15. Bo Ledeu a Rengum er a Urerem
1 A JEHOVAH A RIRELLID EL NGAR NGII A URUNGULED EL SOAD EL OUREOR
“Kede rokui el kired el mengang e melim, e oldeu a rengud er a ikel bla doureor el kirel. Ng sengk er a Dios.”—Olisechakl 3:13
Ngera uchul me a ureor a sengk el mlara Dios?
-
Genesis 1:1, 31; Olisechakl 2:24; Johanes 5:17
A Jehovah a meringel el oureor. Ngdmeu a rengul er a urerel e dirrek el soal a bo lungil a rengud er a urered.
-
Osisechakl 8:22-31; Kolose 1:15-17
A Jesus me ngdirrek el kmal mle meringel el oureor er a lengar er a eanged me sera lengar tia el chutem.
-
Markus 6:3; Lukas 21:37, 38; Johanes 4:31-38; 17:4
A Jesus a kmal mle ungil oureor e rirekui a rokui el ngerechelel el mo lmuut er aike el taem el mle meringel er ngii.
2 NGSEBECHEL LMUUT EL MO UNGIL A ULDESUED EL KIREL A URERED
“Mochotii er ngak a chad el ungil er a urerel, e ak mo ochotii er kau a lmuut el ungil chad e rredemelel a teloi er a re king.”—Osisechakl 22:29
Ngera mo ngosukid el mo oldeu a rengud er a urered?
-
Osisechakl 12:24; Kolose 3:22-24; Hebru 13:18
Alta ngdiak el sebeched el ngodechii a urered, engdi ngsebechel mo ungil a uldesued el kirel. Ngdirrek el soad el mo melemalt a omerelled e mo blak a rengud loureor.
-
Osisechakl 27:11; 1 Timothy 5:8; 1 Petrus 2:12
Sel bo mungil mesiou er a telungalek er kau, e ke ochotii el kmo ke olengesenges er a Dios. E a ungil omerellem er a ureor a kobkellii a Jehovah.
-
Exodus 20:13-15; Osisechakl 2:6; Rom 14:19-22; Efesus 5:28–6:4; 1 Johanes 5:3; Ocholt 18:4
A Biblia a ngosukid el mo mesa el kmo a rolel a ureor el dengiltii a locha ngar ngii a bo lerellii er kid, telungalek er kid, me a rudam me a rudos, e a ngaruchei er ngii el rokui, a Jehovah.
3 SEL DOTEREKOKL A MEKLOU A ULTUTELEL EL TEKOI E NGSEBECHEL NGOSUKID EL MO OLDEU A RENGUD ER A URERED
“Bo le sebechiu el ngmilt a ikel kot el ungil.”—Filipi 1:10
Ngera kirel mo meklou a ultutelel el tekoi er a klengar er kid?
-
Psalm 37:25; Osisechakl 3:5, 6; 1 Petrus 5:7
Moumerang el kmo a Jehovah medengei aike el mousbech er a bek el sils.
-
Mateus 6:25-32; 1 Timothy 6:8-10; Hebru 13:5
Bo lungilbesul er a rengum aike el ngar ngii er kau.
-
Osisechakl 10:22; Mateus 6:33; 28:19, 20; Hebru 10:24, 25
Bo leblak a rengum el mesiou er a Jehovah e bom teloi er a ureor er a berkel a ungil chais. Tiaikid a kot el klou a ultutelel el ureor el sebeched el meruul er ngii.
