Na aña 2017, diesdos Testigu di Yehova a kuminsá un biahe ku boto for di e parti ku yama Mosquito (Miskito) na e kosta di Nicaragua. Nan boto tabata yama Sturi Yamni. Stephen, un tripulante di e boto, a bisa: “Nos meta tabata pa animá un grupo chikitu di ruman ku ta biba na e parti aislá ei i yuda nan prediká den nan teritorio.”

 E 12 Testigunan di Yehova a sali for di Pearl Lagoon i nan a biaha 200 kilometer via e riu Río Grande de Matagalpa bai te e pueblito La Cruz de Río Grande. Nan no por a imaginá ku e nòmber di nan boto, ku na idioma miskito ta nifiká “Bon Notisia,” lo a haña un nifikashon asina spesial pa e hendenan ku ta biba kantu di e riu. Despues di a biaha pa 12 ora, sin konta e oranan ku a para pa drumi un ratu, e Testigunan a yega nan destinashon. E seis Testigunan di Yehova ku tabata biba einan a duna nan rumannan un kaluroso bon biní.

 E anochi ei tabatin mal tempu. Un tormenta pisá a pone áwaseru kai masha duru den e área kaminda e riu Río Grande de Matagalpa ta kuminsá. Den un par di ora, e riu a yena i inundá e área ei. E nivel di awa a sigui subi pa dos dia largu. Tantu e Salòn di Reino komo hopi otro kas di famia a yena ku awa. E rumannan ku tabata di bishita a yuda evakuá e hendenan. Mayoria di hende ku a haña yudansa a pasa e siguiente dos anochinan serka un Testigu di Yehova ku tabatin un kas di dos piso.

 E di tres anochi, e alkalde di La Cruz a bai serka e rumannan ku tabata di bishita pa pidi nan yudansa. Komo ku Sturi Yamni tabata e úniko boto ku tabata sufisientemente fuerte pa nabegá riba e riu, e alkalde a pidi nan pa transportá un tim di reskate ku a bini pa yuda i hiba nan na e áreanan un poko mas leu ku tambe a ser afektá. E rumannan tabata kontentu pa yuda.

 E siguiente mainta, tres ruman a bai hiba e tim di reskate. Stephen ta kòrda: “Na e momento ei, ya e koriente di e riu tabata masha fuerte, mas ku 18 kilometer pa ora. Tabatin remolino di awa i algun tronkon di palu masha grandi tabata drif riba e riu.” Apesar di e kondishonnan difísil ei, e boto a logra yega na tres pueblito.

 E tres Testigunan di Yehova a usa e oportunidat ei pa konsolá e habitantenan di e pueblito. Tambe nan a parti e revista Spièrta di 2017 ku tabatin e tema “Medida Ku Por Salba Bida Ora di Kalamidat.”

 E habitantenan ku tabata biba kantu di riu a keda masha kontentu ku e yudansa práktiko ku nan a haña di e Testigunan di Yehova, tantu den sentido material komo spiritual. Algun habitante a bisa di e Testigunan di Yehova: “Nan ta kla pa yuda durante tempu difísil.” Algun otro habitante a bisa: “Nan tin berdadero amor pa nan próhimo.” Despues di a mira kon dispuesto e Testigunan di Yehova tabata pa yuda nan rumannan den fe i otro hende, hopi di e habitantenan a bira mas dispuesto pa skucha e mensahe di Beibel.