Sí, hopi biaha Testigunan di Yehova ta yuda ora tin un desaster natural. Nos ta yuda tantu esnan ku ta Testigu komo esnan ku no ta Testigu. Esei ta na armonia ku loke Beibel ta instruí nos na Galationan 6:10, ku ta bisa: “Laga nos hasi loke ta bon pa ku tur hende, pero spesialmente pa ku nos rumannan den fe.” Ademas, nos ta purba di duna e víktimanan e konsuelo i yudansa emoshonal ku na e momento ei nan tin mas mester di dje.—2 Korintionan 1:3, 4.

 Despues di un desaster natural, e ansianonan di e kongregashonnan den e área afektá ta hasi esfuerso pa lokalisá kada miembro di nan kongregashon pa hasi sigur ku nan ta sano i salvo i tambe pa haña sa si nan tin mester di yudansa. E ora ei e ansianonan ta informá e sukursal lokal di Testigunan di Yehova tokante e situashon i tokante e yudansa ku a ser duná te na e momento ei.

 Si e kongregashonnan lokal no por duna tur e yudansa nesesario, e Kuerpo Gobernante di Testigunan di Yehova ta hasi areglo pa perkurá loke ku ta falta. Na e mesun manera e kristiannan di promé siglo a yuda e rumannan ora tabatin skarsedat di kuminda. (1 Korintionan 16:1-4) E sukursal lokal ta nombra Komiténan di Ousilio pa organisá i dirigí e trabou. Testigunan di Yehova di otro pais boluntariamente ta duna di nan tempu i rekurso pa bai yuda.—Proverbionan 17:17.

 Un di e maneranan ku nos ta usa e donashonnan ku sukursal di Testigunan di Yehova ta haña ta pa yuda e víktimanan di desaster natural. (Echonan 11:27-30; 2 Korintionan 8:13-15) Komo ku e trabou ta ser hasí pa boluntarionan, e fondo pa yuda ora di desaster natural ta bai kompletamente pa yuda e víktimanan, i no pa gastunan atministrativo. Nos ta usa tur donashon na un manera responsabel.—2 Korintionan 8:20.