“A klengar er a bek el outeliil a ngar a rasech.”​—Levitikus 17:11

Ngua ngera osengel a Jehovah el kirel a rasech?

• Levitikus 17:10; Osisechakl 13:16; Rellir 15:20; Rom 12:2

  Nglocha mo duubech a blekeradel el mo kired el meruul a meklou a ultutelel el omelilt el kirel a rolel a ukeruul el ousbech a rasech, el uldimukl er a ker el kmo kede mo kongei a dertelngimech el klekedellel a rasech me a lechub e ngdiak. Ngdiak el kirir a rebebil er a rechad el mo meruul aika el omelilt el kired. Me a uchei er a leduubech a chouaisei el tekoi, e ngkired el meluluuch el kirel a ulekrael e meruul a research.

• Genesis 9:4, 5, 9; Duteronomi 12:16; Rellir 15:28, 29

  Ngar er a Biblia, e a rasech a omtechei er a klengar. A llechul a Dios el kirel a rasech a dirkak lemengodech. Ngosisiu er a taem er a Noah el mo lmuut er a taem el lulemesterir a rechad er a Israel a Llach er a Moses el mei er a taem er a Rekristiano.

“A rolek ma uldesuek a kuk ngar bab er a roliu ma uldesuiu.”​—Isaia 55:9

Ngera bebil er a rolel e kede ochotii el kmo kede omes er a klengar el mekreos?

• Exodus 21:22, 23, NW

  A klengar er a rebek el chad a klou a ultutelel er a osengel a Jehovah. Me a omelecheb er a rengalek a kmal mekngit e le Dios a omes er a dirkak lemechell el ngalek el ngar ngii a klengar er ngii.

• Psalm 103:8-14; Rellir 3:19; Efesus 1:7

  A lsekum a redil a tilechebii a ngelekel er a uchei engdi chelechang e ngmla obult er a omerellel e ouuchel er a rengul, e a Jehovah a mo ousubes er ngii.

• Psalm 11:5; Olisechakl 11:9, 10

  Kede olecholt el kmo kede oba omengull el kirel a klengar lokiu sel dongeroid er kid er a kdekudel el klekool me a kengaol el omeruul. Kede dirrek el kerekikl a blid me a mlid me lak bo luchul a telemellir a rechad.

“Ak milsa ngiil redil el cheltelaol er a rsechir a re chedal a Dios.”​—Ocholt 17:6

Ngera uchul me a beluulechad er a Satan a chelsechusem er a rsechir a rechad?

• Ocholt 18:2, 4, 9, 24

  Klechelid, balatiks, me a rechorecherreng a uchul me a rebetok el miliol a mla mad.

• Mateus 24:14; Johanes 17:16; Rellir 20:26, 27

  A Rekristiano a melemolem el diak lomekbitang e diak lolengeseu a ngii di el cheldebechel el melisiich a mekemad me a lechub e ngkoadelchad. Kede olengeseu er a rechad el mo nguu a klengar lokiu sel douchais er a klumech er a Renged el mo er tir.