Komo Testigu di Yehova nos ta purba di fortalesé nos mes famia i famia di otro hende. Nos ta respetá Dios komo Kreador di famia. (Génesis 2:​21-​24; Efesionan 3:​14, 15) Den Beibel, Dios ta siña hende rònt mundu vários prinsipio pa nan por tin un matrimonio fuerte i felis.

 Nos ta hasi esfuerso pa sigui konseho di Beibel, pasobra esei ta yuda nos bira mihó esposo, esposa i mayor. (Proverbionan 31:10-​31; Efesionan 5:22–6:4; 1 Timoteo 5:8) E sabiduria ku tin den Beibel ta yuda hende tin éksito den nan famia, asta miembro di famia ku ta pertenesé na otro religion. (1 Pedro 3:​1, 2) Laga nos wak loke algun hende ku no ta Testigu di Yehova a yega di bisa tokante nan kasá ku a bira Testigu di Yehova:

•   “Durante nos promé seis añanan di matrimonio, nos tabatin hopi diskushon i frustrashon. Pero, despues ku Ivete a bira un Testigu di Yehova, e tabata mas kariñoso i tabatin mas pasenshi. E kambionan ku el a hasi a salba nos matrimonio.”​—Clauir, Brazil.

•   “Mi tabata kontra ku Chansa, mi esposo, a kuminsá studia Beibel ku Testigunan di Yehova, pasobra mi tabata pensa ku nan ta kibra famia. Mas despues, mi a ripará ku Beibel realmente a yuda nos matrimonio.”​—Agness, Zambia.

 Nos trabou di prediká ta yuda hende apliká sabiduria ku tin den Beibel pa:

•   Skohe un bon kasá

•   Trata ku e promé aña di matrimonio

•   Mantené un bon relashon ku bo kasá su mayornan

•   Anda ku plaka

•   Stòp di diskutí

•   Siña pordoná

•   Eduká bo yunan

 Esei por pasa. Por ehèmpel, na 1998 un investigashon di e kompania Sofres a bisa ku 1 di kada 20 matrimonio kaminda un di e kasánan tabata un Testigu di Yehova a enfrentá problema serio ora un di nan a kambia di religion.

 Hesus a bisa ku hende ku sigui su siñansanan tin biaha lo a haña nan ku problema den famia. (Mateo 10:32-​36) Historiadó Will Durant a remarká ku bou di e Imperio Romano “a akusá e kristiannan di kibra famia,” a i den nos tempu algun Testigu di Yehova ta enfrentá e mesun akusashon. Pero, esei ke men ku e persona ku ta Testigu di Yehova ta kousa e problemanan?

 Ora Korte Europeo di Derecho Humano a dikta sentensia tokante un akusashon ku Testigunan di Yehova ta kibra famia, nan a bisa ku hopi bes e miembronan di famia ku no ta Testigu di Yehova ta e personanan ku ta kousa problema debí ku nan no ta “aseptá ni respetá e libertat ku un miembro di famia tin pa praktiká su religion.” Korte a sigui bisa: “E situashon akí ta komun entre tur matrimonio den kua e pareha tin otro religion, i esei ta konta pa e Testigunan di Yehova tambe.” b Maske e Testigunan di Yehova ta enfrentá difikultat pasobra nan tin otro religion, nan ta hasi esfuerso pa sigui konseho di Beibel: “No paga malu ku malu. Trata di hasi loke ta bon den bista di tur hende. Si ta posibel, te asina leu ku ta dependé di boso, keda na pas ku tur hende.”​—Romanonan 12:17, 18.

 Un Testigu di Yehova ta sigui e mandamentu di Beibel pa kasa “basta ta den Señor,” esta, pa kasa ku un persona ku tin e mesun kreensianan. (1 Korintionan 7:​39) E mandamentu akí ta bíbliko i práktiko. Por ehèmpel, un artíkulo den Journal of Marriage and Family di 2010 ta bisa ku ta mas probabel pa pareha kasá ku tin e mesun religion, kustumber i kreensia tin un bon relashon ku otro. c

 Sinembargo, Testigunan di Yehova no ta animá otro Testigu di Yehova pa separá di nan kasá ku no ta Testigu di Yehova. Beibel ta bisa: “Si un ruman hòmber tin un esposa ku no ta kreyente i tòg e esposa ta di akuerdo pa biba kuné, laga e esposo no bandon’é; i si un muhé tin un esposo ku no ta kreyente i tòg e esposo ta di akuerdo pa biba kuné, lag’é no bandoná su esposo.” (1 Korintionan 7:​12, 13) Testigunan di Yehova ta obedesé e mandamentu akí.