1-3. Ngera el ues a lilsang a Petrus, e ngera uchul me ngkired el mo medengelii a belkul?

 NG 36 C.E. e a Petrus a ngar er a beluu er a Jopa. Ngmla mo sesei el klebesei el lekiei er a blil a chad el Simon a ngklel. A Simon a mle kiei er bita er a daob e mirruul a leather lousbech a budel a charm. A Rechijudea miltengel osengir er a rechad el loureor el uaisei me a ruumesingd er tir a kmal diak lekengei el mo kiei er a blil. a Engdi Petrus a dimlak el uai tir. Me nguaisei a Jehovah mle soal ngosuir a Petrus el mo medengelii a delechel a rolel e ngdiak longetukel er a rechad. Me a Petrus er a lebora bebul a blai el mo meluluuch e a Jehovah ulsisecheklii er a kmal klou a ultutelel el tekoi.

² Me a Petrus er a loluluuch e ngmocha mesa ues. Aike el lules a mederdirk er a rengul a ngii di el Chijudea. Ngmilsa sits el olimoim el mei er iou el ngar ngii a charm er ngii. Aika el charm a doltirakl er a Llach e ngdiak el klikiid. A ngor er a eanged a dmu er a Petrus el kmo momekoad e mongang engdi ngii a dmu el kmo: “Ngak a kmal dirkak kkelii a ngerang el ngar a belsachel er a diak le klikiid ma lechub e ng mlukidokel.” Ngedei el taem el ledu er a Petrus el kmo: “A ikel bla ledu Dios el kmo ng klikiid, lak momdasu el kmo ng diak le klikiid.” (Rel. 10:14-16) Me a Petrus a mlo rrau a rengul engdi ngdimlak leuaisei el meketeket.

³ Ngera mle belkul a ues el lilsang a Petrus? Ngklou a ultutelel a dirrek el bo dodengelii a belkul e le ngosisecheklid er a osengel a Jehovah el kirir a rechad. Kid el mera el Kristiano a  diak el sebeched el mo ungil merkii a klumech er a Rengedel a Dios a lak desuubii el moba osengel a Jehovah el kirir a rechad. Me chelechang e kede mo mesaod a dilubech er a uchei me a uriul er tia el tekoi me bo dodengelii a belkul a ues el lilsang a Petrus.

4, 5. Ngtecha Kornelius, e ngera dilubech er a loluluuch?

⁴ A Petrus a kmal diak lodengei el kmo a chelii er a beluu er a Sesarea el ngar er a diluches e bekord el 30 el mael a cherridel, e a chad el ngklel a Kornelius a dirrek el ngiluu a ues er a Dios. A Kornelius a centurion er a urrurt er a resoldau er a Rom e ‘mlengull . . . ra Dios.’ b Ngdirrek el kmal ulemekerreu er a telungalek er ngii e “meluu ra Dios, ngii mar chad ra blil el rokui.” A Kornelius a diak el ta er a Chisentael el mla obult el mora klechelid er a Rechijudea me a diak el blotk. Engdi ngullecholt er a klechubechub el mora Rechijudea lousbech a ngeso, e ulemesterir a udoud me a lmuut el bebil er a ngat. Ngika el bliochel a rengul el chad a “dimleblechoel meluluuch el mora Dios.”​—Rel. 10:2, BT.

⁵ Ngmle bekord el edei el klok er a ieta sils e a Kornelius a meluluuch e mocha omes er a ues. A anghel a dilu er ngii el kmo: “A nglunguchem ma chomerellem ra klechubechub a ngilasech el mora Dios el uleklatk.” (Rel. 10:4, BT) Ngdirrek el dilu er ngii me  lodercheterir a rebebil er a rechedal me bo lenguu a Petrus. A Kornelius el diak el blotk el Chisentael a mocha soiseb er a chesimer, el mle chelsimer el me lmuut er chelechang. Ngika mocha nguu a klumech er osobel.

6, 7. (a) Mouchais er a experience el lochotii el kmo a Dios onger a nglunguchir a re bliochel a rengrir el sorir el mo medengelii a klemerang el kirel. (b) Ngera kede suub er aika el experience?

⁶ A Dios, ngonger a nglunguchir a re bliochel a rengrir er chelecha el taem el sorir el mo medengelii a klemerang el kirel? Molatk er a experience er a redil er a Albania el ngiluu a copy er a A Ongkerongel el mesaod er a okurulir a rengalek. c Ngdilu er a Resioning el mlo odngelii el kmo: “Ke mo oumerang er ngak ak du er kemiu el kmo ak milluluuch el mora Dios lolengit a ngeso el omekeroul er a rengelekek? Ngika uleldurech er kemiu! Ko mla rutechii a renguk. Tiakid sel kmal kulsiik er ngii!” Ngika el redil me a rengelekel el di redil a ulemuchel el mesuub e a bechil a mlo teloi er tir el mesuub er uriul.

⁷ Tiang ngdirk ta el taem er a ledubech? Ngdiak! Betok el experience el uai ngii a mla duubech el meliuekl er a beluulechad el rokir, e diak el kora tekoi el di mle kiul el duubech. Tiang ngera ngochotii? A kot, e a Jehovah onger a nglunguchir a re bliochel a rengrir el chad el osiik er ngii. (1 Ki. 8:41-43; Psa. 65:2) Ongerung, a rechanghel olengeseu er kid er a ureor er a berkel a klumech.​—Och. 14:6, 7.

8, 9. Ngera ngmileketeklii a chedaol reng el mora Petrus, me a Petrus ngmilekerang?

⁸ A Petrus a dirk mlara bebul a blai el “melechedech” er a belkul ngii el ues e te mei a ruderchelel a Kornelius. (Rel. 10:17) A Petrus, el mle edei el taem el diak lekengei el menga kall el diak el klikiid er a Llach, ngmo kongei el lobengterir tirka el chad el mo soiseb er a blil a Chisentael? A Dios uluusbech er a chedaol reng er ngii lochotii a soal er ngii. A reng a dilu el kmo: “Te ngar ngii a re tedel chad el osiik er kau. Mkedmeklau e bo metengel, e lak momai er a rengum el obengterir el merael, ele ngak a uleldurech er tir.” (Rel. 10:19, 20) A ues el kirel a sits el lilsang a Petrus a ulterekokl el ngilsuir el mo kltmokl loltirakl a ulekrolel a chedaol reng.

 ⁹ Sera bo lodengei a Petrus el kmo a anghel a dilu er a Kornelius me lodercheterir a rechad el mo nguu, e ngilititerir el mora blai “me ngmlengedmokl er tir.” (Rel. 10:23a, BT) Ngika el bekongesenges el apostol a ulemuchel el melodech er a uldesuel er a bocha lodengelii a soal a Dios.

10. Ngmekera Jehovah lomekrael er a rechedal, e ngera el ker a ungil a di lekid el oker?

¹⁰ A Jehovah melemolem el mekekokil lolisechakl er a rechedal er a soal. (Osi. 4:18) Ngoeak a chedaol reng er ngii e ngomekrael er a “blak a rengul e mellomes a rengul el mesiou.” (Mt. 24:45) A lebebil e nglocha mo er ngii omelodech er a klemedengei er kid er a Tekingel a Dios me a lechub e ngrolel a cheldebechel a meruul a tekoi. Me ngungil di lekid el oker el kmo: ‘Ngak, ak mekerang el kirel aika el omelodech? Ngak, ak kongei el oltirakl er a ulekrolel a chedaol reng er a Dios?’

11, 12. Ngera ngmirruul er ngii a Petrus er a lebora Sesarea, e ngera ngsiluubii?

¹¹ A ongingil sils e a Petrus me tirke el tedei el oderchelel a Kornelius me a re “telolem [el chad er a Chijudea] lodam” er a Jopa a mirrael el mora Sesarea. (Rel. 11:12, BT) Kornelius el mle medengei el kmo a Petrus a mong a uchul me ngmilengideb er a “re chedal ma re kmal sechelil,” el rokui el di Chisentael. (Rel. 10:24) A Petrus er a lebong e ngrirellii a tekoi el locha dimlak lolatk el kmo a ta er a klebesei e ngmo kongei el rullii: Ngsiliseb er a blil a diak el blotk el Chisentael! A Petrus a kmo: “Ko medengei el kmo ngmekull ra llach a chad ra Judea a loldak er ngii ra chad ra ngodech el beluu, malechub e bo le keed er ngii; ngdi Dios a ullecholt er ngak el kmo, ngdiak molekoi ra ngiidil chad el kmo ngmengelengalek malechub e mko ngdiak le klikiid.” (Rel. 10:28, BT) Ngar tiang e a Petrus a mla mo mtebengii el kmo a ues el lilsang a dimlak di lolisechakl er ngii el kirel a kall el sebechel el mengang. Ngika diak el kirel ‘melekoi ra ngiidil chad [el mo lmuut er a Chisentael] el kmo . . . ngdiak le klikiid.’

¹² Rokui el mlara blil a Kornelius a kmal mle sorir lorrenges aike el bo lolekoi a Petrus. A Kornelius a kmo: “Kemam tia er chelechang el kldibel er medal a Dios e kldmokl el mo orrenges a ikel bla ledu er kau a Rubak.” (Rel. 10:33) Ka dim imagine er a feeling er kau omko ke rongesii a chad el semeriar  el melekoi el uaisei! A Petrus ulemuchel el kmo: “Chelecha e ak meral mocha medengei el kmo a Dios a diak longetukel rar chad, me tirikel meluu ra Dios e meruul a llemalt a le ngiiteterir ra bek el beluu.” (Rel. 10:34, 35, BT) A Petrus a siluubii el kmo a osengel a Dios er a rechad a diak loltirakl er a beluu, kebliil, me a lechub e ngchiro. Me nguluuchais er tir el kirel a berkel a Jesus er a klumech, kodellel, me a okisel.

13, 14. (a) Ngera utebengall er a beltel a Kornelius me tirke el lmuut el bebil er a Chisentael er a 36 C.E.? (b) Ngera uchul me ngdiak el kired loukerrekeriil er a rechad el loltirakl aike el domes er a ikrel?

¹³ Chelechang e ngmocha duubech a tekoi el dirkak a ta el meketmokl: “Ng dirk mengedecheduch a Petrus” e a chedaol reng a moiitel er tirka el “Chisentael.” (Rel. 10:44, 45) Tia di chimo el taem el Tekingel a Dios a mesaod el kmo ngmloitel a chedaol reng er uchei er a lenguu a techolb. A Petrus a mtebengii el kmo ngochotel a kmo te oba kengei er a Dios me ngdula er tir “me te metecholb.” (Rel. 10:48) Beltir a Rechisentael er a 36 C.E. a mlo ulebengelel a temir a Rechijudea loba ileakl el kengei er a Dios. (Dan. 9:24-27) Ngar tiakid el taem e a Petrus a uluusbech er sel ongedei e ulebongel el “kiis er a Rengedel a eanged.” (Mt. 16:19) Tia el kiis a milekengii a chesimer el mora rediak el blotk el Chisentael el mo ngellitel el Kristiano.

¹⁴ Kid el lomerk er a klumech er a Renged er chelecha el taem a mtebengii el kmo a “Dios a diak a soal ma chetil el chad.” (Rom 2:11) Ngmoktek er ngii el “soal a rokui el chad a bo le sobel.” (1 Ti. 2:4) Me ngdiak el kired el loukerrekeriil er a rechad  lolab aike el domes er a ikrel. Ngngerecheled el mo ungil merkii a klumech er a Rengedel a Dios el mora rokui el chad, ngdiak el ior er a beluu, teletelir er a ikrel, me a lechub e ngklechelid er tir.

15, 16. Ngera uchul me a rebebil Kristiano el Chijudea ulemtok er a Petrus, e milekera Petrus e smodii?

¹⁵ Petrus a ulterekokl el kmal mle semeriar louchais a tekoi el dilubech me ngmlora Jerusalem. Engdi rudam el ngar er a Jerusalem a rirenges er uchei er a lebong el kmo a Rechisentael a “mla mor tir a tekingel a Dios.” Me a Petrus er a lebochang e “tirkel mle sorir a le bor a botk a re Chisentael a ulelterturek er ngii.” Ngkmal milengesang er tir el Petrus a mlo soiseb er a “blirir a re diak le blotk el Chisentael, e dirrek el ulemengur el obengterir!” (Rel. 11:1-3) A mondai a diak el Rechisentael a mla mo oltirakl er a Kristus e ngbai te millisiich el kmo, a Rechisentael a kirir loltirakl er a Llach luldimukl er ngii a mo obotk, e seikid a Jehovah sebechel kongei er a omengull er tir. Ngbleketakl el kmo a rebebil er a disaiplo el Chijudea mle meringel er tir a choitii a Llach er a Moses.

¹⁶ Me ngmilekera e smodii a Petrus? A doltirakl er a Rellir 11:4-16 e ngmilasech a eua el lochotel a kmo tia ulekrael el mlara eanged: (1) ues el lengiluu (4-10 el kekerei el bades); (2) ulekrolel a chedaol reng er a Dios (11, 12 el kekerei el bades); (3) anghel el mlo odngelii a Kornelius (13, 14 el kekerei el bades); me a (4) oitelel a chedaol reng el mora Rechisentael. (15, 16 el kekerei el bades) Me a Petrus a rirekir a tekingel el kmo: “Me ng bleketakl el kmo a Dios a milsterir a re Chisentael a Chedaol Reng el di ua ikid er ser a bo doumerang er a Rubak el Jesus Kristus, ma le ua isei, e ngak ak techang mak melasem el merrob er a Dios!”​—Rel. 11:17.

17, 18. (a) A tekingel a Petrus ngmlo uchul a ngera el omeasem el mora Rekristiano el Chijudea? (b) Ngera uchul me ngsebechel mo meringel er kid a melemolem el loba kltarreng er a ongdibel, e ngera el ker a ungil a di lekid el oker?

¹⁷ A tekingel a Petrus a mlo uchul omeasem el mora Rekristiano el chad er a Chijudea. Te mo diak longetukel e mo kongei er a Rechisentael el kldemir el Kristiano? A Biblia kmo: “Me [a rechapostol  me a Rechijudea el Kristiano er a] le renges a ikang e ng mlo diak a ngeral ledung e mocha oldanges er a Dios el kmo, ‘A Dios a dirrek el mla mesterir a re Chisentael a techall el obult er a kngterir e mo suobel!’” (Rel. 11:18) Tir el kilengei el melodech a uldesuir a uchul me a ongdibel a millemolem el ngar er a kltarreng.

¹⁸ Chelecha el taem me nglocha mo meringel er a remera el Kristiano a melemolem loba kltarreng e le “te chad er a bek el beluu, ma kebliil, ma bek el bedengir a re chad ma omelekoi.” (Och. 7:9) Me kede mesa el kmo a rechedal ongdibel a chad er a kakerous el beluu me ngkakerous a siukang me a ulekeroul. Me ngungil a di lekid el oker: ‘Ngak, ak mla otobed er a renguk a ngii di el rolel a omengetukel? A beluulechad a meruul er a rechad el mo kakeakl le rechad a kmal chemat a belurir, kleblillir, siukang er tir, me a lechub e te mengetukel er a rechad. Ngak, ak mla rullii er a renguk me ngdiak bok bechei a uldesuir me lomekrael omerellek el mora rudam er ngak el Kristiano?’ Molatk a dilubech el mora Petrus (Sefas) er a betok el rak er uriul er a kot el beltir a Rechisentael. Rebebil er a Rekristiano a miltengel osengir er a Rekristiano el diak el chad er a Chijudea a uchul me a Petrus a ‘ngilseklii’ er a Rekristiano el Chisentael, me a Paulus a mlo kirel mesmechokl er ngii. (Gal. 2:11-14, BT) Me ngkmal kired el mo kerekikl er a bedeklel omengetukel.

19. Rekristiano el Chijudea el kiliei er a Antiok te ulemuchel el lomerk el mora rua techang, me ngngera dilubech?

¹⁹ Me a rultirakl er a Jesus te ulemuchel lomerk er a klumech el mora rediak el blotk el Chisentael? Molatk a dilubech er uriul er a Antiok er a Siria. d Tia el beluu a mle betok a Rechijudea el kiei er ngii, engdi te dimlak el kakngit tir me a Rechisentael. Me a Antiok a mle ungil territory el domerk el mora Rechisentael. Ngar tiang e a rebebil Chijudea el disaiplo ulemuchel el lomerk er a ungil chais el mo “rar Chigriik.” (Rel. 11:20, BT) Tia el berkel a klumech a dimlak di lebora Rechijudea el melekoi a tekoi er a Grik, te dirrek el lulemerk el mora rediak el blotk el Chisentael. Me a Jehovah ulemekngeltengat a urerir “me te betok el chad a mlo oumerang.”​—Rel. 11:21.

20, 21. Ngmilekera Barnabas e ochotii a klengariourreng, e mekera sebeched el lochotii a klengariourreng el ngar er a urered er a berkel a klumech?

 ²⁰ Me a ongdibel er a Jerusalem uldureklii a Barnabas el mora Antiok el mo omekerreu er tia el sers el mla mora blsechel omeridm. Te kmal mle betok a resemeriar me a ureor a mlo diak el sebechel a di ta el chad el meruul er ngii. Me ngtecha lmuut el lungil mo ngosuir a Barnabas el ua Saulus, el ngii a mo apostol el kirir a Rechisentael? (Rel. 9:15; Rom 1:5) A Barnabas, e ngmo mengaiuechit er a Saulus? Ngdiak ngbai kmal ulechotii a klengariourreng. Ngika mlora Tarsus el mo osiik er a Saulus e nguu el mei er a Antiok el me olengeseu. Te dilak el ta el rak el melisiich er a rechedal ongdibel er a Antiok.​—Rel. 11:22-26a.

²¹ Ngmekera sebeched el loukerebai er a klengariourreng er a Barnabas el ngar er a urered er a berkel a klumech? Kede rokui el di kakerous a duch er kid. El ua tiang, a rebebil a locha kmal meduch el lomerk er a klumech sel lengar er a beluu me a lechub te oldingel obliil, engdi ngmeringel er tir a meruul a return visit me a lechub ngmeringel er tir lomuchel omesubel a Biblia. A lsekum ngsoam el olengeriakl er aikakid el rolel e molengit a ngeso er a rebebil. Sel moruul el uaisei e ke lmuut el mo ungil olisechakl a Biblia e lmuut el mo klou a deurreng er kau el omerk er a klumech.​—1 Ko. 9:26, BT.

22, 23. Ngera te mirruul er ngii a rudam el ngar er a Antiok el lolecholt er a bltikerreng er a klodam, e mekera rechedal a Dios er chelecha el taem e olecholt er a osisiu el blekeradel?

²² “A ruumerang er a Jesus a mle kot el lomekedong er tir er a Antiok el kmo Kristiano.” (Rel. 11:26b) Tia el ngklir er a Dios a kmal chatter er tirke el sorir el oltirakl er a Kristus. Me ngmlo er ngii a klodam er a delongelir a Rechijudea me a Rechisentael el loumerang er a lebo el Kristiano a Rechisentael? Molatk a dilubech er a lebo er ngii a klou el bosech er a kall er a 46 C.E. e A remechebuul el chad er a ngar er a mong a kmal mlo chuarm er a temel a bosech er a kall e le ngdimlak a extra el ududir me a kelir. Me a Rechijudea el Kristiano el kiei er a Judea a kmal mlo  ousbech a ngeso e le te betok er tir a mle mechebuul. A rudam er a Antiok luldimukl er tir a rudam el Chisentael er a bo lodengei e te uldurokl a “ngeso el morar udam el kiei ra beluu ra Judea.” (Rel. 11:29, BT) Tia mera el lochotii a dmolech el bltikerreng er tir el mora rudam me a rudos er tir!

²³ Ngkmal di osisiu el kirir a rechedal a Dios er chelecha el taem. Sel bo dodengei el kmo a rudam er kid el ngar er a ta er a beluu a ousbech a ngeso, e kede mo osiik a rolel e olengeseu er tir. A Branch Committee di mereched el kutmeklii a Disaster Relief Committee el mo omekerreu er a rudam er kid el mlo er ngii a telemellel a belurir, el ua sel leduubech a eolt, desiu, me a tsunami. Aika el ngeso el mora rudam ochotii el kmo ngkmal betik a rengud er tir.​—Jn. 13:34, 35; 1 Jn. 3:17.

24. Ngmekera dochotii el kmo kede mla loia er a rengud a belkul a ues el lilsang a Petrus?

²⁴ Kid el mera el Kristiano mla loia er a rengud a belkul a ues el lilsang a Petrus er a lengar er a bebul a blai er a Jopa. Kede mengull er a Dios el diak longetukel er a rechad. Ngika soal a bo dungil merkii a klumech el kirel a Rengedel. Me kede omerk el mora rechad el diak el ior er a beluu el lechad er ngii me a lechub e nguldesuir a rechad el kirir. Mada derellii er a rengud el mo mesterir tirke el rokui el kongei el lorrenges a techall el mo kongei er a ungil chais.​—Rom 10:11-13.