Komo Testigunan di Yehova, nos no ta selebrá kumpleaño pasobra nos ta konvensí ku Dios no ke pa nos hasi esei. Beibel no ta bisa niun kaminda spesífikamente pa no selebrá kumpleaño, pero sí Beibel ta duna nos algun detaye ku ta yuda nos komprondé kon Dios ta mira selebrashon di kumpleaño. Laga nos analisá e siguiente kuater detayenan i kompará nan ku prinsipio di Beibel.

1.   Selebrashon di kumpleaño tin orígen pagano. Di akuerdo ku un dikshonario, e selebrashon ei a bin di e kreensia ku riba dia di un persona su kumpleaño, “mal spiritu i poder maligno tin chèns di kousa daño na e persona ku a hasi aña,” pero ‘si su amigunan ta huntu kuné i ta dese’é tur kos bon, esei por proteh’é.’ (Funk & Wagnalls Standard Dictionary of Folklore, Mythology, and Legend) Un otro buki ta bisa ku den pasado nan tabata tene registro di kumpleaño. Segun “e siensia místiko di astrologia,” esei tabata “importante pa por pronostiká horoskop.” E buki ei ta bisa tambe ku “segun kreensia popular bela di kumpleaño tin poder mágiko pa kumpli ku deseo di hende.”—The Lore of Birthdays.

    Beibel ta kondená uso di magia, bruheria, adivinashon, spiritismo i “kosnan por estilo.” (Deuteronomio 18:14; Galationan 5:19-21) De echo, un di e motibunan pakiko Dios a kondená e stat antiguo di Babilonia tabata pasobra su habitantenan tabata praktiká astrologia, ku ta un forma di adivinashon òf wakmentu di destino. (Isaías 47:11-15) Testigunan di Yehova no ta duna demasiado importansia na orígen di delaster un kustumber òf fiesta, pero ora Beibel ta duna instrukshon asina kla tokante un asuntu, nos no ta keda sin hasi kaso di esei.

2.   E kristiannan di promé siglo no a selebrá kumpleaño. Segun un ensiklopedia, e promé kristiannan “a konsiderá selebrashon di kumpleaño di kualke hende komo un kustumber pagano.” (The World Book Encyclopedia) Beibel ta indiká ku e apòstelnan, i otro kristian ku Hesus mes a siña direktamente a laga un patronchi ku tur kristian mester sigui.—2 Tesalonisensenan 3:6.

3.   E úniko dia ku un kristian mester konmemorá no tin di haber ku un dia di nasementu, sino ku un dia di morto, esta, e morto di Hesus. (Lukas 22:17-20) Esei no mester ta un sorpresa pa nos, pasobra Beibel ta bisa ku “e dia di un hende su morto ta mihó ku e dia di su nasementu.” (Eklesiástes 7:1) Ya pa final di Hesus su bida riba tera, el a traha un bon nòmber kaba serka Dios, i asina e dia di su morto a bira mas importante ku e dia di su nasementu.—Hebreonan 1:4.

4.   Beibel no ta bisa niun kaminda ku un sirbidó di Dios a selebrá kumpleaño. Akaso ta pa deskuido Beibel no ta menshoná esei? Nò, pasobra Beibel ta papia sí tokante dos selebrashon di kumpleaño di hende ku no tabata sirbi Dios. Ademas, Beibel ta presentá tur e dos selebrashonnan ei den un lus negativo.—Génesis 40:20-22; Marko 6:21-29.

 Testigunan di Yehova, meskos ku tur bon mayor, ta stima nan yunan i ta demostrá esei durante henter aña. Por ehèmpel, nan ta duna nan yunan regalo i ta hasi fiesta pa nan. Nan ta purba di sigui e ehèmpel perfekto di Dios ku ta duna su yunan kos bon na tur momento. (Mateo 7:11) Pues, e yunan di Testigunan di Yehova no ta sinti ku nan ta pèrdè nada, manera nos por mira den e siguiente komentarionan:

•   “Ta mas dushi pa haña un regalo ora ku bo no ta spera esei.”—Tammy, 12 aña.

•   “Mi no ta haña regalo dia di mi kumpleaño, pero mi mayornan ta duna mi regalo otro dia. Mi ta gusta esei mas, pasobra e ora ei e ta un sorpresa.”—Gregory, 11 aña.

•   “Bo ta kere kome un bolo i kanta un kantika den 10 minüt ta un fiesta? Bo tin ku bin mi kas pa bo mira kiko ta un fiesta!”—Eric, 6 aña.