Artur, un superintendente di sirkuito na Armenia, tabata bishitando un kongregashon di Testigunan di Yehova. El a bin haña sa ku e kongregashon ei nunka a partisipá den predikashon públiko, ku ta enserá prediká ku stènt di literatura. Pa animá nan pa prediká ku stènt di literatura, Artur ku su kasá, Anna, huntu ku un otro Testigu ku yama Jirayr, a pone un stènt di literatura den un pueblo chikitu. Nan a skohe un lugá kaminda hopi hende tabata pasa.

 Algun hende ku a pasa ei banda tabata mustra interes, i nan tabata bai ku literatura. Pero, e forma nobo akí di prediká mesora a hala atenshon di opositor. Dos pastor a aserká e stènt di literatura. Anto, un di nan diripiente a skòp e stènt bash’é abou. Despues, el a dal Artur un wanta den kara ku a pone Artur su brel kai abou. Artur, Anna, i Jirayr a purba di trankilisá e pastornan, pero nan no a logra. E pastornan a trapa riba e stènt, i nan literatura a plama bai tur kaminda. Despues ku e pastornan a insultá e Testigunan i menasá nan, nan a bai.

 Artur, Anna, i Jirayr a bai na warda di polis pa entregá keho. Nan a duna un deklarashon i brevemente nan a papia tokante Beibel ku algun polis i otro trahadó ku tabata einan. Despues, nan a hiba e tres Testigunan serka e polis ku tabata na enkargo, kende tabata ke haña mas informashon tokante loke a pasa. Pero ora el a mira ku Artur tabata un hòmber fuerte, e kier a sa dikon Artur no a defendé su mes ora e pastor a dal e wanta; el a stòp di hasi pregunta tokante e kaso, i e kier a haña sa mas tokante e kreensianan di Testigunan di Yehova. Nan a papia kuater ora largu! E polis a keda asina impreshoná ku el a bisa: “Esei sí ta un bon religion! Mi tambe ke djòin e religion ei!”

 E siguiente dia, Artur a bolbe bai prediká ku e stènt di literatura. Un hòmber ku a mira loke a pasa e dia anterior a aserk’é. E hòmber a elogiá Artur pa e manera kalmu ku el a trata ku e asuntu. Despues, el a bisa Artur ku ora el a wak kiko e pastornan a hasi, el a pèrdè tur rèspèt pa nan.

 E anochi ei mes, e hefe di polis a yama Artur pa e bini e warda di polis atrobe. Pero na lugá di papia di e kaso, el a hasi Artur mas pregunta tokante Beibel. Dos otro polis tambe a djòin e kòmbersashon.

 E siguiente dia, Artur a bolbe bishitá e hefe di polis pa mustr’é algun di nos vidionan tokante Beibel. E hefe di polis a yama algun otro polis pa nan tambe bin wak e vidionan.

 E mal komportashon di e pastornan a pone ku hopi polis a skucha e mensahenan di Beibel pa promé biaha, i nan a haña un bon impreshon di Testigunan di Yehova.