NGAR er a babier er a Ocholt, e ngbetok a okesiu el kired el mo medengei el kmo ngomtechei a ngerang. El uai tiang, ngmesaod el kirel a ta el redil el prostitute el llechukl er a medal a bdelul a ngakl el kmo “Kloul Babilon.” Ngika el redil a dengchokl er a bebul a “beluu, ma re chad.” (Ocholt 17:1, 5, BT, 15) Me ngdiak el sebechel a chad el dengchokl er a bebul a beluu me a rechad a uchul, me kede medengei el kmo a Kloul Babilon a ngar er ngii a lomekesiu er ngii. Me ngika el prostitute ngomtechei er a ngerang?

Ngar er a Ocholt 17:18, BT, e ngmelekoi el kirel ngika el osisiu el redil el kmo, ng “kloul mats el mengedereder rar king ra belulechad.” Tia el tekoi el “mats” a ochotii el kmo, tia cheldebechel er a rechad. Me ngika el “kloul mats el mengedereder rar king ra belulechad” a ngosukid el mo mesa el kmo ngika el redil el Kloul Babilon a ngar er ngii a klisichel el meliuekl er a beluulechad el rokir. Ngsebeched el melekoi el kmo ngcheldebechel er a beluulechad. Ngua ngera el cheldebechel? Ngcheldebechel er a klechelid. Ka me bo domes a bebil er a bades el ngar er a babier er a Ocholt el mo ngosukid el mtebengii tiang.

A cheldebechel a sebechel el kirel a balatiks, ngsiobai, me a lechub e ngklechelid. Engdi ngika el redil el ngklel a Kloul Babilon a diak el sebechel el melutk el kirel a cheldebechel er a balatiks e le Tekingel a Dios a melekoi el kmo, “a re king er a  beluulchad” el chelechad er a balatiks er a beluulechad, “a mirruul a deleboes el obengkel.” Ngika el redil a meruul a deleboes e le ngomak a deleuill el lobengterir a remerreder er a beluulechad e meruul a ngii di el tekoi me bo el sebechel el ngar er ngii a klisichel er tir. Sei a uchul me ngokedongall el “ngikel meraelchisel el prostitute.”​—Ocholt 17:1, 2; Jakobus 4:4.

Me a Kloul Babilon a dirrek el diak el sebechel el cheldebechel er a siobai e le “re chad er a omengereker er a beluulechad” el chelechad er a siobai er a beluulechad, a mo lmangel el mekngit a rengrir er a telemellel. Me nguaisei, a bades a mesaod el kmo tirka el king me a rechad er a omengereker a di dul mla er “cheroid” e omes er ngii. (Ocholt 18:3, 9, 10, 15-17) Me ngkmal sebeched el melekoi el kmo, a Kloul Babilon a diak el cheldebechel er a balatiks me a siobai e ngbai cheldebechel er a klechelid.

Me a olechotel a kmo a Kloul Babilon a cheldebechel er a klechelid a dirrek el sebeched el mesa el ngar er a bades el melekoi el kmo, ngmengeuid er a rechad er a beluulechad el ‘olab a olai er ngii.’ (Ocholt 18:23) A olai a tekoi el chelsechusem er a remekngit el anghel e uldimukl er a tekoi er a klechelid, me a uchul me ngdiak lemechas a rengud er a Biblia a lomekedong er a Kloul Babilon el “delengcheklel a remekngit el anghel.” (Ocholt 18:2, NW; Duteronomi 18:10-12) Tia el cheldebechel a dirrek el kmal blak a rengul el omtok er a mera el klechelid, e oldechelakl er a “re profet ma re chedal a Dios.” (Ocholt 18:24) A Babilon a kmal mederdirk a rengul er a mera el klechelid me a uchul me ngkmal meringel el omekcharm e omekoad er a re “blak rengrir el oltirakl er a Jesus.” (Ocholt 17:6) Me ngika el redil el ngklel a Kloul Babilon a bleketakl el lomtechei er a cheldellel a rokui el klsuul el klechelid, el ngii a uldimukl a rokui el klechelid el diak loltirakl er a Jehovah el Dios.