Uriul er a rak er a 4026 B.C.E.

“A bersoech” a millasem er a llemeltel me a rolel a Jehovah a longedereder. Me a Jehovah a tilbir el kmo, ngmo er ngii a ‘uldidellel a rasech’ el mo okngemedii a bersoech el ngii a Satan. (Genesis 3:1-5, 15) Nguaisei, engdi a Jehovah a mla mechititerir a rechad me ngdi tir el mengedereder er tir er cheungel a klisichel a bersoech.

Rak er a 1943 B.C.E.

A Jehovah a dilu er a Abraham el kmo a ta er a ngelekel a mo ngike el telbiil el ‘uldidellel a rasech.’​—Genesis 22:18.

Uriul er a rak er a 1070 B.C.E.

A Jehovah a ulterekeklii el mo er a King David me a ngelekel er a Salomon el kmo ngike el telbiil el ‘uldidellel a rasech’ a mei el okiu a telungalek er tir.​—2 Samuel 7:12, 16; 1 King 9:3-5; Isaia 9:6, 7.

Rak er a 29 C.E.

A Jehovah a uluuchais el kmo a Jesus a ngike el telbiil el ‘uldidellel a rasech’ el ngii a mo oudiukes er a kingelel a David er a omengedereder.​—Galatia 3:16; Lukas 1:31-33; 3:21, 22.

 Rak er a 33 C.E.

A bersoech, el ngii a Satan a millasem el merrob er ngika el telbiil el ‘uldidellel a rasech’ er a lokodir a Jesus. E a Jehovah a ulekisii el mo er a eanged e kilengei er a kerresel a tengetengel, el ngii a uchul me ngsebeched el musubes er a kngtid e dirrek el uchul me a rengelekel a Adam a sebechir el mo nguu a diak a ulebengelel el klengar.​—Genesis 3:15; Rellir 2:32-36; 1 Korinth 15:21, 22.

Bekord el rak er a 1914 C.E.

A Jesus a uldikii a Satan er a eanged el mei er a chutem el kirel a kedeb el taem.​—Ocholt 12:7-9, 12.

Ngar medad el taem

A Jesus a mo kulebsengii a Satan el 1,000 el rak, e a uriul e ngmo okngemedii me a lechub e ngrukemii a bdelul el uai a losaod er ngii a bades. E a dimla moktek er a Jehovah el kirel tia el chutem me a klechad a mo tmaut, me a ngklel a mo mechedaol, me a rokui el chad a mo kongei el chederedall er cheungel a omengederederel.​—Ocholt 20:1-3, 10; 21:3, 4.