1. Ngmle uangera chedaol sils er a Pentekost?

 NGMESEKED a Jerusalem er a rechad el kmal ungil a rengrir. a A chat a merael er a olengetongel er a templo e a re Levait a mengitakl er a Hallel (Psalm 113 el mora 118). A rechad el mle oldingel a mererorael er a beluu. Te mla er cheroid el mei. A remlei el ngar er a Elam, Mesopotamia, Kapadosia, Pontus, Ekipten, me a Rom. b Ngera me a beluu a kmal meseked? Ngtemel a Pentekost me a lechub e ng “sel kot el sils er a chedaol sils er Omeridm.” (Ule. 28:26) Tia el chedaol sils el ngar ngii er a bek el rak a olechotel a ulebengelel a omeridm el barley e mechelii a omeridm el wheat. Ngsils er a deurreng.

 2. Ngera el mengasireng el tekoi a dilubech er a Pentekost 33 C.E.?

² Ngar er a bekord el etiu el klok er a tutau er tiakid el sils er a 33 C.E., e ngdilubech a mengasireng el tekoi el rechad a mo mesaod er ngii el mei er chelecha el taem. Ngdi mle kiul el “mor ngii a orreek er a eanged el ua rrekel a mesisiich el eolt.” (Rel. 2:2) Tia el reek a milekekii tia el blai el ble lekldibel er ngii a rebekord el 120 el disaiplo er a Jesus. E ngii a duubech a ongasireng el tekoi. Chur el kora ua ngau a mlo chemolt e mlo medechel er bebul a derta er tirka el disaiplo. c A redisaiplo “meltuchel er a Chedaol Reng” e mocha melekoi a tekoi er a ngodech el beluu! Me a redisaiplo er a letobed e longedecheduch er tirka el mle oldingel er a beluu er a rael er a Jerusalem, e ngkmal mechas a rengrir le ngsebechir el mengedecheduch er tir lousbech a tekingir! A derta er tir ulerrenges er tir el “mengedecheduch a tekoi er a belual.”​—Rel. 2:1-6.

 3. (a) Ngera uchul me ngsebeched el melekoi el kmo a Pentekost 33 C.E. a klou a ultutelel el sils er a reksi er a mera el omengull? (b) Ngmekera cheldechedechal a Petrus e ngar ngii a rolel el mora usbechel a “kiis er a Rengedel a eanged”?

³ Tia el mengasireng el tekoi el dilubech a kmal klou a ultutelel el  tekoi el dilubech er a reksi er a mera el omengull, e le ngmilechii a renged er a Israel er a Dios el ngii a ongdibel er a rengellitel el Kristiano. (Gal. 6:16, BT) Engdi ngngar ngii a lmuut el bebil er a tekoi el dilubech. A Petrus er a longedecheduch er a seked er tiakid el sils e nguluusbech er sel kot el kiis er aike el kldei el “kiis er a Rengedel a eanged.” A derta er aika el kiis a mo mekengii a chesimer el mo melai er a ileakl el klengeltengat el kirir a rekakerous el bliongel er a rechad. (Mt. 16:18, 19) Tia el kot el kiis a milsterir a Rechijudea me a Rechisentael el ulebult el mora klechelid er a Rechijudea a techellir el mo kongei er a ungil chais e mucheluch er a chedaol reng er a Dios. d Me te mo chedal a Israel er a Dios e mo er ngii a omeltkir el mo mengedereder el king e prist er a Renged el longedereder er ngii a Mesias. (Och. 5:9, 10) Cherengel a taem e tia el techall a mora rechad er a Samaria me a Rechisentael. Ngera sebeched el suub er aika el meklou a ultutelel el tekoi el dilubech er a Pentekost 33 C.E.?

 4. Ngmekera ongdibel er a Rekristiano er chelecha el taem e melemolem el meruul er a ureor el lurruul er ngii a ongdibel el mileketmokl er a 33 C.E.?

⁴ A ongdibel er a Rekristiano a milteketek er a bo le “kldibel el rokui el dmak,” e lemucheluch er a chedaol reng a rebekord el 120 el disaiplo er a delemerab er bab. (Rel. 2:1, BT) Ngar er a ulebengelel tia el sils e a retelecholb el chedal ongdibel a mlo betok el telael. Tia di mle uchelel a okurulel a cheldebechel el ngii a di meleketek er chelecha  el taem! Nguaisei, a ongdibel er a Rekristiano er chelecha el taem el rechedal a resechal me a redil el meluu er a Dios, ngtir a omerk er a “evangkelio ra rengedel a Dios” er a “belulechad el rokir” er a uchei er a lemei a ulebongel.​—Mt. 24:14, BT.

 5. Ngar er a taem er a Rekristiano me a dirrek el chelecha el taem, e ngngera el klengeltengat a dengai sel deteloi er a ongdibel?

⁵ A ongdibel er a Rekristiano a dirrek el olengeseu e melisiich er a rechedal, el rengellitel e a uriul e ngmo er ngii a “rekuk bebil el sib” el mo uldimukl er tir. (Jn. 10:16, NW) A Paulus ulechotii omereng el saul er ngii el kirel a support lulemsang a rechedal a ongdibel er a loluches el mora Rekristiano el ngar er a Rom el kmo: “Kuureng el mesekemiu me bo le sebechek el meskemiu a bebil ngat er a reng el mo smisichemiu. A kulekoi er ngii a kmo, a bo de kaodengei er a rolel a doumerang, e ak mo ngosukemiu me kemiu a mo ngosukak el mo mesisiich el oumerang.”​—Rom 1:11, 12.

6, 7. Ngmekera ongdibel er a Rekristiano er chelecha el taem e olengesenges er a tekingel a Jesus el mo omerk el mora rokui el beluu er a beluulechad?

⁶ Ongdibel er a Rekristiano er chelecha el taem a kmal di osisiu a moktek er ngii er a ongdibel er a taem er a rekot el Kristiano. A Jesus a milsterir a redisaiplo er ngii a meringel engdi ngkmal ungil e ngar ngii a belkul ureor. Ngdilu er tir el kmo: “Morael el mor a bek el bedengir a re chad er ker me ker e moruul er tir el mo obengkek, e molecholb er tir loba ngklel a Chedam, ma Ngalek, ma Chedaol Reng, e molisechakl er tir me bo loltirakl a ikel rokui el bla kdu er kemiu.”​—Mt. 28:19, 20.

⁷ A Jehovah ousbech er a ongdibel er a Resioning er a Jehovah el mengetmokl er tia el ureor. E uaisei el sebechel mo meringel a domerk el mora rechad el melekoi a ngodech lomelekoi. A Resioning er a Jehovah a oltobed a suobel  el mengai er a Biblia el ngar er a betok er a 1,000 el omelekoi. A lsekum ke blechoel el teloi er a ongdibel er a Rekristiano e teloi er a ureor el omerk er a klumech er a Renged e meruul er a remo disaiplo, e ngngar ngii a ungil luchul me ngdmeu a rengum. Kau a teloi er tirke el mekesai el chad er a beluulechad el ngar ngii a ileakl el techellir el lousioning er a ngklel a Jehovah!

 8. Ngera el ngeso a dengai loeak a ongdibel er a Rekristiano?

⁸ A Jehovah el Dios a mla meskau a klodam el meliuekl er a beluulechad el rokir el mo ngosukau loutekangel a meringel el taem el loba deurreng. A Paulus a milluches el mora rechad er a Hebru el Kristiano el kmo: “Bo de kaukerreu e de kaingeseu el olecholt er a bltikerreng e doruul a ungil. E lak dongoit a ongdibel er kid el ua blekerdelir a re bebil er a re chad, e bai le mengal mo blak a rengud el kasisiich er chelechal domes er sel Sils er a Rubak el olekedang.” (Heb. 10:24, 25) A ongdibel er a Rekristiano a sengk er a Jehovah me lsebechem el melisiich er a rebebil e dirrek el ngmai omelisiich. Bo mkeed er a rudam me a rudos er kau er a klereng. Lak mongoit a miting er a Rekristiano!

9, 10. Te mekera rebebil e mla ochotii el kmo ngsorir el omerk el mora rechad el ngodech omelekingir?

⁹ Ka molatk er a klemeriarreng el lulebang tirka el chad er a Chijudea me a Rechisentael el ulebult el mora klechelid er a Rechijudea er a Pentekost 33 C.E. Oumesingd er tir a locha  mle medengei omelekoi el lodengelii a rebetok el ngii a locha tekoi er a Grik me a lechub e ng Hebru. Engdi chelechang a re “derta er tir a ullerrenges er tirkel oumerang er a Jesus el mengedecheduch a tekoi er a belual.” (Rel. 2:6) Ngulterekokl el kmal rirutech a rengrir er a lerengesii a ungil chais el ngar er a tekingir. Me nguaisei engdi a Rekristiano er chelecha el taem a diak el sebechir el loeak a mengasireng el rolel e te melekoi a kakerous el omelekoi. Engdi a rebetok a omerk er a klumech er a Renged el mora rechad er a kakerous el beluu. Ngoeak a ngera el rolel? A rebebil a mla suubii a beches el omelekoi me lsebechir el mesiou er a ongdibel er tia el omelekoi el kmeed er tir me a lechub e te melukl el mora kuk ta er a beluu. Te blechoel el metik el kmo a rechad el lomerk el mo er tir a kmal impressed er tir.

¹⁰ Molatk er a Christine el millai a klas el tekoi er a Gujarati lobengterir a reteuid el Sioning. Sera lebetik er a chad el loureor el lobengkel el melekoi a Gujarati e nguluutkeu er ngii el ngar er a omelekingel. Ngika el redil a kmal mlo mechas a rengul e mle soal mo medengei el kmo ngera uchul me a Christine a melasem el mo medengei a tekoi er a Gujarati el kmal meringel lomelekoi. Me a Christine a mlo sebechel rullii a ungil sioning. Ngika el redil a dilu er a Christine el kmo: “Ngulterekokl el ngar ngii a kmal klou a ultutelel el tekoi el soam el louchais.”

11. Ngmekera sebeched el mo kltmokl lomerk er a klumech er a Renged el mora rechad el ngodech omelekingir?

¹¹ Me nguaisei engdi ngdiak el kid el rokui a sebeched el mesuub el mo medengelii a kuk ta er a omelekoi. Engdi ngsebeched el mo kltmokl el omerk er a klumech er a Renged el mora rechad el ngodech omelekingir er kid. Ngoeak  a ngera el rolel? A ta er ngii a sebechem lousbech er a JW Language^®app el suubii a rolel e ngsebechem loutkeu er a rechad el ngar er a basio el mngar er ngii el ngodech omelekingir. Ngdirrek el sebechem el suub a mekedeb el tekingir el sebechel lomeksemeriar a rengrir er a Biblia. Mochotii er tir a jw.org, e locha sebechem el dirrek locholt aike el kakerous el video me a babier el ngar ngii el tekingir. Sel dousbech aika el dongu lomerk er a klumech e ngsebeched el moba osisiu el deurreng el luleba rudam er kid er a taem er a rekot el Kristiano. A rechad er a ngodech el beluu a kmal mle ungil a rengrir el rongesii a ungil el chais, el “derta er tir . . . [el] tekoi er a belual.”

12. (a) Ngera ngdilu profet Joel el millutk er a mengasireng el tekoi el dilubech er a Pentekost 33 C.E.? (b) Ngera uchul me a redisaiplo er a Jesus a mle expect er a otutel a ulochel a profet Joel?

¹² “A Petrus a mocha dechor” e mengedecheduch er a seked er a rechad er a kakerous el beluu. (Rel. 2:14) Ngsilodii el mo er tirke el rokui el kilengei lorrenges el kmo, a Dios a milsterir a mengasireng el rolel e te melekoi a ngodech lomelekoi loltaut er a ulochel a Joel el kmo: “Ak mo oitelii a Reng er ngak el mor a rokui el chad.” (Joel 2:28) Uchei er a lebora eanged a Jesus e ngdilu er a redisaiplo er ngii el kmo: “Ak mo olengit er a Chedam me ng mo meskemiu a tar a mo Olengeseu er kemiu.” E mileketeklii el kmo tia el ngeso a “Chedaol Reng.”​—Jn. 14:16, 17.

13, 14. Ngmilekera Petrus e melasem el remutech a rengrir a rulerrenges er ngii, e mekera sebeched loukerebai er ngii?

¹³ Ngmle mesisiich a ulebongel el tekingel  a Petrus el mo er tia el seked: “Isei a uchul ma blil a Israel el rokir bo lungil medengei el kmo a Dios a rirellii el mo Rubak e Kristus, ngikel mkilersengii el Jesus.” (Rel. 2:36, BT) Tirka el chad lulerrenges er a Petrus a dimlak lemera el ngar sei er a lokodir a Jesus er a teluo el kerrekar. Engdi te chedal a renged el milekodir, me te chelsechusem er ngii. Mutebengii el kmo a Petrus er a longedecheduch er tir e ngullecholt er omengull e millasem el remutech a rengrir. A moktek er ngii a mle soal lolengeseu er tir me lobult ngdimlak el soal melebeakl er tir. Me a seked, ngmle kesib a rengrir er a tekingel a Petrus? Ngdiak, te bai “kmal mlo ouedikel a rengrir.” Me te uleker: “Maki mekerang e rudam?” Me a rolel a longedecheduch a Petrus a ulterekokl el rirutech a rengrir a rebetok, e le te betok ulebult.​—Rel. 2:37.

¹⁴ Ngsebeched loukerebai er a rolel e a Petrus a milengedecheduch el merutech a reng. Sel dousioning el mora rechad e ngdiak dosmechokl a bek el tekoi el louchais er kid a chad er a blai. E ngbai ungil a dosaod aike el tekoi el kid me a chad a di diul kongei. A dosaod chouaika el tekoi e ngsebeched el ngosuir el lousbech er a Tekingel a Dios. Sel douchais a klemerang er a Biblia el ngar er a positive el rolel, e a remedemedemek a rengrir a mo sorir el lorrenges.

15. (a) Ngera ngdilu Petrus, e ngera dilubech? (b) Ngera uchul me tirke el tela el telael el rirengesii a ungil chais er a Pentekost a mle sebechir el metecholb er tia el osisiu el sils?

¹⁵ Ngar tia el ileakl el sils er a Pentekost 33 C.E. e a Petrus a dilu er a Rechijudea me a Rechisentael el ulebult el mora klechelid er a Rechijudea el kmo: “Molodech a rengmiu ar derta er kemiu e bo metecholb.”  (Rel. 2:38, BT) Me te bekord el 3,000 a miltecholb er a diosech er a Jerusalem me a lechub ngmlara bita er ngii. e Tirka te di dimlak el kltmokl e orreched el mo metecholb? Tia ngbelkul a kmo a remesuub a Biblia me a rengelekir a Rekristiano a sebechir el di mereched el metecholb? Ngkmal diak. Lak dobes el kmo tirka el Chijudea me a Rechisentael el ulebult el mora klechelid er a Rechijudea el miltecholb er a Pentekost 33 C.E. a mle kerekikl el mesuub er a Tekingel a Dios, e mle chedal a renged el mle telbiil el mora Jehovah. Me tir ulechotii a blakerreng er tir, e le te kiliei er cheroid e mlei el mora chedaol sils. Me sera lekengei er a klemerang el kmo a Jesus Kristus a klou a part er ngii er a otutel a moktek er a Dios, e te mlo ready el melemolem el mesiou er a Dios el ta er a telecholb el oltirakl er a Kristus.

16. Te milekera rudam er a taem er a rekot el Kristiano e ochotii el kmo te kilengei el mengoit aike el ngar ngii er tir el kirir a rebebil?

¹⁶ A Jehovah kmal ulemekngeltengat er tir. A cheldecheduch a melemolem el melekoi el kmo: “A rokui el oumerang a di dilak el ngar a kmes el klauchad e mirrous a kloklir er a delongelir. Tulelterau a chetemir ma kloklir e merous a udoud el mor a rokui el chad el oltirakl er a ildisel a lousbech er ngii a derta er tir.” f (Rel. 2:44, 45) Me a rokui el mera el Kristiano a ulterekokl el sorir el mo oukerebai er a reng el lulechotii.

17. Ngera kirel a chad el meruul e mo sebechel mo nguu a techolb?

¹⁷ Ngngar ngii a tekoi el kirel a chad el meruul er a uchei er a bo loruul er a telbilel a reng me a techolb er a Rekristiano. Ngkirel a chad el mesuub er a Tekingel a Dios. (Jn. 17:3) Ngkirel lochotii a klaumerang er ngii e ochotii el kmo ngouuchel a rengul, e obult er a omerellel. (Rel. 3:19) E kirel el mo meruul a tekoi el Dios a soal a doruul. (Rom 12:2; Efe. 4:23, 24, BT) E seikid e ngmo sebechel rullii a telbilel a rengul el mora Dios e metecholb.​—Mt. 16:24; 1 Pe. 3:21.

18. Ngera el ileakl el techall a lobang a retelecholb el disaiplo er a Kristus?

¹⁸ Kau, ke telecholb el disaiplo er a Jesus Kristus? A leuaisei e moba omereng el saul el kirel a ileakl el techall el bla mnguu. Ngdi ua redisaiplo er a taem er a rekot el Kristiano el meltuchel er a chedaol reng, kau me ngdirrek el sebeched el lousbech er kau el mo ungil merkii a klumech er a Rengedel a Dios e meruul er a soal a Jehovah!