Mito: Testigunan di Yehova no ta buska kuido médiko pasobra nan no ta kere den medisina.

 Bèrdat: Testigunan di Yehova ta hasi tur loke ta posibel pa haña bon kuido médiko pa nan mes i nan famia. Ora nos tin problema di salú òf mester operá, nos ta papia ku e dòkter- i siruhanonan eksperensiá ku por duna tratamentu médiko sin sanger. Nos ta masha gradisidu ku e avansenan riba tereno di medisina. Es mas, awor henter komunidat por benefisiá di tratamentu médiko sin sanger ku a ser desaroyá pa yuda pashèntnan ku ta Testigu di Yehova. Awendia, tur hende por skohe pa un tratamentu sin kore e riesgonan ku ta relashoná ku transfushon di sanger, enfermedatnan kontagioso via sanger, reakshonnan di e sistema inmunológiko i erornan humano.

 Mito: Testigunan di Yehova ta kere ku fe lo sana nan malesa.

 Bèrdat: Nos no ta praktiká sanashon.

 Mito: Tratamentu alternativo ku no ta kontené sanger ta masha karu.

 Bèrdat: Tratamentu médiko sin sanger ta ekonómiko. a

 Mito: Hopi Testigu di Yehova, inkluso mucha, ta muri tur aña pasobra nan ta nenga transfushon di sanger.

 Bèrdat: E deklarashon akí no tin ningun base. Siruhanonan regularmente ta hasi proseduranan kirúrgiko mas kompliká, manera operashon di kurason, operashon ortopédiko i transplante di órgano sin usa transfushon di sanger. b Pashèntnan, inkluso mucha, kendenan no ta tuma transfushon di sanger ta rekuperá meskos òf asta mas lihé ku esnan ku ta aseptá transfushon di sanger. c En todo kaso, ningun hende por bisa ku tur siguransa ku un pashènt lo muri pasobra e ta nenga sanger òf lo biba pasobra e ta asept’é.

 E motibu prinsipal ta religioso i no médiko. Tantu e Tèstamènt Bieu komo e Tèstamènt Nobo ta manda nos klaramente pa apstené di sanger. (Génesis 9:4; Levítiko 17:10; Deuteronomio 12:23; Echonan 15:28, 29) Ademas, Dios a bisa ku sanger ta representá bida. (Levítiko 17:14) P’esei nos ta nenga di aseptá sanger no solamente komo obedensia na Dios, sino tambe pasobra nos ta respet’é komo e Dunador di bida.

 Un tempu, dòkternan tabata pensa ku strategianan alternativo pa transfushon, ku ta ser yamá tambe kuido médiko sin sanger, tabata peligroso, asta nan a konsider’é suisidio. Pero nan punto di bista a kambia e último añanan. Por ehèmpel, na 2004, a publiká un artíkulo den un revista médiko ku a bisa: “Hopi prosedura ku a ser desaroyá pa pashèntnan Testigu di Yehova lo bira normal den e próksimo añanan.” d I na 2010, un artíkulo den e revista Heart, Lung and Circulation a bisa ku “‘tratamentu mediko sin sanger’ no mester ta pa Testigunan di Yehova so, pero mester bira parti integral di tratamentunan di bida diario.”

 Awe míles di dòkter rònt mundu ta apliká téknikanan pa minimisá pèrdida di sanger durante operashonnan kompliká sin transfushon. Asta paisnan den desaroyo ta usa alternativanan pa transfushon di sanger i hopi pashènt ku no ta Testigu di Yehova ta skohe pa nan.