Testigunan di Yehova tin rèspèt pa loke siensia a logra i ta aseptá konklushon sientífiko ku ta bon dokumentá.

 Segun un dikshonario, siensia ta e esfuerso pa yega na konosementu tokante naturalesa i fenómeno di naturalesa ku e meta pa komprondé kon nan ta hinká den otro. (Collins Cobuild Advanced Learner’s English Dictionary) Aunke Beibel no ta un buki di siensia, e ta animá hende pa studia e mundu di naturalesa i benefisiá di loke e sientífikonan a deskubrí. Wak algun ehèmpel:

•   Astronomia: “Hisa bo wowo wak ariba i mira ta ken a krea e streanan aki; Esun ku ta guia nan ehérsito segun nan kantidat, ta e ta yama nan tur na nan nòmber; pa motibu di e grandesa di su forsa i su poder ningun di nan no ta falta.”​—Isaías 40:26, Beibel Santu.

•   Biologia: Rei Sálomon “tabata papia di e palunan, di e palu di seda ku tin na Líbano te na e hisòp ku ta krese na muraya; tambe e tabata papia di e bestianan, di para, bestia ku ta lastra i piská.”​—1 Reinan 4:33, Beibel Santu.

•   Medisina: ‘Hesus a kontestá nan: “Hende ku ta bon di salú no tin mester di dòkter, ma hende malu sí.’—Lukas 5:31.

•   Meteorologia: “Bo a yega di drenta e depósitonan di sneu, òf bo a mira e depósitonan di hagel, ku mi tin reservá pa e tempu di angustia, pa e dia di guera i bataya? Unda e lugá ta, kaminda lus ta wòrdu dividí, òf bientu di pariba ta wòrdu plamá riba tera?”—Yòb 38:22-24, Beibel Santu.

 Nos publikashonnan ta mustra rèspèt pa siensia i nos ta publiká artíkulo tokante naturalesa i logronan sientífiko. Mayornan Testigu di Yehova ta animá nan yunan pa hasi nan bèst na skol di manera ku e yunan por komprondé loke tin den e mundu rònt di nan mas mihó. Algun Testigu di Yehova ta traha den diferente área di siensia por ehèmpel biokímika, matemátika i físika.

 Nos no ta kere ku siensia por kontestá tur pregunta ku nos tin. a Por ehèmpel, geólogonan por bisa nos kiko ta e komponentenan di nos tera, i biólogonan por splika kon e kurpa humano ta funshoná. Pero kon bin tera ta un lugá perfekto pa biba? I kon por ta ku kurpa humano ta funshoná asina bon?

 Nos a yega na e konklushon ku Beibel so por duna kontesta satisfaktorio pa e preguntanan asina. (Salmo 139:13-16; Isaías 45:18) P’esei nos ta kere ku un bon edukashon ta inkluí tantu siensia komo siñansa di Beibel.

 Tin biaha por parse ku siensia ta kontradisí loke Beibel ta bisa. No opstante, na okashon asina hopi biaha hende a malinterpretá loke Beibel realmente ta siña. Por ehèmpel, Beibel no ta siña ku Dios a traha tera den seis dia di 24 ora.​—Génesis 1:1; 2:4.

 Algun teoria ku hopi hende ta konsiderá sientífikamente probá, falta sufisiente evidensia; sientífikonan respetá ta rechasá e teorianan ei. Por ehèmpel, komo ku e mundu di naturalesa ta duna evidensia di un diseñadó inteligente, nos ta kompartí e punto di bista di hopi biólogo, kímiko i otro hende ku a konkluí ku organismo bibu no a evolushoná pa medio di mutashon pa kasualidat i selekshon natural.