Nos no ta evitá kontakto ku Testigunan di Yehova batisá ku no ta prediká mas òf ku no ta asosiá muchu ku nos mas. Al kontrario, nos ta hasi esfuerso pa buska kontakto ku nan pa purba rebibá nan interes den kosnan spiritual.

 Si un Testigu batisá kometé un piká grave, nos no ta ekspuls’é outomátikamente for di e kongregashon. Sinembargo, ora un Testigu batisá krea e kustumber di violá e normanan di Beibel sin arepentí, lo ekspuls’é for di kongregashon i evitá tur trato kuné. Beibel ta bisa klaramente: “Saka e malbado for di meimei di boso.”—1 Korintionan 5:13.

 Kiko ta para di un hòmber ekspulsá kende su kasá i yunan ta Testigu di Yehova ainda? E lasonan religioso ku e tabatin ku su famia a kambia, pero e lasonan familiar ta keda. E relashon matrimonial i e trato di kariño ku su yunan ta sigui normal.

 Personanan ekspulsá por asistí na nos reunionnan. Ademas, nan por haña yudansa spiritual di ansiano di kongregashon, si nan ta deseá esei. E meta ta pa yuda nan kumpli ku e rekisitonan pa bira un Testigu di Yehova atrobe. Esnan ekspulsá ku ta rechasá kondukta inmoral i tin e deseo di biba konforme e prinsipionan bíbliko por forma parti atrobe di e kongregashon.