Testigunan di Yehova ta sigui konseho di Beibel pa no defendé nan mes ki ora ku hende akusá nan di algu òf ridikulisá nan. Por ehèmpel, un proverbio di Beibel ta bisa: “Esun ku korigí un hasidó di bofon ta trese desonor riba su mes.” (Proverbionan 9:​7, 8; 26:4, Beibel Santu) En bes di diskutí òf preokupá muchu tokante akusashonnan falsu, nos ta konsentrá nos esfuersonan riba agradá Dios.​—Salmo 119:69.

 Ta klaru ku tin “un tempu pa keda ketu i un tempu pa papia.” (Eklesiástes 3:7, Beibel Santu) Nos ta papia ku hende ku ta interesá pa haña e bèrdat, pero nos ta evitá di drenta den diskushon ku no tin sentido. Asina nos ta sigui e siñansa i ehèmpel di Hesus i e promé kristiannan.

•   Hesus no a kontestá nada ora hende a akus’é falsamente dilanti di Pilato. (Mateo 27:11-​14; 1 Pedro 2:​21-​23) Hesus no a kontestá tampoko ora nan a akus’é di ta un buraché i haragan. Mas bien, su akshonnan a papia p’e, na armonia ku e prinsipio akí: “Sabiduria ta demostrá pa medio di su obranan ku e ta hustu.” (Mateo 11:19) Pero ora sirkunstansia a eksigí esei, ku kurashi el a respondé hende ku a kalumni’é.​—Mateo 15:​1-3; Marko 3:​22-​30.

   Hesus a siña su siguidónan pa nan no desanimá ora hende akusá nan falsamente. El a bisa: “Felis boso ta ora hende ta insultá boso i ta persiguí boso i ta saka tur sorto di mentira malisioso kontra boso pa mi motibu.” (Mateo 5:​11, 12) Pero Hesus a bisa tambe ku ora e akusashonnan ei habri kaminda pa su siguidónan duna un testimonio, e lo kumpli ku e promesa akí: “Lo mi duna boso palabra i sabiduria ku tur boso opositornan huntu lo no por resistí ni kontradisí.”​—Lukas 21:12-​15.

•   Apòstel Pablo a konsehá kristiannan pa evitá diskushon sin sentido ku opositor. El a deskribí e diskushonnan ei komo kosnan ku “no ta di ningun probecho i no tin balor.”​—Tito 3:9; Romanonan 16:17, 18.

•   Apòstel Pedro a animá kristiannan pa defendé nan fe ora ta posibel. (1 Pedro 3:​15) Sin embargo, el a rekonosé ku hopi bes akshon ta bisa mas ku palabra. El a skirbi: “Hasi bon i asina tapa boka di hende irasonabel ku ta papia kos sin sentido.”​—1 Pedro 2:​12-​15.