nan a ehekutá Gerhard. Riba su graf ta skirbí: “El a muri pa onor di Dios.”
Otro Artíkulo Interesante
PREGUNTA KU HOPI HENDE SA HASI
Dikon A Persiguí Testigunan di Yehova Durante Holokousto?
Kisas lo bo lesa algun informashon ku bo no tabata sa.
PREGUNTA KU BEIBEL TA KONTESTÁ
Dikon Dios A Permití e Holokousto?
Hopi hende ta puntra pakiko un Dios di amor ta permití asina tantu sufrimentu. Beibel ta duna kontesta satisfaktorio.