1-3. (a) Ngera uchul me a rechapostol a mlengai el mora medal a Sanhedrin, e ngera sel mera el mondai? (b) Ngera uchul me ngkmal soad el mo medengei el kmo te milekerang a rechapostol er a lomekdakt er tir?

 A RECHAD er a kerrekeriil er a Sanhedrin a kmal mla ngmasech a rengrir! A rechapostol er a Jesus a bla lotuteklterir me a uchul e te ngar er medal tia el ngarbab el kort. Ngera uchul me te mlotutakl? A Josef Kaifas el ngarbab el prist e president er a Sanhedrin a kmal kesib a rengul e melekoi er tir el kmo: “Aki kmal milengelechel er kemiu er a meringel tekoi el kmo ng diak molisechakl el oba ngklel ngikal chad.” Ngika el Kaifas a kmal diak el sebechel dulii a ngklel a Jesus. Engdi ngmelemolem el kmo, “Kom mla merk osisechekliu er a Jerusalem el rokir; e somiu el rullemam el mo uchul a kodellel ngiil chad!” (Rel. 5:28) Ngkmal bleketakl a belkul a tekingir: Mstob lomerk me a lechub!

² Me te mo mekerang a rechapostol? A Jesus a ngike el dilu er tir el mo omerk, el Dios a milsang tia el klisiich. (Mt. 28:18-20) A rechapostol te mo medakt er a rechad e mo lmuk? Me a lechub e te mo oba blekeu e melemolem el omerk? A mera el mondai a kmo: Te mo olengesenges er a Dios me a lechub e ngrechad? Me a Petrus a di mle mereched el mo mengedecheduch el kirir a rechapostol. Ngkmal mle bekeu a rengul e di bleketakl a longedecheduch.

³ Kid el mera el Kristiano a kmal soad el mo medengei el kmo te milekerang a rechapostol er a lomekdakt er tir a Sanhedrin. Tia el ngerachel el mo omerk a dirrek el ngerecheled. Kede locha dirrek el mo chobangel odechelakl sel doruul er tia el ngerecheled er a Dios. (Mt. 10:22) A rumtok a locha mo melasem el merrob er a urered. Me kede mo mekerang? Ngmo uchul a klungioled sel dorriter omerellir a rechapostol me a teletael el mlo uchul me te mlo dechor er a medal a Sanhedrin. a

4, 5. Ngera uchul me a Kaifas me a Resadusi a “kmal mlo mechechei”?

⁴ Mutebengii el kmo sera lekot el dmu er tir me lestob lomerk e a Petrus me a Johanes a dilu el kmo: “Kemam a diak el sebecham el mo lmuk el diak kim ouchais a ikel bla kim ues ma bla kim renges.” (Rel. 4:20) Uriul er tiang e a Petrus me a Johanes me tirke el bebil er a apostol a millemolem el lomerk er a templo. A rechapostol a mirruul a mengasireng el tekoi, el ua omekungil er a resmecher e oltobed er a remekngit el chelid er a rechad. Te mirruul aikang er a “Berangdang er a Salomon” el klou el chelado el basio el mlara ongos er a templo el rebetok el Chijudea a mo kldibel er ngii. Mo lmuut er a chungel a Petrus me ngulemekungil er a rechad! A rebetok er tirke el lulemekungil er tir a kilengei er a ungil chais. Me ng “di mirrael el mol mong e a re betok el sechal ma redil a mlo oumera er a Rubak me te mlo bebil er tir.”​—Rel. 5:12-15.

⁵ A Kaifas el mle Sadusi me a relmuut el bebil er a Sadusi a “kmal mlo mechechei” me te ultungeterir a rechapostol er a blil a kelebus. (Rel. 5:17, 18) Ngera uchul me ngkmal mle kesib a rengrir? A rechapostol ullisechakl el kmo a Jesus a milekiis er a kodall, me nguaisei engdi Resadusi dimlak loumerang er a okiis. Me a rechapostol a dirrek el millekoi el kmo a bo loumerang er a Jesus e te mo suobel, engdi a Resadusi mle medakt el kmo a rechad er a Rom a mo el lobult el mo omtok er tir a lsekum a rechad a kongei er a Jesus el merredelir. (Jn. 11:48) Sei a uchul me te kmal mle sorir el mutek a ngerir a rechapostol! 

 6. Te ngera tirke el luchul me a remesiungel a Jehovah modechelakl er chelecha el taem, e ngera uchul me ngdiak lemechas a rengud er ngii?

⁶ Chelecha el taem e a remengeteklel a klechelid me te dirrek el omuchel a odechelakl el mora remesiungel a Jehovah. Te ousbech a klisichir er a rechad er a kabelment me a dirrek el media el melasem el stob er a berkel er a klumech. Ngkirel mechas a rengud? Ngdiak. A klumech el domerk er ngii olecholt a blulekngel aika el klsuul el klechelid. A rechad sel lekengei er a klemerang er a Biblia e te mo mimokl er aika el klaumerang me a siukang el diak el mengai er a Biblia. (Jn. 8:32) Sei a uchul me a klumech el domerk er ngii a rulleterir a remengeteklel a klechelid el kmal mo chetirir kid e oldechelakl er kid!

7, 8. Ngera ngrirellii a tekingel a anghel el mora rechapostol, e ngera ungil di lekid loker er ngii?

⁷ Me a rechapostol a mlara kelebus el mengiil er a kerrekeriil e locha mlo melatk el kmo, a recherrouir a mo mekodeterir el kirel a klaumerang er tir. (Mt. 24:9) Engdi ngdilubech a mengasireng el tekoi er tia el kesus. “A anghel er a Rubak a ngila chesimer er a kelebus.” b  (Rel. 5:19) E milsterir a ileakl el ulekrael: “Morael el mo dechor ra templo e mongedecheduch.” (Rel. 5:20, BT) Aika el tekingel a ulterekokl el chillaod a rengrir el kmo, te mirruul er a melemalt el tekoi. Ngdirrek el locha kmal silisiich a rengrir el kmo a ngii di el ngerang el mo duubech e te di mo melemolem lomerk er a klumech. Te uleba mesisiich el klaumerang me a blekeu “me ng di mle tutau e te mor a Templo e mocha olisechakl.”​—Rel. 5:21.

⁸ A derta er kid a ungil a di lengii el loker, ‘Ngak a kuba klaumerang me a blekeu el mo melemolem lomerk er a chelsel osisiu el blekeradel?’ Nglocha kmal smisichid sel dodengei el kmo a rechanghel olengeseu e omekrael er kid el omerk er a klumech er a Rengedel a Dios.​—Rel. 28:23; Och. 14:6, 7.

9-11. Te milekerang a rechapostol er a ledu er tir a Sanhedrin me lestob lomerk, e ngera el kerebai a leketmeklii el kirir a remera el Kristiano?

⁹ Kaifas er a Sanhedrin me a rubengkel loukerrekeriil a kltmokl el mo omals er a rechapostol. Te dimlak lodengei a tekoi el dilubech er a kesus me te dmu er a rebulis me lengititerir el mei. Te locha kmal mlo mechas a rengrir er a lebong el dibus a rechapostol alta blil a kelebus a ungil chelsimer me a “re mengkerengel a kelebus a mengkar a tuangel.” (Rel. 5:23) A bderrir a remengkerengel a templo a mlo medengei el kmo a rechapostol a mla lmuut el mora templo e omerk el kirel a Jesus Kristus, el osisiu el tekoi luchul me te mlekelebus! Me ngii me a remengkerengel a di mle mereched el mora templo el mo melai er tir e ngoititerir el mora Sanhedrin.

¹⁰ Ngua dulsaod er ngii er a uchelel a bliongel, a remengeteklel a klechelid a dilu er a rechapostol me el stob lomerk. Me te milekerang a rechapostol? A Petrus a milengedecheduch el kirir el kmo:  “Kemam a kiram el olengesenges er a Dios el kuk ngar uchei er a kim olengesenges er a re chad.” (Rel. 5:29) Me a rechapostol a kiltmeklii a ungil kerebai el kirir a rokui el mera el Kristiano el loltirakl er ngii. Alta Dios a dmu er kid me kede olengesenges er a rechad el mengedereder, me nguaisei engdi ngdiak a llemeltir el stob er kid el meruul er a soal a Dios. Me chelecha el taem e a lsekum a “re merreder er a beluu” omtok er a urered, e ngdiak destob el meruul er a ngerachel el bla lebeskid a Dios el ngii omerk er a ungil chais. (Rom 13:1) Kede mo osiik a rolel e kede mo ungil merkii a klumech er a Renged e a osisiu el taem e ngdiak dochau a osengir a remerreder er a beluu.

¹¹ Tirka el chad er a kerrekeriil a kmal mlo kesib a rengrir er a blekengir a rechapostol. Te rirellii er a uldesuir a mo “omekoad” er a rechapostol. (Rel. 5:33) Me a rechapostol a ulterekokl lulemdasu el kmo te mo mekodeterir. Engdi ngeso a mo mei el ngar er a rolel el dimlak lesa el kmo ngmo uaisei!

12, 13. (a) Ngera el ulekrael a lebilsang a kort a Gamaliel, me ngera te rirellii? (b) Ngera nglocha mo meruul er ngii a Jehovah er chelecha el taem el kirir a rechedal, e a lsekum kede “mo chuarm el kirel a llemalt” e ngera sebechel mo ulterekokl a rengud er ngii?

¹² A Gamaliel el “sensei er a Llach, el kmal longull er ngii a re bek el chad” a milengedecheduch el kirir. c Ngika locha kmal uleba omengull er tirka el chedal a kort e le te ulerrenges er ngii er a “[lotebedii] a tekingel me lotebedeterir a re apostol el telkib.” (Rel. 5:34) Ngmlo mesaod er a rebebil er a remlo omtok el di mle telkib e ngmad a ultok e le mengeteklir a mlad. Me ngmillisiich er a kort me bo loba kllourreng e loutekangel er a rechapostol le mengeteklir er a Jesus a kmal dirk mlad. A Gamaliel a dilu el kmo: “Lak moruul a ngerang el omtok er tirkal chad. Di bechititerir! Ele lsekum a ikel bla letib ma ikel bla leruul a meldibech er a re chad, e ng mo nguemed, ngdi lsekum ng mlar a Dios el mei, e ng diak el sebechiu el mo mesisiich er tir. Ko bai mo metik er kemiu el oldechelakl er a Dios!” (Rel. 5:38, 39) Me a rechad er a kerrekeriil ulerrenges a tekingel. Engdi te dirk chillebedeterir a rechapostol e dmu er tir “me ng diak lluut el mengedecheduch el oba ngklel a Jesus.”​—Rel. 5:40.

¹³ Chelecha el taem e a Jehovah locha dirrek el mo ousbech er a rechad el ngar ngii a klisichir el ua Gamaliel el mo olengeseu er a rechedal. (Osi. 21:1) Jehovah sebechel lousbech er a chedaol reng er ngii el odbecheterir a remerreder, re judge, me a remeruul a llach el mo kutmeklii a soal. (Neh. 2:4-8) Engdi a lsekum me ngmechikid me kede “mo chuarm el kirel a llemalt” e ngkmal sebechel mo ulterekokl a rengud el  kirel eru el tekoi. (1 Pe. 3:14, BT) A kot, e a Dios a sebechel meskid a klisiich el loutekangel. (1 Ko. 10:13) Ongerung, a rumtok a “diak el [sebechir] el mo mesisiich” er a urerel a Dios.​—Isa. 54:17.

14, 15. (a) Te milekerang a rechapostol er a lemechelebed, e ngera uchul? (b) Mouchais er a ta er a experience el ngii ochotii el kmo a remesiungel a Jehovah a sebechir el dmeu a rengrir el loutekangel a ringel.

¹⁴ A chelebed el lengilai a rechapostol ngchiltechetur a rengrir me a lechub e ngrirelleterir el mo sorir el stob? Ngkmal diak! Sera “le tobed er a blil Olbiil e ng kmal mle dmeu a rengrir.” (Rel. 5:41) Ngera uchul me ngmle dmeu a rengrir? Ngdiak el deu a rengrir er a ringelel a bedengir er a chelebed. E ngbai mle dmeu a rengrir le te medengei el kmo te mlodechelakl el kirel a blakerreng er tir el mora Jehovah e uluukerebai er a Jesus.​—Mt. 5:11, 12.

¹⁵ Ngdi ua rudam er kid er a taem er a rekot el Kristiano, kid me kede outekangel loba deurreng sel bo dechuarm el kirel a ungil chais. (1 Pe. 4:12-14) Ngkmal diak el soad a lomekdakt, loldechelakl, me a lechub e longelebus er kid. Engdi kede metik er a deurreng sel dolemolem el loba blakerreng el mora Jehovah. Molatk er a Henryk Dornik el mle betok el rak loutekangel a odechelakl er a kakerous el kabelment. Ngmelatk er a August 1944, er a lodureklii ngii me a obekul el mora concentration camp. Tirka el lomtok a dilu el kmo: “Ngkmal diak el sebeched el rulleterir el mo meruul a ngii di el ngerang. Ngdmeu a rengrir el mad el kirel a klaumerang er tir.” A odam el Dornik a kmo: “Ngdimlak el soak el mad, engdi ngar er a chelsel aika el taem el kchilarm e ngmle sebechek el melemolem loba blakerreng el mora Jehovah e dimlak kurridii a blekengek e bo lemekngit a uldesuek el kirek. Tiakid a mle uchul a deuil a renguk.”​—Jak. 1:2-4.

16. Te milekera rechapostol e ochotii el kmo ngmle sorir el mo ungil merkii a klumech, e mekera doukerebai er a rolel e a rechapostol ulemerk?

¹⁶ A rechapostol a dimlak el waste a taem. Te di mle mereched el lmuut el mo omerk. Te uleba blekeu e “mle bek el sils el lolemolem  osisecheklir er a Ebangkelio el kirel a Jesus el Mesias . . . er a Templo ma obliil.” d (Rel. 5:42) Tirka el mle blak a rengrir el lomerk a mle sorir el mo ungil merkii a klumech. Mutebengii el kmo te mlora blirir a rechad, el ua lulemekrael er tir a Jesus Kristus. (Mt. 10:7, 11-14) Tiakid a ulterekokl el luchul me te mla merk osisecheklir er a Jerusalem el rokir. Tiakid el rolel a berkel a klumech a lodengelii a rechad er chelecha el taem el kirir a Resioning er a Jehovah. Sel doldingel a bek el blai er a territory er kid e kede ochotii el kmo ngdirrek el kmal soad el mo ungil merkii a klumech e mesterir a techellir a rokui el chad el rongesii a ungil chais. Me a Jehovah ngmla omekngeltengat er a urered loldingel a olbiil? Nguaisei! Te betok el miliol el chad a mla kongei er a klumech er a Renged er chelecha el taem er a ulebongel, e a betok er tir a mlo medengelii a klemerang er a lolengod er a chesimer er a blirir a Sioning er a Jehovah.

17-19. Ngera el mondai a dilubech el mle sebechel mo uchul a klekakeakl er a ongdibel, e ngera el ulekrael a lebilsterir a rechapostol el mo mesmechokl er ngii?

¹⁷ Tia el beches el ongdibel a mlo chobengelii a lmuut el ta er a mondai. Ngera tiang? A rebetok er a redisaiplo el miltecholb a rechad el mle oldingel er a Jerusalem e mle sorir el mesuub a lmuut el betok er a uchei er a lluut el mo remei. A redisaiplo el kiliei er a Jerusalem a  millenget lolengeseu ocheral a kall me a lmuut el bebil lolengeseu er tir. (Rel. 2:44-46; 4:34-37) Engdi ngdilubech a mondai el kmal kirir el mo kerekikl er a rolel a losmechokl er ngii. A remellakl el dil el melekoi a tekoi er a Grik a “mlora kemikr er chomerukel el kall ra bek el sils.” (Rel. 6:1, BT) E a remellakl el dil el melekoi a tekoi er a Hebru a dimlak lengar er a kemikr. Me te sorir a rebebil el kuk ngaruchei er a rebebil e dimlak el lemelemalt el omeruul. Tia kmal oberaod el tekoi le ngsebechel mo uchul e ngmo er ngii a klekakeakl er a chelsel a ongdibel.

¹⁸ A rechapostol el mle mechesang el meruul er a urerir el governing body er a ongdibel a miltebengii el kmo ngdiak lungil a le “bechere chosisechakl ra Tekoi ra Dios e [losiou] ra blengur.” (Rel. 6:2, BT) Me te dilu er a redisaiplo me lesiiketerir a reteuid el chad el “mui er a chedaol reng me a llomeserreng” el sebechir a rechapostol el tutketerir el mo “oungerachel er tia el tekoi.” (Rel. 6:3, NW) Te uluusbech er a rudam el lungil chisir e le ureor a dimlak di le omerusel a kall. Te dirrek el uluungerachel a udoud, omechar a klalo, e mle kirir el lemuches aike el rokui el lurruul. A ngklir a rudam el lengiltiterir a mle tekoi er a Grik, me nglocha mlo beot er tirke el melakl el dil el miltemall a rengrir el oumerang er tir. Me a rechapostol a millatk el kirir tirka el odam el lengiltiterir e milluluuch el kirel e tiltketerir tirka el teuid el odam el mo “oungerachel er tia el tekoi.” e

¹⁹ Me tirka el odam el meltutk el mo oungerachel a kall e ngbelkul a kmo ngmla mo diak el ngerechelir el lomerk er a ungil chais? Ngkmal diak el uaisei! A Stefanus a ta er tirke el odam el miltutk a mle ta er a blak a rengul e bekeu a rengul lomerk er a ungil chais. (Rel. 6:8-10) A Filip me ngdirrek el mle ta er tirka el teuid e ngii okedongall el “ngikel omerk er a Ebangkelio.” (Rel. 21:8) Me ngbleketakl el kmo tirka el teuid a millemolem el blak a rengrir el lomerk er a klumech er a Renged.

20. Te mekera rechedal a Dios e oltirakl er a teletael el lekiltmeklii a rechapostol?

 ²⁰ A rechedal a Jehovah er chelecha el taem me te dirrek loltirakl er a teletael el lekiltmeklii a rechapostol. A rudam el lolatk el ousbech er tir el kirel a ngerachel er a ongdibel a kirir el lochotii el kmo te oba llomeserreng er a Dios e ochotii el kmo a chedaol reng a oureor er a chelsir. Ngar cheungel a ulekrolel a Governing Body e a rudam el oltirakl aike el requirement el mengai er a Bades a lolutk er tir el mo mesiou el ta er a remechuodel me a re ministerial servant er a ongdibel. f (1 Ti. 3:1-9, 12, 13) Tirka el olab aika el qualification a sebeched el melekoi el kmo te miltutk er a chedaol reng. Tirka el odam a kmal meringel el oureor e oungerachel a tekoi el lousbech ongdibel. A remechuodel a locha mo remuul a arrangement el lolengeseu er a remechudelang el odam me a odos lousbech a ngeso. (Jak. 1:27) A rebebil er a remechuodel a oureor el omekedechor a Blil a Ongdibel, organize a convention, me a lechub e te oureor el ngar cheungel a Hospital Liaison Committee. A re ministerial servant a meruul a betok el kirel a ongdibel engdi ngdiak luldimukl er a omecheliu e olisechakl er a ongdibel. Tirka el rokui el odam el olab aika el ngerachel a meruul a ngerechelir er a ongdibel me a cheldebechel e melemolem el meruul er a ngerechelir er a Dios el mo omerk er a ungil chais er a Renged.​—1 Ko. 9:16.

21, 22. Ngera ochotii el kmo a Jehovah ulemekngeltengat er tia el beches el ongdibel?

²¹ Ngoeak a ngelsuil a Jehovah e tia el beches el ongdibel a mlo mesisiich odechelakl er a rumtok me a mondai el mle sebechel mo uchul a klekakeakl. Ngbleketakl el kmo a Jehovah ulemekngeltengat er tir le kede menguiu el kmo: “Tekingel a Dios a mengal uleberk, ma rultirakl er a Jesus el mlar a Jerusalem a mengal mlo betok, e dirrek el betok er a re prist a mlo oumerang er a Jesus.” (Rel. 6:7) Tia di ta er aike el betok el experience el donguiu er a babier er a Rellir lochotii el kmo Jehovah ulemekngeltengat er a ongdibel. (Rel. 9:31; 12:24; 16:5; 19:20; 28:31) Ngdirrek el kmal smisichid er chelecha el taem sel derenges okurulel a ureor er a berkel a klumech er a Renged er a kakerous el beluu er a beluulechad.

²² A rekesib a rengrir el mengeteklel a klechelid er a taem er a rekot el Kristiano dimlak el stob odelecheklir. Ngbai liluut el mo mesisiich odechelakl. Ngdi telkib kung e a Stefanus a mo nguu a kmal mekngit el odechelakl el ua bo desa er a ongingil el bliongel.