A Dios a outkeu er a rokui el chad el mo kmeed er ngii el oeak a nglunguuch. (Psalm 65:2) Nguaisei, engdi ngdiak lorrenges me a lechub e lekengei a rokui el nglunguuch. El uai tiang, a chad el mekngit a omerellel el mo er a bechil a sebechel el mo diak lemorrenges a nglunguchel. (1 Petrus 3:7) A Dios a dirrek el dimlak lorrenges a nglunguchir a rechad er a Israel e le te millemolem el meruul a mekngit. Engdi ngmo orrenges a nglunguchir tirke el obult er a oberaod el klengit el lurruul. Nguaisei, a nglunguuch a kmal ileakl el techall el dobang.​—Monguiu er a Isaia 1:15; 55:7.

Momes er a video el A Dios, Ngorrenges a Rokui el Nglunguuch?

A nglunguuch a ta er a tekoi el doruul er ngii er a omengull er kid, me ngdi ta el Jehovah el Ngike el Ulemeob er kid a doluluuch el mo er ngii. (Mateus 4:10; 6:9) Kid a dirrek el diak demecherrungel a uchul, me ngkired el meluluuch el oeak a ngklel a Jesus, e le ngmlad el kirel a kngtid. (Johanes 14:6) A Jehovah a diak el soal a domelekl a nglunguuch el bla bo dodengei me a lechub aike el llechukl er a babier er a nglunguuch. Ngbai soal a doluluuch el mera el ngar er a rengud.​—Monguiu er a Mateus 6:7; Filipi 4:6, 7.

Ngike el Ulemeob er kid a sebechel el orrenges a nglunguuch el ngar er a rengud. (1 Samuel 1:12, 13) Ngoutkeu er kid el mo meluluuch er a ngii di el taem, el uai sel letutau me a lekebesengei, me sel domengur, me sel dechelebangel a mondai.​—Monguiu er a Psalm 55:22; Mateus 15:36.

Ngmeringel a dolekeed er kid er a Dios e le kede kiei er a delongelir a rechad el diak loltirakl a llechul a Dios e diak loumerang a telbilel el kirel a budech el mo er ngii er tia el chutem. (2 Timothy  3:1, 4; 2 Petrus 3:3, 13) Me kede ousbech er a omelisiich er a rekldemed er a klaumerang, me tir me te dirrek el ousbech er kid.​—Monguiu er a Hebru 10:24, 25.

A dobengterir a rechad el betik a rengrir er a Dios e ngngosukid el mo kmeed er Ngii. Aike el miting er a Resioning er a Jehovah a meskid a ungil el techall el mo ngmai a klungioled er a klaumerang er a rebebil.​—Monguiu er a Rom 1:11, 12.

Ngsebechem el mo kmeed er a Jehovah el oeak sel molebedebek aike el bla msuub er a Tekingel. Momtab aike el tekoi el bla leruul me a ulekrael er ngii me a telbilel. A nglunguuch me a omelebedebek a ngosukid el mo medengelii a klungel a ultutelel a bltkil a rengul a Dios me a llemesel a rengul.​—Monguiu er a Josua 1:8; Psalm 1:1-3.

A lsoam el mo kmeed er a Dios e ngkirem el mo oumerang er ngii. El ua dellomel el ousbech a koias, a klaumerang er kid a kired el blechoel el melisiich er ngii el oeak sel dolebedebek a uchetemel aike el tekoi el doumerang.​—Monguiu er a Mateus 4:4; Hebru 11:1, 6.

A Jehovah a omekerreu er tirke el betik a rengrir er ngii. Ngsebechel el omekerreu er tir er a ngii di el tekoi el sebechel el tomellii a klaumerang er tir me a omeltkir el kirel a diak a ulebengelel el klengar. (Psalm 91:1, 2, 7-10) Ngdirrek el omeklatk er kid el kirel a rolel a klengar el ngar er ngii a bo letemellii er a bedenged me a deurreng er kid. A Jehovah a olisechakl er kid el kirel a kot el ungil el rolel a klengar.​—Monguiu er a Psalm 73:27, 28; Jakobus 4:4, 8.