1, 2. Ngera el mengasireng el tekoi a lerirellii a Petrus me a Johanes er bita er a siseball er a templo?

 A SILS a melidiich er a seked. Reblak a rengrir el Chijudea me a redisaiplo er a Jesus a merema er a templo. Ngdi kmedung e ngmo “belsechel a nglunguuch.” a (Rel. 2:46; 3:1) A Petrus me a Johanes a mle teloi er a seked e mirrael el mora siseball er a templo lokedongall el Klebokel Siseball. Ngklou a cherrodech er a remerael me a rechadecheduch. E ngar ngii a ta el chad el milechell el chitechut el okeua me a derengel a rekil lolengit a udoud.​—Rel. 3:2; 4:22.

² Me a lolekeda Petrus me a Johanes er ngika el chitechut e ngmocha olengit a udoud er tir. Tirka el apostol a mlo stob me ngkmal mlo ungil a rengul ngika el chad le ngomdasu el kmo te mo omsa udoud. A Petrus a dula er ngii el kmo: “A silber ma kolt a diak er ngak, ak di meskau a ikel ngarngii er ngak; ma kdmu er kau loba ngklel a Jesus Kristus ra Nazareth el kmo, morael, me morael.” Kam imagine er tia el seked lomes er a Petrus el nguu a chimal ngika el chitechut e okisii. Ngketengel mo dechor er a klengar er ngii! Nglocha kmal mle mechas a rengrir! (Rel. 3:6, 7, BT) Ngsebechem el imagine er ngika el chad el dechor el lomes aika el ochil e melasem el merael, el ketengel meruul er ngii er a klengar er ngii? Tia uchul me ngdi mlo riredekekl el mekiis el merael e klou a ngerel el oldanges er a Dios!

 3. Ngera el ngaruchei el sengk a sebechel a seked me ngike el mle chitechut el chad el nguu?

³ Me a seked a di mlo orrechereched el mo omes er a Petrus me a Johanes er a Berangdang er a Salomon. Ngar tia el basio el mle ta el dechor er ngii a Jesus e olisechakl e a Petrus a uluuchais er tir er a mera el belkul a tekoi el dirk dilubech. (Jn. 10:23) Ngomesterir a seked me ngika el mle chitechut a sengk el lmuut el ngarbab a kerresel er a silber me a kolt. Tia el sengk a lmuut el ngaruchei er a mo ungil er a secher. Ngtechall el obult me a kngterir lemusubes, e bo loltirakl er a mla metutk er a Jehovah el Jesus Kristus el “ngikei el omekrael er kid el mor a klengar.”​—Rel. 3:15.

 4. (a) Tia el mengasireng el tekoi el dilubech, ngmilechelii a ngera el mondai? (b) Ngera el eru el ker a bo donger?

 ⁴ Tia mera el mle ileakl el sils! A chad a mlo ungil e chelechang ngsebechel merael. Me a rebetok el telael a mlo er tir a techall el mo omekungil er tir er a klereng me bo lsebechir el merael el oltirakl er a soal a Dios. (Kol. 1:9, 10) Me a lmuut kung, a tekoi el dilubech er tia el sils a uchul me a rechad el lullab a klisiich a mlo melasem el merrob er a reblak a rengrir el disaiplo er a Jesus me lak loruul er a ureor el bilsterir el mo omerk er a klumech er a Renged. (Rel. 1:8) Tirka el ngarbab el chad ulemes er a Petrus me a Johanes el kmo “te di chad el diak a skulir.” Engdi ngngera sebeched el suub er a rolel e te mirrekii a klumech el mora seked? b (Rel. 4:13) E mekera sebeched loukerebai er a omerellir er a lebo lechebangel odechelakl, tir me tirke el lmuut el bebil er a disaiplo?

 5. Ngera kede suubii er a rolel e a Petrus a milengedecheduch er a seked?

⁵ A Petrus me a Johanes a milengedecheduch er a seked. Te mle medengei el kmo a rebebil er tir a mle uldimukl er tirke el ulengit me lokodir a Jesus. (Mk. 15:8-15; Rel. 3:13-15) Molatk er a blekeu el lulechotii a Petrus er a ledu el kmo ngika el chitechut a mlo ungil loeak a ngklel a Jesus. A Petrus a dimlak longkekerei er a berredel tia el klemerang. Ngdi mle bleketakl louchais er a seked el kmo te mle chelsechusem er a kodellel a Kristus. Ngdi Petrus a dimlak louketui er a seked. Ngmle medengei el kmo te ‘mirruul a ikal tekoi [le te] dimlak lodengei.’ (Rel. 3:17, BT) Me ngulemekedong er tir el odam e milsaod er a ungil chais er a Renged. A lsekum te obult e mo oumerang er a Kristus, e ngmo er tir a “blsechel chomelisiich” er a Jehovah. (Rel. 3:19, BT) Kid me ngdirrek el kired lochotii a blekeu e di melemalt el mengedecheduch sel douchais er a mereku el kerrekerilel a Dios. Osisiu el taem, e ngdiak el kired el mekngit el mengedecheduch me a lechub e doukerrekeriil er a rechad. E ngbai soad lomes er a rokui el domerk el mo er tir el kmo ta er a klebesei e te mo odam er kid, e soad el mo ua Petrus el mesaod aike el klungiaol er a klumech er a Renged. 

 6. Ngmilekera Petrus me a Johanes e ochotii a klengariourreng?

⁶ A rechapostol a mle ngariou a rengrir el chad. Te dimlak lolai a odanges el kirel a mengasireng el tekoi el lurruul. A Petrus a dilu er a seked el kmo: “Cho momdasu e ng uleak a di klisicham ma lechub e ng  ungil blekerdelam er medal a Dios a rirellii ngikal chad el mo merael?” (Rel. 3:12) Petrus me tirke el bebil er a apostol a mle medengei el kmo a ngii di el lungil leketmokl er a omesiungir a di oeak a klisichel a Dios. Ngdiak el klisichir. Sei a uchul me ngmle ngariou a rengrir e ngilai a odanges el msa Jehovah me a Jesus.

7, 8. (a) Ngera el sengk a sebeched el mesterir a rechad? (b) Ngmekera telbiil er a “belsechel a bo le mukbeches a rokui el tekoi” e toutang er chelecha el taem?

⁷ Kid me ngdirrek el kirel mo ngariou a rengud sel domerk er a klumech. Nguaisei a chedaol reng er a Dios a diak lebeskid a klisiich er chelecha el taem el mo meruul a mengasireng el tekoi. Engdi ngsebeched el ngosuterir a rechad el mekurulii a klaumerang er tir er a Dios me a Kristus e nguu osisiu el sengk el Petrus a ulemsa seked, el ngii a techall el mo musubes a kngterir e nguu ongelaod er a Jehovah. Bek el rak e te betok el dart el telael el chad a nguu tia el techall e metecholb el disaiplo er a Kristus.

⁸ Nguaisei, kede kiei er a taem el lomekedong er ngii a Petrus el kmo ng “belsechel a bo le mukbeches a rokui el tekoi.” A Rengedel a Dios a ulemuchel el mengedereder er a eanged er a 1914, e tia uleltaut a ulaoch el “le dillii a Dios er a ngar a mong el uleak a re mechedaol el profet er ngii.” (Rel. 3:21; Psa. 110:1-3; Dan. 4:16, 17) Kedeb el taem er uriul e a Kristus a ngilsuterir a redisaiplo er ngii el lmuut el toketekii a mera el omengull er tia el chutem. Me a rebetok el miliol a mla mei er a baradis er a klereng e mla mo er cheungel a Rengedel a Dios. Te mla chemoit aike el di mla blekerdelir e mla “moubail er ngikel beches el chad, el ulebeob el okesiul a Dios.” (Efe. 4:22-24, BT) Ngdi uai ngike el chitechut el mlo ungil loeak a chedaol reng, me ngdi osisiu ngdiak loeak a klisichir a rechad e ngbai chedaol reng er a Dios a uchul me tia el ureor a meketmokl. Ngdi ua Petrus, ngkired el mo oba blekeu e mo ungil losisecheklii a Tekingel a Dios el mora rechad. Ngii di el tekoi el deruul el ngosuir a chad el mo ta er a disaiplo er a Kristus a meketmokl loeak a klisichel a Dios, ngdiak el klisiched.

9-11. (a) Te milekera remerreder er a Rechijudea er a lerengesii a klumech el lulebang a Petrus me a Johanes? (b) A rechapostol te rirellii er a rengrir el mo mekerang?

⁹ Ngkmal mlo klou a cherrodech er a seked el kirel a tekingel a Petrus me ngika el chitechut el merdekekl e mengedecheduch el klou a ngerel. Me a merredelir a remengkerengel a templo, el mle ngerechelel omekerreu er a rechad el mei er a templo, me a rebderrir a reprist a di mle mereched el mong. Ngika el merredelir a remengkerengel a templo me a reprist a ulterekokl el mle Sadusi, el tir a merau e mesisiich a  deruchellir er a balatiks. Te millisiich a budech lobengterir a rechad er a Rom. Te diak el ua Refarisi el mle kerekikl el lolengesenges er a llach, te bai ultngeklii a llach me a klaumerang er a okiis. c Nglocha kmal mle mederdirk a rengrir lomes er a Petrus me a Johanes el ngar er a templo e bekeu lolisechakl el kmo a Jesus a mla mekiis er a kodall!

¹⁰ Te ngiluu a Petrus me a Johanes lotungeterir er a blil a kelebus e a bo lekukuk e te ngiltiterir el mora ngarbab el kort er a Rechijudea. Tirka el merreder ulemdasu el kmo te kmal mengarbab el chad, e a Petrus me a Johanes a “di chad el diak a skulir” me ngdiak a llemeltir el olsisechakl er a templo. Te dimlak lebora ungil skuul er a klechelid. Me nguaisei engdi rechedal tia el kort a kmal mle mechas a rengrir le te kmal mle ulterekokl a rengrir el mengedecheduch e meduch el mengedecheduch. Ngera uchul me a Petrus me a Johanes a mle uaisei? A ta er ngii a tir el ‘ulebengkel a Jesus.’ (Rel. 4:13) A Mastang er tir a dimlak lolisechakl er tir el ua resensei er a llach, e ngbai ullisechakl er tir el mo mengedecheduch el ngar ngii a klisichel osisecheklir.​—Mt. 7:28, 29.

¹¹ A ngarbab el kort a dilu el kmo ngkirir el stob lomerk. Ngar tiakid el taem e a ngarbab el kort a uleba klou el klisiich er a beluu. Sesei el sandei er uchei er tiang e a Jesus a mlara medal tia el kort el ngii a dilu el kmo: “Ng kirel el mo mad.” (Mt. 26:59-66) Me nguaisei, engdi Petrus me a Johanes a dimlak el medakt. A Petrus me a Johanes ulechotii omengull e dilu er tirka el ngar ngii a skulir me a klisichir er a beluu el chad el kmo: “Ka di le kemiu el merriter er ngii el kmo ngera melemalt er medal a Dios, a kim olengesenges er kemiu ma lechub e kim olengesenges er a Dios? Kemam a diak el sebecham el mo lmuk el diak kim ouchais a ikel bla kim ues ma bla kim renges.”​—Rel. 4:19, 20.

12. Ngera sebechel ngosukid el mo ulterekokl a rengud e mo oba blekeu?

¹² Kau, ngsebechem lochotii a osisiu el blekeu? Ngmo uangerang a uldesuem sel lebo er ngii a techellem lomerk el mora remerau, rengar ngii a skulir, me a lechub te ngarbab el chad? Ke mo mekerang a lsekum a rechedal a telungalek er kau, rengalek er a skuul, me a lechub e ngrechad el moureor lobengterir a melekoi a mekngit er kau le ngklaumerang er kau a uchul? Ke mo medakt? A leuaisei, e ngsebechem el mo mesisiich er a dektem. A Jesus er a lengar tia el chutem e ngulsisecheklterir a rechapostol er ngii el mo meduch el mesebechakl a klaumerang er tir e a osisiu el taem e te olecholt omengull. (Mt. 10:11-18) Uriul er a lebekiis a Jesus e ngtilbir el mora redisaiplo er ngii el kmo ngmo obengterir el “di blechoel el mo lmuut er a ulebongel er a  beluulchad.” (Mt. 28:20) Ngar er a cheungel a ulekrolel a Jesus, e a “blak a rengul e mellomes a rengul el mesiou” olisechakl er kid el mo mesebechakl a klaumerang er kid. (Mt. 24:45-47; 1 Pe. 3:15) Kede ngmai aika el ulekrael er a miting er a ongdibel, el ua sel miting er A Klengar er Kid a Rekristiano me a Omesiunged, me a dirrek loeak a suobel el mengai er a Biblia el ua “Bible Questions Answered” el ngar er a website er kid er a jw.org. Kau, ke ngar er aika el miting e ousbech aika el suobel loltobed? Omoruul el uaisei, e ngmo ulterekokl a rengum me kau a smisichii a blekengem. E di ua rechapostol, ngkmal diak bo becherei a ngii di el ngerang me leterebengau louchais a klemerang el bla mues e remenges.

13, 14. Sel bo dechebangel a ultok e ngera ungil doruul er ngii, e ngerang?

¹³ Uriul er a lemengubet er a kort a Petrus me a Johanes e te mlo obengterir a rechedal ongdibel. Me “te mlo dmak e meluluuch el mor a Dios” lolengit er a blekeu el mo melemolem el lomerk. (Rel. 4:24) A Petrus a mle ungil medengei el kmo ngkmal diak el sebeched el di ultuil er a klisiched el meruul er a soal a Dios. Sesei el sandei er uchei e ngkmal mle ulterekokl a rengul el melekoi er a Jesus el kmo: “A lsekum a rokui el chad a mo choitau e ngdi ngak a kmal diak bo kchitau.” Engdi ngua ledilu Jesus, a Petrus a di mle mereched el mo medakt er a rechad e ultngeklii a sechelil e sensei er ngii. Me nguaisei, a Petrus a ngilai a klubelel er a cheleuid el lerirellii.​—Mt. 26:33, 34, 69-75.

¹⁴ A lsekum e ngsoam el melemolem el meruul er a ngerechelem lomerk el kirel a Kristus e ngdiak el sebechem el di melekoi el kmo, ke mla rullii er a rengum el mo meruul er ngii. Sel bo lolasem a rumtok el melemall er a klaumerang er kau me a lechub e te meruul er kau el mo stob el lomerk e moukerebai er a Petrus me a Johanes. Moluluuch lolengit er a Jehovah me lesisichau. Mosiik a ngeso er a ongdibel. Mouchais er a remechuodel me a remesisiich er a klemerang el kirel a  ringel el omchelebangel. A nglunguchir a rebebil a mesisiich el klisiich el sebechel loltekau er kau.​—Efe. 6:18; Jak. 5:16.

15. Ngera sebechel melisiich er kau a lsekum e ngmla er ngii a taem el mstob el lomerk?

¹⁵ A lsekum orimel er a rebebil a rirellau el mo diak momerk, e lak bo lemechitechut a rengum. Lak mobes el kmo a rokui el apostol a mle stob er a lemad a Jesus engdi te liluut el mo omerk. (Mt. 26:56; 28:10, 16-20) Lak bechei a cheleuid el mriruul er a ngar er a mong me longitechut er kau, e bai mousbech aike el tekoi el msiluub er ngii el melisiich er a rebebil.

16, 17. Ngera sebeched el suub er a nglunguchir a rultirakl er a Kristus el mlara Jerusalem?

¹⁶ Ngera ungil doluluuch el kirel sel loldechelakl er kid a rechad lolab a klisiich? Mutebengii el kmo a redisaiplo a dimlak lolengit me lak bo lechebangel a odechelakl. Te dirkak lobes a tekingel a Jesus er a ledu el kmo: “A lsekum tuleldechelakl er ngak, e te dirrek el mo oldechelakl er kemiu.” (Jn. 15:20) Me tirka el blak a rengrir el disaiplo a bai ullengit er a Jehovah el kmo “meseterir” a rumtok a lorrouk. (Rel. 4:29, BT) A redisaiplo milsa rokir el siasing. Te miltebengii el kmo a odechelakl el blo lechebangel a oltaut a ulaoch. Ngdi ua lullisechakl er tir a Jesus el meluluuch, te mle medengei el kmo a soal a Dios a mo “motaut . . . er a beluulchad,” e diak a ngera el sebechir a rechad el merreder el rullii el kirel.​—Mt. 6:9, 10.

¹⁷ Me a redisaiplo milluluuch el mora Jehovah me bo lsebechir el kutmeklii a soal. Te dilu el kmo: “Mrelleterir ar mesiungem me le bekeu el mengedecheduch a tikingem.” Me ngmilekerang a Jehovah? “Sel ble le kldibel er ngii a mlo melmesim. Te rokui el meltuchel er a Chedaol Reng me ng mlo diak le medakt el omerk a tekingel a Dios.” (Rel. 4:29-31, BT) Ngkmal diak a ngerang el sebechel torrebengii a soal a Dios a lemeketmokl. (Isa. 55:11) Osengir a redi chad e a soal a Dios a kora ua lak el sebechel meketmokl, me a recherrouel a locha kmal mesisiich. Engdi sel doluluuch el lolengit a klisiich, e a Dios a mo smisichid el mo melemolem el oba blekeu lomerk a tekingel.

18. Ngera te mirruul a rechedal ongdibel el kirel a tang me a tang?

¹⁸ Tia el beches el ongdibel el mlo er ngii er a Jerusalem a di mle mereched el mukeroul el mo betok er a 5,000 el chad. d Alta te mlara kakerous el beluu me a siukang, engdi te “mle ta rengrir el ta uldesuir.” (Rel. 4:32; 1 Ko. 1:10) A redisaiplo dimlak di loluluuch lolengit er a Jehovah me lomekngeltengat er a blakerreng er tir. Te dirrek el mle kasisiich er a tekoi er a klereng, e a lengar ngii a metacherbesul e te dirrek el mle kaingeseu. (1 Jn. 3:16-18) El ua tiang, a ta er a disaiplo el ngklel a Josef el lulemekedong er ngii a rechapostol el Barnabas a ulterur a chetemel e tilengetengii a cheral el lolengeseu er tirke el mlara cheroid el beluu el mei er a Jerusalem, me lsebechir el melemolem el kiei e mesuub a lmuut el betok el kirel a beches el klaumerang er tir.

19. Ngera uchul me a Jehovah milekodir a Ananias me a Safira?

¹⁹ A ta el obekel el ngklir a Ananias me a Safira a dirrek el ulterau a kloklir e millenget. Te mirruul er a rechad el mo omdasu el kmo te tilenget a cheral el rokui, engdi te “[ulerreked] a bebil er a udoud.” (Rel. 5:2) A Jehovah milekodir a Ananias me a Safira. Ngdimlak el ngelsengesel a tenget a uchul me te mlo okodall e ngbai tir el mle mekngit a moktek er tir el melenget e dirrek el dimlak louchais a klemerang. Te ‘dimlak loumulak er a re chad e [ngbai te] ulemulak er a Dios!’ (Rel. 5:4) Ngua tirke el cheblad el chad el ultngeklterir a Jesus, a Ananias me a Safira a di mle uai tir el sorir a chetengakl er a rechad el ngaruchei er a kengei er a Dios.​—Mt. 6:1-3.

20. Ngera kede suub el kirel omelenget el mora Jehovah?

²⁰ Ngdi ua reng er omerous el luleba reblak a rengrir el disaiplo er a Jerusalem er a taem er a rekot el Kristiano, a rebetok el miliol el Sioning me te dirrek el kmal support er a ureor er a berkel a klumech el meketmokl er a beluulechad el rokir loeak a tengetengir. Ngdiak orrimel er a chad el melenget a temel me a ududel el support er a ureor. Nguaisei, a Jehovah diak el soal a domai er a rengud el mesiou er ngii me a lechub e doruul er ngii el uai a de mlorimel. (2 Ko. 9:7) Me sel dolenget e a Jehovah diak lomes er a klungel e ngbai omes er a moktek er kid. (Mk. 12:41-44) Ngkmal diak el soad el mo uai a Ananias me a Safira el mesiou er a Dios el kirel a chetengakl me a odanges me a lechub e ngkid el mo melai a klungiaol. E ngbai soad el mo uai a Petrus, Johanes, me a Barnabas el mesiou er a Jehovah le ngbetik a rengud er ngii me a rechad.​—Mt. 22:37-40.