1-3. Ngmilekera Jesus er a last el bo lduum er a rechapostol er ngii, e ngera el ker a duubech?

 A RECHAPOSTOL a kmal mlo mekngit a rengrir er a lemad a Jesus. Me ngkmal mlo dmeu a rengrir er a lebekiis er a kodall! Ng 40 el klebesei el bo lduum er tir er a kakerous el taem, e olisechakl e melisiich er tir. Ngkmal sorir el lobengkel a Jesus e chetirir a lorael. Engdi chelechang ng last er ngii el mo duum er tir.

² A Jesus a mengedecheduch er a rechapostol er ngii er a Rois er Olib. Te kmal kerekikl lorrenges a bek el lolekoi. Ngdirk sorir a lolemolem lolisechakl, e ngii a mo merek e odars a chimal e omekngeltengat er tir. E a Jesus a mocha mekider el bedul a eanged. Me a eabed a mertii el mocha diak lesang, engdi te dirk ngellomel er a eanged.​—Lk. 24:50; Rel. 1:9, 10.

 ³ Tia klou el omelodech er a klengar er a rechapostol er a Jesus. Te mo mekerang er chelechang el Mastang er tir a mla mora eanged? Ngsebechel mo ulterekokl a rengud el kmo, a Mastang er tir a mle prepare er tir el mo omekrael er a ureor el lebilechelii. Me ngmilekera Jesus e prepare er tir el kirel tia el kmal klou a ultutelel el ngerachel, e ngera te mirruul er ngii a rechapostol er ngii? E ngera lerellii el mora Rekristiano er chelecha el taem? A kot el bliongel er a babier er a Rellir onger aika el ker.

 4. Ngmilekera Lukas e omuchel el meluches er a babier er a Rellir?

⁴ A Lukas omuchel er a babilengel, loeak a loluches el mora Theofilus el ngike el osisiu el chad el lulluches er a Ebangkelio el mo er ngii er a uchei. a Ngomuchel el summarize a tekoi el lulluches er a ulebengelel a Ebangkelio er ngii, engdi ngtelkib lousbech a kakerous el tekoi e dochel a komakai el omesodel a bebil. Me ngbleketakl el kmo tia omechelel sel kot el babier lulluches er ngii.

5, 6. (a) Ngera mo ngosuterir a rultirakl er a Jesus el mo melemolem el mesisiich a klaumerang er tir? (b) Ngmekera klaumerang er a Rekristiano er chelecha el taem e mengai a uchetemel er a “betok lulterekokl locholt”?

⁵ Ngera mo ngosuterir a rultirakl er a Jesus el mo melemolem el mesisiich a klaumerang er tir? A Rellir 1:3 (BT) a melekoi el kirel a Jesus el kmo: “Ngullab a betok lulterekokl locholt el olecholt er ngii er tir el kmo, ‘Ak dingar.’” Sel domes er a Biblia e ngdi ta el Lukas el “betik ra rengud el toktang” a ousbech er a tekoi el “lulterekokl locholt.” (Kol. 4:14, BT) Ngmle tekoi el lousbech er ngii aike el babier er a sodel a ukeruul, el belkul a kmo ngbleketakl e mesisiich el evidence. A Jesus a milskid chouaisei locholt. Ngmle betok el taem el lebo lduum er a rultirakl er ngii, el lebebil e ngmlo duum er a tang me a lechub e te terung, e a lebebil ngmlo duum er mederir a rokui el apostol, me a ta el taem e ngmlo duum er a rebetok er a 500 er a rubengkel. (1 Ko. 15:3-6) Ngmera el lulterekokl locholt!

⁶ A klaumerang er a remera el Kristiano me ngdirrek el mengai a uchetemel er a “betok lulterekokl locholt.” Ngngar ngii olechotel a kmo, a Jesus a kiliei er tia el chutem, mlad el kirel a kngtid, e milekiis  er a kodall? Chochoi! A Tekingel a Dios olterekokl er a rengud le ngouchais el kirir a rechad el miles aika el tekoi. Sel dosuub aika el cheldecheduch e doluluuch lolengit er a Jehovah me lengesukid el mo understand, e ngsebechel smisichii a klaumerang er kid. Lak dobes el kmo a mesisiich el locholt a mo eklii a mera el klaumerang er a di oumerang a ngii di el tekoi. Kede ousbech er a mera el klaumerang a lsoad el nguu a diak a ulebengelel el klengar.​—Jn. 3:16.

 7. Ngera el kerebai er a olisechakl e omerk a lekiltmeklii a Jesus el kirir a rultirakl er ngii?

⁷ A Jesus a dirrek el mle “mengedecheduch ra rengedel a Dios.” El ua tiang, ngsilaod aike el ulaoch lulechotii el kmo a Mesias a kirel mo chuarm e mad. (Lk. 24:13-32, 46, 47) A Jesus er a lebeketeklii el kmo ng Mesias, e ngmilengedecheduch el kirel a Rengedel a Dios le ngii el mo King er a Renged. A Renged a klumech lulemerk er ngii a Jesus, me a rultirakl er ngii er chelecha el taem me te dirrek el omerk er a osisiu el klumech.​—Mt. 24:14; Lk. 4:43.

8, 9. (a) Ngera el eru el cheleuid el uldasu a lullab a rechapostol er a Jesus? (b) Ngmilekera Jesus e ngosuterir el adjust a uldesuir, e tia ngera ngosisecheklii el mora Rekristiano er chelecha el taem?

⁸ A rechapostol a mle last er tir el kldibel er tia el chutem lobengkel a Jesus er a Rois er Olib. Te kmal mle semeriar el mo medengei el kmo: “Rubak, ng chelecha e ke mo rullii a Israel el mo oba omengedereder?” (Rel. 1:6) Tia el kerrir ulecholt a eru el cheleuid el uldasu lullab. A kot, e te ulemdasu el kmo a Rengedel a Dios a lmuut el mo toketekii a renged er a Israel. Ongerung, te ulemdasu el kmo a telbiil el Renged a di mereched el mo mengedereder, ‘ng chelechang.’ Ngmilekera Jesus e ngosuterir el adjust a uldesuir?

⁹ A Jesus a mle medengei el kmo sel kot el cheleuid luldesuir a di kmedu ngmo mesmechokl. Teruich el klebesei er uriul er tiakid el sils e te mo mesa cherellel a beches el renged, el Israel er a Dios! A renged er a Israel a mo diak el ileakl el chedal a Dios. Engdi sel ongeru el cheleuid luldesuir a Jesus ulemeklatk er tir el kmo: “A belsechel ma temel a di Demak a ngar ngii a klisichel el melib er ngii, me ng diak le kiriu el mo medengei el kmo ng mo oingerang.” (Rel. 1:7) Ng Jehovah ngii oba taem. Dirrek el uchei er a lemad a Jesus e ngdilu el kmo a Ngalek a diak lodengelii “sel sils ma lechub e ng sel sikang” el lemei a ulebongel, “ngdi tal Chedam a medengelii.” (Mt. 24:36) Ngdi osisiu el kirir a Rekristiano er chelecha el taem. A lsekum kede di mo melatk el kmo a ulebongel e ngmei er oingerang, e kede mocha bekikl er a tekoi el diak el ngerecheled.

10. Ngera el ungil attitude er a rechapostol a kired el mekurulii, e ngerang?

 ¹⁰ Me nguaisei engdi ngdiak el kired loukerrekeriil er a rechapostol er a Jesus, el tir a kmal mle mesisiich a klaumerang er tir. Te mle ngariou a rengrir e kilengei a omesmechokl. Me a lmuut kung, alta kerrir a mlengai er a cheleuid el uldasu, engdi ngulechotii el kmo ngmle ungil a attitude er tir. A Jesus a mle betok el di lolekoi er a rultirakl er ngii el kmo: “Me di mongkar.” (Mt. 24:42; 25:13, BT; 26:41) Me te mle klekar er a tekoi er a klereng e ulsiik a olechotel a kmo a Jehovah mocha meruul a tekoi. Kid er chelecha el taem me ngdirrek el kired el moba osisiu el uldasu. Ngkmal lmuut el klou a ultutelel el kired a bo dolemolem el klekar le kede kiei er a “uriul sils.”​—2 Ti. 3:1-5, BT.

11, 12. (a) A Jesus ngmilsterir a rultirakl er ngii a ngera el ureor? (b) Ngera uchul me a Jesus a milsaod er a chedaol reng lobengkel a ngerechelir lomerk?

¹¹ A Jesus ulemeklatk er a rechapostol er ngii el kmo ngera kirel mo kot el klou a ultutelel er tir. Ngdilu el kmo: “Sel le mer kemiu a Chedaol Reng, e ng mor ngii a klisichiu, me kom mo ochotek er a Jerusalem, ma Judea el rokir, ma Samaria, el mo lmuut er a bek el beluu er a beluulchad.” (Rel. 1:8) Me a rechapostol a kot e te mo omerk el kirel okisel a Jesus er a Jerusalem, el rechad er ngii a milekodir a Jesus. E ngar er isei e te mo omerk el mora rokui el beluu er a Judea, e mora Samaria e mora lmuut el cheroid el beluu.

¹² Me nguaisei a Jesus a liluut el mesaod er tia el ngerechelir el omerk er a uriul er a lluut el melekoi el kmo ngmo mesterir a chedaol reng lolengeseu er tir. Tia ta er aike el betok er a 40 el taem el debetik er a tekoi el “chedaol reng” er a babier er a Rellir. Ngbetok el taem el lomeketakl er ngii tia el babier er a Biblia el kmo ngdiak el sebeched el kutmeklii a soal a Jehovah a lak chedaol reng er ngii. Me ngkmal klou a ultutelel el deblechoel el meluluuch lolengit er a chedaol reng. (Lk. 11:13) Kede kmal ousbech er ngii er chelechang el ngaruchei er a ngii di el taem.

13. Ngua ngera klungel a ureor er a berkel a klumech el kirir a rechedal a Dios er chelecha el taem, e ngera uchul me ngungil dekengei el meruul er ngii loba rengud el rokir?

¹³ A belkul a “mo lmuut er a bek el beluu er a beluulchad” er seikid el taem a mla mengodech. Ngua dulsaod er ngii er a kot el bliongel, a Resioning er a Jehovah mla kongei loba rengrir el rokir el meruul er tia el ngerachel el omerk, le te medengei el kmo a Dios a soal a rokui el chad a lerengesii a ungil chais el kirel a Rengedel. (1 Ti. 2:3, 4) Kau, ke mechesang el meruul er tia el ureor? Ngkmal diak bo betik er a kot lungil ureor el uai tiang! A Jehovah mo meskau a klisiich el mousbech el mo meruul er ngii. A babier er a Rellir a mo ouchais  aike el melemalt el rolel e kede meruul er tia el ureor me a dirrek el attitude el kired el mo obang me bo lsebeched lungil kutmeklii.

14, 15. (a) Ngera te dilu rechanghel el kirel a luut er a Kristus, e ngera mle belkul a tekingir? (Dirrek el momes er a footnote.) (b) Ngoeak a ngera el rolel e a luut er a Kristus a “kmal di ua” sera lorael?

¹⁴ Ngua dulsaod er ngii er a uchelel a bliongel, a Jesus a mlekider el mo er bab er a chutem el mo dibus. Engdi tirke el 11 el apostol a di millemolem el dechor el lomes er a eanged. Me a reteru el anghel a mlo omeklatk er tir el kmo: “Kemiu el chad er a Galilea, ngera me kom dechor er tilechang el omes er a eanged? Ngiil Jesus el mlengai er kemiu el mor a eanged a mo lmuut el mei el kmal di ua ser cho momes er ngii el merael el mor a eanged.” (Rel. 1:11) Ngngera mle belkul a tekingir tirka anghel? A Jesus, nglmuut el mei el ngar er a osisiu el bedengel el ua lolisechakl a bebil klechelid? Ngdiak el uaisei. Kede mekera medengei?

¹⁵ A rechanghel a dilu el kmo a Jesus a lmuut el mei “el kmal di ua ser cho momes er ngii el merael.” Te dimlak el du el kmo ngngar er a osisiu el bedengel. b Ngmle ua ngera teletael er a lorael a Jesus? A rechanghel er a longedecheduch, e a Jesus a mla mo diak el moues. Ngdi tirka el mekesai el chad, el apostol a milsa el mo dibus e mlo mtebengii el kmo a Jesus a mla mo diak el ngar tia el chutem e ngar er a omerollel el mora Demal er a eanged. A teletelel a luut er a Kristus a di mo osisiu. E tiakid a dilubech. Chelecha el taem e ngdi tirke el sebechir el omtab a tekoi er a klereng a mtebengii el kmo a Jesus a mengedereder er a Rengedel a Dios er chelechang. (Lk. 17:20) Ngkired el mo omtab aike el lochotel a kmo a Jesus a mengedereder er chelechang, e ngosuterir a rechad el dirrek el mo omtab me bo lodengei el kmo ngorechudel el taem er chelechang.

16-18. (a) Ngera kede suub er a Rellir 1:13, 14 (BT) el kirel a miting er a Rekristiano el kirel omengull? (b) Ngera sebeched el suubii er a Maria el delal a Jesus? (c) Ngera uchul me a miting er a Rekristiano kmal meklou a ultutelel er chelecha el taem?

¹⁶ Me a rechapostol a “liluut el merael el mor a Jerusalem, el kmal dmeu a rengrir.” (Lk. 24:52) Engdi te mo mekerang er a ulekrael er a Kristus? Ngar er a 1 el bliongel er a Rellir er a 13 me a 14 el kekerei el bades e kede menguiu el kirir el kmo, te mlo kldibel er a “delemerab er bab.” Kede suub a ileakl el tekoi er aika el ongdibel er tir. A blai er a Palestine er tiakid el taem a mle blechoel el ngar ngii a  delemerab er bebul e mla er ngii a stairs er rikl el mo er ngii. Tia el “delemerab er bab,” e ngbebul a blil a delal a Markus el losaod er ngii a Rellir 12:12? Alta ngdiak dodengei engdi kede medengei el kmo ngmle ungil e simple el basio el sebechir a rultirakl er a Kristus el mo kldibel er ngii. Engdi te rua techa mlo kldibel, e ngera te mirruul?

¹⁷ Mutebengii el kmo ngdiak di el rechapostol me a lechub el di el resechal a mlo er tia el ongdibel. Ngmla er ngii a “redil” el mla er ngii, el luldimukl er a Maria el delal a Jesus. Tiakid a ulebongel el taem el Biblia mesaod el kirel a Maria. Ngmelisiich er kid sel dolatk er ngii el ngar tia el ongdibel el diak losiik a chetengakl, e ngbai mle obengterir a rudam me a rudos er ngii el mengull. Ngdirrek el locha kmal mle chellaod a rengul sel lodengei el kmo a reteua el ngelekel el sechal el dimlak loumerang er a Jesus er a lechad, a mla mo teloi er ngii. (Mt. 13:55; Jn 7:5) Ngmlengodech a attitude er a re ochellel a Jesus er a lemad e lebekiis er a kodall.​—1 Ko. 15:7.

¹⁸ Dirrek el molatk er a uchul me tirka el disaiplo a mlo kldibel: “[Te] dilak el ta rengrir el blak a rengrir el meluluuch.” (Rel. 1:14, BT) A ongdibel a klou a ultutelel el telengtengil a omengull er a Rekristiano. Kede mo kldibel e kasisiich, e melai a ulekrael me a omesmechokl, e a ngaruchei er ngii kede dmak el mengull er a Jehovah el Demad el ngar er a eanged. A nglunguuch me a chelitakl er odanges er choua ikakid el taem a kmal odeuir a rengul e dirrek el klou a ultutelel el kired. Ngkmal diak el kired el mengoit aika el chedaol e melisiich er kid el ongdibel!​—Heb. 10:24, 25.

19-21. (a) Ngera kede suubii er a Petrus el lulemekrael er a klou a ultutelel osmechokl? (b) Ngera uchul me ngmle kirir el mtechir a Judas, e ngera sebeched el suubii er a rolel e te milsmechokl er tia el tekoi?

¹⁹ A rultirakl er a Kristus a chelechang e te chelebangel er a mondai el kirel el mesmechokl. Me a Petrus a mlo omekrael er a rolel e te sumecheklii. (15-26 el kekerei el bades) Ngdiak longelaod er kid sel desa Jehovah lousbech er a Petrus alta ngultngeklii a Mastang er ngii el edei el taem? (Mk. 14:72) Kede rokui el mora klengit, me kede kmal ousbech a uleklatk el kmo a Jehovah “ungil, e ousubes a [telemellir]” tirke el mera el obult.​—Psa. 86:5.

²⁰ A Petrus a miltebengii el kmo ngmle kirel mutechei a Judas, el ngike el apostol lulterur a Jesus. Engdi ngtecha mo mtechir? Ngika el beches el apostol a kirel luleltirakl er a Jesus er a loruul er a omesiungel e milsa okisel. (Rel. 1:21, 22) Tia oltirakl er a telbiil lebilsterir a Jesus el kmo: “Kemiu el truich ma terung el uleltirakl er ngak a dirrek el mo dengchokl a kingall er omerreder, e mo mengedereder a ikel tacher ma teblol klebliil er a Israel.” (Mt. 19:28) Me a Jehovah mle soal a  re 12 el apostol el luleltirakl er a Jesus er a loruul er a omesiungel a bo le “tacher ma teblol omekedecheraol el bad” er a Beches el Jerusalem. (Och. 21:2, 14) Me a Dios a ngilsuir a Petrus el mo oterekeklii el kmo a ulaoch er a “tang er a re chad lengai a kloklel” letaut el kirel a Judas.​—Psa. 109:8.

²¹ Me te milekera e ngiltii a techil a Judas? Te mle kengmors. Tia blekeradel el lurruul er ngii er a taem er a Biblia. (Osi. 16:33) Me nguaisei, engdi tia last el taem el Biblia mesaod el kmo te uluusbech er a omelmors. Sera lemoiitel a chedaol reng e ngmlo diak lousbech er a omelmors. Engdi mutebengii a uchul me te mle kengmors. A rechapostol a milluluuch el kmo: “Rubak, ke medengei a uldesuir a re bek el chad, me mochotii er kemam el kmo ng techa er tirkal terung cho bla mngiltii.” (Rel. 1:23, 24) Ngmle sorir omelilt a lengar er a Jehovah. Me a Mathias a mlengilt, el ngii a locha mle ta er tirke el 70 el disaiplo el Jesus a uleldurech er tir el mo omerk. Me ngmlo ta er a “re truich ma terul apostol.” c​—Rel. 6:2.

22, 23. Ngera uchul me ngkired lolengesenges er tirke el mla metutk el mo omekrael er a ongdibel er chelecha el taem?

²² Tia el cheldecheduch omeklatk er kid el kmo a Dios a soal a rechedal a lechelderoder. Chelecha el taem me ngngar ngii a rudam el mla metutk el mo omekrael er a ongdibel. A remechuodel a kerekikl el merriter aike el qualification er a remechuodel el ngar er a Bades, e meluluuch lolengit er a ulekrael er a chedaol reng. Me a ongdibel omes er tirka el odam el kmo te meltutk er a chedaol reng. Sel doltirakl a ulekrael el lomeskid a remechuodel e kede ngosuterir a rokui el chedal ongdibel el mo dmak loureor.​—Heb. 13:17, NW.

²³ Me chelechang e a redisaiplo er a Jesus a mla ngmai omelisiich er aike el taem el blo lduum er tir er a uriul er a lebekiis me a dirrek el omelodech el lurruul a cheldebechel. Te kmal mla mo ungil kltmokl el kirel a tekoi el merael el mei. A ongingil bliongel a mo mesaod er tia el kmal klou el tekoi el dilubech.